Президент • 24 Сәуір, 2019

Қасым-Жомарт Тоқаев мемлекеттік тілді меңгеру жөнінде емтихан тапсырды

1095 рет

көрсетілді

3 мин

оқу үшін

Кеше Орталық сайлау комиссиясында Қазақстан Республикасының президенттігіне кандидаттың мемлекеттік тілді еркін меңгергендігін анықтайтын лингвистикалық комиссияның отырысы өтті. Бірінші болып Қазақстан Республикасының президенттігіне кандидат Қасым-Жомарт Тоқаев мемлекеттік тілді еркін меңгергендігі жөнінде емтихан тапсырды.

Александр ТАСБОЛАТОВ

Қасым-Жомарт Тоқаев мемлекеттік тілді меңгеру жөнінде емтихан тапсырды

Осының алдында, яғни 2019 жылғы 23 сәуірде Қазақстан Республикасы Орталық сайлау комиссиясына «Қазақстан Республикасындағы сайлау туралы» Конституциялық заңының 55-бабына сәйкес Nur Otan партиясы Қазақстан Республикасының президенттігіне кандидат ретінде Қасым-Жомарт Кемелұлы Тоқаевтың тиісті құжаттарын тапсырған болатын. Онда Nur Otan партиясы жоғары органының Қазақстан Республикасының президенттігіне кандидат ұсыну жөніндегі отырысының хаттамасынан үзінді, Қасым-Жомарт Кемелұлы Тоқаевтың Қазақстан Республикасының президенттiгіне кандидат болып дауысқа түсуге келiсiм бергені туралы өтiнiші, өмірбаяндық деректері, Қазақстан Республикасы Орталық сайлау комиссиясының шотына сайлау жарнасын енгiзгенiн куәландыратын құжат, жеке басын куәландыратын құжаттың көшірмесі; жоғары оқу орнындағы білімі туралы дипломдарының көшірмелері және мемлекеттік қызметте жұмыс тәжірибесінің бар екенін растайтын құжаттар болды.

Бұл құжаттардың бәрі талапқа сай болғаннан кейін лингвистикалық комиссия мүшелері заңға сай кандидаттың мемлекеттік тілді еркін меңгергендігін анықтау рәсіміне кірісті. Қазақстан Республикасының президенттігіне кандидаттың мемлекеттік тілді еркін меңгергендігін анықтау үшін алдымен лингвистикалық комиссия ұсынған тақырыпқа көлемі екі беттен аспайтын жазбаша тапсырма жазу беріледі. Одан кейін лингвистикалық комиссия ұсынған көлемі үш беттен аспайтын баспа мәтінін оқу ұсынылады. Ал лингвистикалық комиссия ұсынған тақырыпқа сай көпшілік алдында сөз сөйлеуге кемінде он бес минут уақыт беріледі.

Бұл жайында лингвистикалық комиссия төрағасы Мырзатай Жолдасбеков: «Бүгін лингвистикалық комиссия өз жұмысын бастады. Nur Otan партиясы ұсынған үміткер Қасым-Жомарт Тоқаев емтихан тапсырды. Екі сағат уақыт болды. Барлық ережеге сәйкес емтиханды тапсырды. Бірінші жазба жұмысының тақырыбы – «Абай Құнанбайұлының поэзиясы мен қара сөздері». Екінші мәтін оқуға Шерхан Мұртазаның «Мыңбұлақ» әңгімелер мен хикаяттар жинағын таңдап алды. Үшіншісі, ол кісінің жанына жақын тақырып – «Қазіргі Қазақстанның геосаясаты» болды. Комиссия мүшелері толық құрамда қатысып, өздерінің пікірлерін ашық білдіріп отырды», деді.

Бұдан бөлек, ол: «Қазақстан Республикасы президенттігіне кандидат бірінші жазба жұмысын жазғанда Абайдың поэзиясы туралы, Абайдың қара сөздері, оның халыққа беретін маңызы туралы өте терең жазды. Біз ол жұмыстан бірде-бір қате көргеніміз жоқ. Ал Шерхан Мұртазаның «Мыңбұлақ» атты әңгімелер мен хикаяттар кітабын өзі таңдап алып, соның үш бетін оқыды. Оқығанда да өте мәнерлеп, өз ырғағына сай келістіріп оқыды. Қазіргі Қазақстан геосаясаты туралы ол кісі терең сөйледі. Осылардың бәрін талдай келгенде лингвистикалық комиссияның берген қорытындысы: «Қасым-Жомарт Кемелұлы Тоқаев мемлекеттік тілді толық, жан-жақты меңгерген», деді.