Жиында сөз алған Қаржы вице-министрі Қанат Баеділов бүгінде елімізде 12 еркін экономикалық аймақ құрылғанын айта келіп, бұл бағытта Қазақстанның өзге мемлекеттерге үлгі етерлік бастамалары бар екенін жеткізді. Сонымен қатар экономиканың негізгі тетігі саналатын еркін экономикалық аймақты дамыту үшін елдегі инвестициялық ахуалдың да тартымды, тұрақты, жүйелі екенін айтты.
Дүниежүзілік сауда ұйымының сақтау және оңтайландыру департаментінің директоры Анна Б.Хинохоса Қазақстанның халықаралық сауданы дамыту бойынша атқарған жұмыстарын жоғары бағалап, форум аясында еркін экономикалық аймақты дамыту үшін инновациялық жобалардан бастап, кедендік бақылау қызметінің заң аясындағы жұмыстары жан-жақты талқыланатынын айтты.
− Бүгінде көптеген мемлекеттер күн сайын қарыштап дамыған жаңа технологияларды еркін экономикалық аймақты дамыту мақсатына тиімді пайдалануды жүзеге асыруда. Оның ішінде сәтті жүзеге асқан жобалар жетерлік. Міне, солардың озық үлгісін өзара бөлісу арқылы бұл саланың ілгерілеуіне мүмкіндік тумақ. Біздің ұйымда 100-ден аса мемлекет кедендік-әкімшілік бақылау бойынша ортақ жұмыс жүргізуде. Соңғы жылдары еркін экономикалық аймақтардағы кедендік қызмет саласы бойынша жан-жақты қамтылған тұжырымдама дайындалуда. Сол арқылы ЕЭА-ның әлеуеті мен мүмкіндіктері артып келе жатқанын көріп отырмыз, – деді Анна Б.Хинохоса. Оның айтуынша, Дүниежүзілік сауда ұйымымен жұмыс істейтін елдердегі ЕЭА-ның кедендік бақылау саласында әлі де болса оң шешімі табылмаған мәселелер бар.
– Еркін экономикалық аймақтардағы кәсіпорындар салықтан босатылады, басқа да кейбір мәселелерге мемлекет түсіністікпен қарайды. Десе де, мұндай мүмкіндіктің соңы кәсіпорындардың заң бұзушылықтарына әкеледі. Тіпті, контрабандалық тауарларды осы аймақтар арқылы өткізу фактілері тіркелді. Одан бөлек, есірткі тасымалы, заңсыз ақша бопсалау сынды әрекеттер де тіркелген болатын. Сондықтан ЕЭА-ны қалыптастыру, дамытумен қатар, заңды белшеден басқан келеңсіз тұстарын жою күн тәртібіндегі мәселеге айналуы тиіс, – деді Дүниежүзілік сауда ұйымының сақтау және оңтайландыру департаментінің директоры.
Форумда Қаржы министрлігі Мемлекеттік кірістер комитеті төрағасының орынбасары Өмірзақ Бейіспеков:
− Қазақстан Еуразия кіндігінде, Еуропалық және Азия-Тынық мұхиты аймағының Дүниежүзілік кеден ұйымына мүше елдердің тоғысында орналасқан. Біз екі ірі аймақтың кеден әкімшілерінің көптеген өкілдерінің осынау форумға қатысып жатқанын жоғары бағалаймыз, – деді.
Сонымен қатар ол осы жылдың наурызында Дүниежүзілік кеден ұйымының Бас хатшысы Кунио Микурияның Қазақстанға ресми сапармен келіп, Үкімет басшысы Асқар Маминмен кездескенін еске салды.
Форум барысында еркін экономикалық аймақтың табысты дамуына жаңа серпін беретін өнеркәсіптер мен аймақтардың инфрақұрылымын жандандыру мәселелеріне басымдық берілді.
