Спорт • 22 Сәуір, 2019

GGG-дің қарсыласы кім?

329 рет көрсетілді

Бұл күндері барша жанкүйер 8 маусымды тағатсыздана күтуде. Себебі дәл сол күні тоғыз айға жуық уақытқа созылған үзілістен кейін Қазақстанның мақтанышы Геннадий Головкин қайта шаршы алаңға шығады. Ол Нью-Йорктегі әйгілі Madison Square Garden аренасында канадалық Стив Роллспен жұдырықтасады.

Былтырғы жылдың қыркүйек айының бел ортасында Геннадий Головкин мекси­калық Сауль «Канело» Альварестен ұпай саны­мен ұтылып, белді нұсқа­лар бойын­ша чемпиондық бел­беулерінің бәрінен айрылған еді. Ұзақ уақыт бойы орта салмақтың теңдессізі атанып, барша жұртты айшықты өнері және жарқын жеңістерімен қуантып келген әйгілі жерлесіміздің бұл сәтсіздігі қазақстандық жанкүйерлерге де ауыр соққы болып тиді. 

Барша жұрттың Головкинді жақсы көретіні белгілі. Ол өзге кә­сіпқой боксшылар секілді еш­уақытта мақтанбайды, масаттанбайды, жеңістің буына мастанбайды. Кеудесін керіп, көпіре сөйлемейді. Бір сөзбен айтсақ, Гена үндемей-ақ, үлкен іс тындырып жүрген мықты азамат. Ал біздер үшін ең маңыздысы – шаршы алаңға ол үнемі қазақтың шапанын киіп шығып, ұзақ жылдар бойы Қазақстанның спорттық даңқын асқақтатты. Елбасы Нұрсұлтан Назарбаевтың алдын­да тұрып: «Әкем – орыс, анам – ко­рей, ал мен – қазақпын!» деп айт­қан бір ауыз ғана сөзінің өзі неге тұрады. 

2006 жылдан бері кәсіпқой рингте күш сынасып жүрген Го­ловкин сол сәтке дейін өткізген 39 кездесудің 38-інде жеңіске жет­ті. 34 қарсыласын кесілген те­рек­тей сұлатып салды. 2017 жыл­дың күзінде GGG мен «Канело» арасындағы бәсекеде тең есеп тіркелді. Негізі сол жолы біздің жігіт ұтқан еді. Алайда қазылар алқасы әділдікті белден басты. Сол жекпе-жектен кейін біраз дау-дамай болғаны белгілі. Бірақ одан ештеңе өзгерген жоқ. 

Әлем чемпионы атағынан айрылғаннан кейін отандасымыз біраз уақыт бойы ойланып-толғанып жүрді. Ақыры әйгілі DAZN сервисімен келісімшартқа отыр­ды. Енді ол 8 маусымда қай­та шаршы алаңға шығады. Ал Нью-Йоркте Геннадий Го­лов­кин­мен жұдырықтасатын кана­да­лық боксшы жайында біз не білеміз? 

Стив Роллс 1984 жылы Үйең­кі жапырақтар еліндегі Онтарио провинциясындағы Гамильтон қаласында дүниеге келді. Әуес­қой рингте біраз тәжірибе жиды. Канаданың екі дүркін чемпионы атанғаннан кейін 2009 жылы Миланда өткен әлем чемпионатында бақ сынау құрметіне ие болды. 75 кило салмақ дәре­жесінде өнер көрсеткен ол ал­ғашқы айналымдарда грузиялық Ле­ван Гуледани (10:3) мен ита­лиялық Лука Подданы (7:6) қапы қалдырғанымен, 1/8 финалда үндістандық Вижендер Сингхке (2:4) есе жіберді. 

2011 жылдан бері Роллс кә­сіп­қой рингте жұдырықтасуда. Сол аралықта 18 кездесу өткізіп, бар­лығында жеңіске жетті. 10 қар­сыласын нокаутпен ұтты. Осы орайда канадалықтың мық­ты­лармен бірде-бір рет жолы қиыс­пағанын және ешуақытта 12 раундтық жекпе-жекке шықпа­ға­нын айта кетуге тиіспіз. 

Өзінің соңғы кездесуін ол был­тырғы жылдың желтоқсан айын­­да Канадада өткізді. Бұрын­да­ры GGG-дің командасында бол­ған америкалық Кеандре Ле­зер­ву­даны ұтқан Роллс USBA нұс­қа­сының алтын белбеуін ие­ленді. 

Әрине, Стив Роллсты осал бокс­шы деп айтуға болмас. Өйт­кені ол осы күнге дейін ешкім­нен жеңілген емес. Десек те Ген­надий Головкин секілді ұлы дүр­мектерде әбден ысылған сақа спортшыға ол қауіп төн­ді­ре қоймас. Қазақстанның мақ­та­нышы алдағы жекпе-жекте де  жанкүйерлерді қуантады деген ойдамыз. 

Соңғы жаңалықтар

Ұқсас жаңалықтар