Экологиялық таза пакеттер
Өркениетті елдерде экономиканың басым бөлігін шағын және орта бизнес құрайды. Соңғы жылдары біздің елімізде де кәсіпкерлікті дамытуға байланысты «Сыбаға», «Бизнестің жол картасы-2020» сияқты түрлі мемлекеттік бағдарламалар қабылданып, тұрақты қолдау көрсетіліп келеді. Өз ісіңді аш та, ұтырын тауып, жұмыс істей білсең болғаны, шаруаң жүреді. Өзіңе де, өзгелерге де пайдалы. «Даму» кәсіпкерлікті дамыту қоры» АҚ-тың қаржылай және инфрақұрылымдық қолдауының нәтижесінде өз ісін тиянақты жүргізіп отырған «Поливест» ЖШС Қазақстанның батыс өңіріндегі полиэтилен пакеттерін шығарумен айналысатын бірден-бір өндіріс орны. Бұл кәсіпорын табиғи ортада биологиялық жолмен ыдырайтын, яғни шіріндіге айналып кететін пакеттер шығаратын санаулы өндіріс орындарының бірі. Төрт жылдан бері жеті түрлі полиэтилен пакеттерін шығарумен айналысатын кәсіпорын негізінен Ақтөбедегі «Дина», «Олжа», «Анвар» секілді супермаркеттердің, Атырау, Батыс Қазақстан облыстарындағы ірі сауда орындарының, жеке тұтынушылардың тапсырыстары бойынша жұмыс істейді.
Экологиялық таза пакеттер
Өркениетті елдерде экономиканың басым бөлігін шағын және орта бизнес құрайды. Соңғы жылдары біздің елімізде де кәсіпкерлікті дамытуға байланысты «Сыбаға», «Бизнестің жол картасы-2020» сияқты түрлі мемлекеттік бағдарламалар қабылданып, тұрақты қолдау көрсетіліп келеді. Өз ісіңді аш та, ұтырын тауып, жұмыс істей білсең болғаны, шаруаң жүреді. Өзіңе де, өзгелерге де пайдалы. «Даму» кәсіпкерлікті дамыту қоры» АҚ-тың қаржылай және инфрақұрылымдық қолдауының нәтижесінде өз ісін тиянақты жүргізіп отырған «Поливест» ЖШС Қазақстанның батыс өңіріндегі полиэтилен пакеттерін шығарумен айналысатын бірден-бір өндіріс орны. Бұл кәсіпорын табиғи ортада биологиялық жолмен ыдырайтын, яғни шіріндіге айналып кететін пакеттер шығаратын санаулы өндіріс орындарының бірі. Төрт жылдан бері жеті түрлі полиэтилен пакеттерін шығарумен айналысатын кәсіпорын негізінен Ақтөбедегі «Дина», «Олжа», «Анвар» секілді супермаркеттердің, Атырау, Батыс Қазақстан облыстарындағы ірі сауда орындарының, жеке тұтынушылардың тапсырыстары бойынша жұмыс істейді.
Серіктестік жылына шамамен 60 тоннадай пакет шығарады. Мамандардың айтуынша, Ақтөбеде жыл сайын 150-200 тоннадай полиэтилен пакеттері пайдаланылады. Бұл кәсіпорын шығаратын өнімдер жергілікті рыноктың тек 15-20 пайызын ғана жабады деген сөз. Бір сөзбен айтқанда, бұл өнімге әзірге сұраныс бар. Қалғаны Қытайдан әкелінетін көрінеді. Рас, бұлардың сапасы бірдей. Бірақ қытайлықтар пакеттерге табиғи ортада тез ыдырататын қоспа қоспайды. Себебі, бұл өте қымбат тұратын технология. Соған қарамастан серіктестік бірыңғай пайда табуды ғана мақсат тұтпай, экологиялық тазалықты сақтауға да мән беріп отыр. Серіктестік директоры Бауыржан Жүсіпов мұны әріптестері арасындағы өздерінің артықшылығы ретінде алға тарта сөйледі. Шынында да, полиэтилен пакеттердің жылдар бойы ыдырамай ауаға зиянды заттар шығаратыны Батыста әлдеқашан әңгіме өзегіне айналып жүр. Бізді кәсіпкердің бірден осы экологияға мән бергені сүйсінтті.
Мұнда пакет жасайтын шикізат негізінен Ресей, Корея, Сауд Арабиясынан, ал оларды тез ыдырататын қоспа Англиядан, Швециядан жеткізіледі. Алдағы жылы Атырауда полиэтилен шығаратын өндіріс орны пайдалануға беріледі деп күтілуде. Бұл да серіктестіктің болашағын үмітті ете түседі. Себебі, шикізатты жақын жерден алу өнімнің өзіндік құнын арзандатпақ. Бауыржан Жүсіповтың мәлімдеуінше, жалпы, полиэтилен әлемдік рынокта биржалық тауар болып есептелетін көрінеді. Яғни бұл өнімге әлі де сұраныс болады деген сөз.
– Рас, Алматы, Ақтау, тағы кейбір қалаларда супермаркеттерде пакеттерді тегін береді. Бұл бір жағынан тұтынушыларды тартудың бір жолы болғанымен, дұрыс емес деп ойлаймын. Экологиялық тұрғыдан қарағанда пакеттерді сату керек. Сатып алған нәрсенің құны болады, оны адам әр жерге лақтыра бермейді. Тегін алса, текке тастай береді. Кей елдерде мұндай полиэтилен пакеттер өндірісіне тыйым салды. Бізде де сондай ұсыныстар болды. Бұдан біз базардағы бұл өнімнің орнын Қытайдан келетін зиянды пакеттерге босатып бергеннен басқа ештеңе ұтпаймыз. Керісінше, бұл пакеттерді табиғи ортада тез ыдырататын қоспа қосу арқылы өндіруге, осындай өндірістерді қолдауға бар күшті салу керек. Біз өнімдерімізді Англияға жіберіп, арнайы сараптамадан өткізіп, сертификат алдық. Біздің өнімдер бір жылдың ішінде шіріп кетеді, – дейді Б.Жүсіпов.
Аталған серіктестік бұл жетістікке «Даму» қорының қаржыландыру бағдарламалары ұсынып отырған жеңілдіктер арқылы жетіп отыр. 2008 жылы ЖШС сол уақытта стандартты болып есептелген жылдық сыйақы мөлшерлемесі 23 пайызбен несиеге полиэтилен пакеттері өндірісі желісін сатып алып, орнатты. Кәсіпорын 2010 жылы «Даму» қорының лизингтік мәмілелерді қаржыландыру бағдарламасының арқасында «Темірлизинг» АҚ арқылы тағы да полиэтилен пакеттер технологиясын сатып алып, өндіріс желісін кеңейтті, өнім өндіру көлемін арттырды. Лизинг сомасы – жылдық сыйақы мөлшерлемесі 8 пайызбен 73 млн. теңге. Қазіргі уақытта несиені субсидиялауға қол жетіп отыр, яғни несиенің 7 пайызын мемлекет субсидиялайтын болса, 1 пайызын кәсіпкердің өзі төлейді.
Келесі кезең – қолданылған пакеттердің қалдығын қайта өңдеу. Ол үшін серіктестік басшылығы қалада полиэтилен пакеттері үшін арнайы қоқыс салатын жәшіктер қоюды ойластыруда. Бұл да «Даму» қорының қолдауы арқасында жүзеге аспақ. Жылына 200 тонна пакет қолданылатын болса, 200 тонна пакет қалдығы шығады. Сондықтан серіктестік тұтынушылардан пакеттің 1 келісін 30-35 теңгеден сатып аламыз деп алақанына түкіріп отыр. Осылайша, пайдаланылған пакеттер айналаны ластап, кез келген жерде жатпайды, екіншіден, кәсіпорын үшін қайталама шикізат болады.
«Поливест» ЖШС-нің полиэтилен пакеттерін шығаратын өндірістік желісінде 2008 жылы небәрі он төрт адам жұмыс істесе, қазір қырыққа жуық адам еңбек етеді. Еңбекақылары да тәуір, мұнда еңбек етуге қолайлы жағдай да туғызылған. Сондықтан да жұмысқа бір кірген адам екінші жерге ауысуға құлықты да емес.
Сатыбалды СӘУІРБАЙ,
«Егемен Қазақстан».
Ақтөбе облысы.
