Ширек финал шеруі келді

Бейсенбі, 21 маусым 2012 7:38

Сейсенбі күннің кешінде өткізілген Англия-Украина, Швеция-Франция командалары арасындағы матчтармен топтық раунд мәреге жетті. Бұл кезең сонымен бірге чемпионатқа қатысушылардың тең жартысын жарыс жолынан шығарып тастады.

 

 

Бейсенбі, 21 маусым 2012 7:38

 

Сейсенбі күннің кешінде өткізілген Англия-Украина, Швеция-Франция командалары арасындағы матчтармен топтық раунд мәреге жетті. Бұл кезең сонымен бірге чемпионатқа қатысушылардың тең жартысын жарыс жолынан шығарып тастады.

Англия-Украина – 1:0. Бір нәрсе айқын, Украина құрамасы бұл жолы өткен турда француздарға қарсы ойнаған ойынынан артық, ал Англия шведтермен шайқасын­дағыдан кемдеу өнер көрсетті. Бұл, айналып келгенде, кездесудің өне бойында украин футболшыларының басымдық көрсетуіне апарып жеткізді. Бірақ кездесуде нашарлау ойнағандар жеңіске жетті де, керісінше мықтырақ көрінгендері жеңілістің ащы дә­мін татуға мәжбүр болды. Бұған мол мүм­кіндіктен бір нәтиже шығара алмаған украин ойыншыларының өздерін кінәлауға да болады, бар пәлені сәтсіздіктің аяқтан шырмап жібермегеніне арта салудың да реті келеді. Төрешілердің оралымсыздықтары тағы бар.

Ағылшындар ойындағы жалғыз голды өзде­рінің алғашқы қарсы шабуылдарының бірінде салып кетті. Оны осы ойынға қаты­са­тыны біраз жыр болған Уэйн Руни өзінің екінші мәрте жасаған талпынысы кезінде, екінші таймның ілкі шағында баспен ұрып түсірді. Ал оған дейін украин командасы сондай сәттің бірнешеуін босқа жіберіп алған еді. Есеп ашылғаннан кейін де олар қарсы қақпаға жойқын жорықтарын тоқтат­қан жоқ. Ақырында олар есепті теңестіру сәтіне де жетті. Бірақ қақпаның үстіңгі маңдайшасының астынан тиіп, ақ сызықтың арғы жағына тиіп шыққан допты «гол» деп бағалауға арбитрдің өресі жетпеді.

Тағы бір нәрсе анық, жарыс жолынан ерте шығып қалғанымен, Украина командасы да хорваттар тәрізді бет-жүзі ұялмайтындай өнегелі өнер көрсетті.

Швеция-Франция – 2:0. Бұл ойында арыстан тұлғалы Скандинавия аумағының жігіт­тері жаралы жолбарыстың кейпін танытты. Кездесудің басынан ойын тізгінін өз қолда­ры­на алған олар қарсы қақпаға қарай жұл­қына шапқылауды финалдық ысқырық естіл­генше тоқтатпады. Шведтердің бұл ынталы ойыны екінші таймда ғана голға айналды. Оны команданың лидері Златан Ибрагимович салды. «Тре Крунур» бұдан кейін де шабуылын саябырсытпады. Соның нәтиже­сін­де ең соңғы минутта екінші допты да түсірді (Себестьян Ларссон). Ал осы матчтың ең үздік ойыншысы болып француз қақпашысы танылуы да бекер емес.

Шведтер, әлбетте, осы ойында қандай бір ірі есеппен жеңіске жетсе де, ширек финал­дың маңайына жақындап бара алмайтындарын жақсы білді. Соған қарамастан, олар тур­нирден кетер кезінде ерекше мінез көрсе­туге бекем бел байлаған екен. Онысы және жақсы шықты. Демек, алаңнан абыроймен кетті.

Енді ширек финалда Англия мен Италия, Франция мен Испания жұптасады.

Бүгін – сол плей-оффтың бірінші ойыны. Ал алаңға Португалия және Чехия құра­ма­ла­ры шығады.

Серік ПІРНАЗАР,

«Егемен Қазақстан».

Матч миниатюралары

* Бұрнағы күні өткен Украина-Англия, Швеция-Франция арасын­дағы матчтарда 3 гол соғылды.

* Чемпионат басталғалы бері өткен 26 ойында барлығы 60 гол салынды. Олардың әрбір матчқа келетін үлес салмағы – 2,30 доп.

* Дүйсенбі күні екі стадионда 111 710 адамның басы қосылды. Жалпы, біріншілік басынан бергі көрермен саны 1 068 864 адамға толды.

* Мергендер көшінде ешқандай өзгеріс жоқ. Оның басында 3 гол соққан шабуылшылар келеді.

* Өткен 2 ойында ойыншыларға 8 ескерту берілді. Соның ішінде Андерс Свенссон (Швеция), Филип Мексес (Франция), Анатолий Тимощук (Украина) екінші рет «сары қағаз» алды. Біріншілік басталғалы бері 96 футболшыға ескерту жасалды.

* Екі ойында үздік ойыншы атағына Уго Льерис (Франция) пен Уэйн Руни (Англия) ие болды.

* Осы кезге дейін 3 ойыншы алаңнан қуылды, 1 пенальти бел­гі­лен­ді, 1 автогол соғылды. Сонымен бірге 1 пенальти қай­тарылды.

Украина құрамасының  бас жаттықтырушысы Олег Блохин.

Айтпақшы…

* Ағылшын фанаттары отандастары Соул Кэмпбел­л­дің өзі шығарған деректі фильм­де Англия құрамасы Укра­и­­на­дан тек табытпен ғана қай­та алады деген ойды білді­р­гені үшін қатты қапа болды. Осыған қарсылық ретінде олар кеше Украина-Англия мат­чы алдында Донецкіге жур­налиске арналған табытты ала келді. Табыт есебінде бейнеленген затты қаланың орталық көшелерімен алып өткен жанкүйерлер ақырында Ленин алаңындағы ирланд пабына (сырахана) тоқтап, мәжіліс құрды.

* Еуропаның қақ ортасында футболдан құрлық чемпионаты қызып жатқан­да Арменияның астанасы – Ереван қаласында белгілі футболшы Эдуард Марка­ровқа қошемет көрсету рә­сімі болып өтті. Кезінде Ба­кудің «Нефтянигі» мен Ере­ван­ның «Арараты» сапында жа­сындай жарқылдаған фор­­вардтың туғанына кеше, маусымның 20-сы күні 70 жыл толды.

* Ресей құрамасының шабуылшысы Павел Погребняк күні кеше ағылшынның «Рединг» клубымен 4 жылға ке­лісім-шарт жасасып үлгерді. Бұл туралы твиттерде «Sky Sports» агенттігі хабарлады. Өткен маусымды 28 жасар футболшы Англиядағы «Фулхэм» командасының сапында өткізіп еді. Командада арен­далық негізде ойнаған ол бар-жоғы 12 ойынға шығып, 6 гол соқты. Көрсеткіш жаман емес. Содан болар, оған таласушылар да болды. Павелдің қалаған клубы енді оған 500 мың еуро көлемінде ақы тө­лейді екен.

* Ресейдің ондаған футбол фанаттары әлі Поль­ша­ тәр­тіп сақшыларының қа­рау­ында отыр. Олар 12 маусымда Ресей құрамасы­ның Польшамен, 16 маусымда Грекиямен өткен матч­та­ры­нан кейін құлып астына ал­ынды, деп хабарлайды ИТАР-ТАСС. Жалпы, осы екі күнде ресейлік 27 жан­күйер ұсталыпты. Қазір қа­маудағылардан бөлек 17 адам түрлі жазалар алып та үлгеріпті: бірқатары айып­пұлдар төлеуге мәжбүр етіл­се, тағы бірқатары бірнеше айға бас бостандығынан айырылған.

* УЕФА Германия футбол одағына қарсы тәртіптік іс ашты. Ол 17 маусым күні Львовта Германия мен Дания құрамалары арасындағы ойында орын алған оқиғаларға байланысты көтерілді. ГФР футболы басшылары осы ел­дің жанкүйерлері матч кезін­де отшашулар жағып, рұқсат етілмеген баннерлер мен нышандарды алып шығып, осы­ған мазмұндас ұрандар айт­қандары үшін жазықты болып отыр. УЕФА-ның бақы­лау-тәртіптік инстанциясы істі 23 маусымда қарайды.

* Украина құрамасының жұлдызы Андрей Шевчен­ко­­ның Англиямен ойыны оның ойыншылық манса­бы­ның құрама сапындағы ең соңғы ресми матчы болды. «Дегенмен, жақын арада Украинада өтетін жолдас­тық кездесуге шақыру алатын шы­ғар­мын деп ойлаймын», дейді 36 жасар футболшы.

 

Ойлар, пікірлер, көзқарастар

Де РОССИ, Италия құрамасының жартылай қорғаушысы:

– Ирландиямен кездесуіміз жақсы өтті. Матчтың алдында тек өз ойынымыз туралы ойлауымыз керектігі талай айтылды. Себебі, испандар­дың жеңетініне ешкімнің күмәні болмады. Дегенмен, бұл жеңістің олар үшін оңайға түспегенін енді байқап отырмыз. Ал ир­ландықтар турнирге өте жақсы команда әкеліпті. Олар өз жан­күйер­лерінің құрметтеуіне әбден лайықты. Ал тап мұндай ғажайып фанаттарды мен бұрын еш жерде көрген жоқпын.

Йоахим ЛЕВ, Германия құрамасының бас жаттықтырушысы:

– Кейбір журналистердің сұрақтарына жауап берейін, алда Грекиямен өтетін ойынымызда саясат ешқандай да рөл ойнамайды. Рас, қазір саясат туралы көп айтылып жатыр. Соның ішінде Еуроодақ елдерінің өзара қарым-қатынасы да сөз болуда. Бірақ оның бізге қатысы жоқ. Құраманың Ангела Меркельмен байланысы өте жақсы. Дегенмен, біз онымен былай келіскенбіз: канцлер біздің ісімізге араласпайды, ал бас жаттықтырушы саясатқа басын сұқпайды. Дұрысы – осы. Әркім өз ісімен айналысуы керек.

Олег БЛОХИН, Украина құрамасының бас жаттықтырушысы:

– Бұл неғылған төрешілік? Доп жарты метр ішкері қақпаға кіріп кетеді, ол мұны аңғармайды. Онда бізге қақпаның артында тұратын бесінші арбитрдің не керегі бар? Терри өз айып алаңында қолымен ойнайды, төреші үндемейді, Кэрролл біздің ойыншыны шынтағымен қағып жібереді, төреші тағы үнсіз. Ал мен мына команда үшін титтей де ұялмаймын. Ол өте жақсы ойнады және жеңілетін реті болған жоқ.

 

Қорытынды турнир кестесі

С тобы

№	Командалар	О	Ұ	Т	Ж	Доп	Ұп
1	Англия	3	2	1	0	5-3	7
2	Франция	3	1	1	1	3-3	4
3	Украина	3	1	0	2	2-4	3
4	Швеция	3	1	0	2	5-5	3