Ел бірлігі мен этносаралық келісімді нығайтып, мәдениетаралық үнқатысудың қазақстандық үлгісін көрсеткен щара этномәдени бірлестіктердің музыкасын, дәстүрін, тілі мен мәдениетін жаңғырту, сақтау және дамыту мақсатында ұйымдастырылды.
Мерекелік шараға Ұлы Отан соғысының ардагерлері, облыстық Қазақстан халқы Ассамблеясының этномәдени бірлестіктерінің өкілдері, жастар қанаты мүшелері, «Жаңғыру жолы» жобасының белсенділері және қала тұрғындары қатысты.
Фестиваль қонақтары «Бір шаңырақ астында» этноауылының көрмесін тамашалап, этностардың ұлттық қолөнері, қолданбалы тұрмыстық заттарымен және әр ұлттың өзіне тән тағамдарымен таныс болды.
Көрмеден соң фестиваль жұмысы «Біз бір отбасымыз» конкурсына ұласты. Концерт Қарағанды облысы әкімі аппараты «Қоғамдық келісім» КММ директоры Ерлан Құсайынның құттықтау сөзімен басталды.
Сайыс шарты бойынша әр этномәдени бірлестік туған тілінде және мемлекеттік тілде өз өнерлерін ортаға салды. Конкурсқа облыстық этномәдени бірлестіктердің шығармашылық ұжымдары қатысып, ұлттық әуендерін әуелетіп, мың бұрала би биледі. Сонымен қатар, олар домбыра да тартып, қазақ тілінде ән шырқады.
