«Біз командалық жарысқа дайындалдық. Команда сапында Азияның үздіктері жиналған. Жігіттер жарыс жолын бір деммен жүріп өтті. Бұрылыс кезінде біздің нәтиженің жақсы екенін білдік. Тап осындай көрсеткіш үшін келгенбіз», - дейді Базаев.
Ал команданың жеңісіне үлес қосқан велошабандоз Артем Захаров команданың дайындығы жоғары болғанын жеткізді.
«Барлығы да сәтті өтті. Ауа райының да көмегі көп. Ал жарыс жолы айтарлықтай қиын болған жоқ. Тек жел ғана сәл әсерін тигізген шығар. Қазіргі көңіл-күйіміз керемет. Команда толығымен дайын болды. Жеке мен үшін Ташкенттегі Азия чемпионаты аяқталды. Тығыз кестеге байланысты енді тректен өтетін екі жарысқа дайындаламын», - дейді Захаров.
Айта кетелік, Қазақстан командасы сапында Юрий Натаров, Жандос Бижігітов, Дмитрий Груздев, Артем Захаров, Евгений Гидич және Даниил Фоминых Азия чемпионы атанды.
Ал қыздар командасының еншісінде күміс медаль бар.
