Осы мерейлі сәттің мейманы болған Аударыспақ федерациясының президенті, ұлттық ат спортының жанашыры Данияр Қобыландин: «Үлкен қалалар мен кейбір облыс орталықтарында ат спортынан болмаған шаралар Шалқардың шағын ауылында жүзеге асып жататынын көріп, марқайып қаламыз. Бүгінгі басқосудың мәні зор, мақсаты – ұлттық болмысымызбен үндеседі», – деп ақжарма тілегін білдірді. Бұл сөзді аудандық денешынықтыру және спорт бөлімінің басшысы Сұлтан Жұманов та қуаттап, ұлттық спортқа ден қойып жатқан ауыл жігіттеріне ризашылығын білдірді.
Көп ұзамай сахнадан көкпар командасы енді «Әлім ата» болып аталатындығы ресми жарияланды.
Ауылдың ардагерлер ұйымының төрағасы Орынбасар Жұбаев, ауыл ақсақалы Уайс Ахмет: «Әлім ата — қазақ халқын құраған белді тайпалардың бірі. Шежіре бойынша Кіші жүз құрамына енеді. Енді күллі қазақ еліне ортақ бабамыздың есімін алып жүру көкпаршыларымызға үлкен жауапкершілік жүктейді», – деп оларға зор сенім артып, баталарын берді.
Жаңа есімді иеленген көкпар командасының құрметіне орай көкпар, аударыспақ, жамбы ату, аламан, құнан бәйге, қошқар көтеруден сайыстар өтті. Аламан бәйгеден І орынды Мөңке би ауылдық округінен келген Нұрбек Берімбетовтің тұлпары иеленді, жылтырлық Жолдымұрат Жұбаев қосқан сәйгүлік құнан бәйгеден бірінші келді. Қошқар көтеруден осы ауылдың Мағжан Исағали есімді жігіті алғашқы орынға шықты. Жүлдегерлердің барлығы ұйымдастырушылар тарапынан сый-сияпаттар алды.
– Қазірдің өзінде облыс атынан шығып, аталған спорт түрлерінен еліміздің түкпір-түкпірінде өтетін додаларға қатысып жүрген ауыл жігіттері бар. Данияр Мейрамбек есімді ауылдасымыз жақында көкпардан республикалық ашық біріншілікке қатысатын команданың іріктеу құрамында болып, Тараз қаласында 20 күн әзірліктен өтіп қайтты. Бүгінде ол аталған команданың резервінде тұр. Сондай-ақ Алтай Сүйеубай есімді азамат аударыспақтан спорт шебері атанды. Қаныбек Жансүгіров, Данияр Мейрамбек есімді жігіттеріміз аударыспақтан спорт шеберлігіне үміткер.
Осы шараның өтуіне ауылымыздың барша жастары белсенді болды. 1968 мен 1997 жылдары аралығында туған жылтырлық азаматтар бүгінгі шараға демеушілік жасады, – дейді Жылтыр ауылдық округі әкімі аппаратының жетекші маманы Мұратбек Үбниязов.
