Абай мектебіндегі игі дәстүр жалғасын таба бермек
Сейсенбі, 5 ақпан 2013 7:31
Зайсан ауданының іргесіндегі Қарабұлақ ауылындағы Абай атындағы орта мектепті соңғы бес жылдан бері аудандық мәслихаттың депутаты, өз ісінің білгірі Гүлнар Уатханқызы Ақтанова басқарып келеді. Мұның алдында осы ұжымда ұстаз, оқу-тәрбие жөніндегі орынбасар болып қызмет істеген Гүлнар Уатханқызының еңбек өтілі 33 жыл екен. Ауылдастары құрметіне бөленген, қашан да халықтың сөзін сөйлеп, жоғын жоқтап, қоғамдық жұмыстардың бел ортасынан табылатын іскер ұстаз бізді жылы қарсы алып, мектептің екінші қабатына бастады.
Сейсенбі, 5 ақпан 2013 7:31
Зайсан ауданының іргесіндегі Қарабұлақ ауылындағы Абай атындағы орта мектепті соңғы бес жылдан бері аудандық мәслихаттың депутаты, өз ісінің білгірі Гүлнар Уатханқызы Ақтанова басқарып келеді. Мұның алдында осы ұжымда ұстаз, оқу-тәрбие жөніндегі орынбасар болып қызмет істеген Гүлнар Уатханқызының еңбек өтілі 33 жыл екен. Ауылдастары құрметіне бөленген, қашан да халықтың сөзін сөйлеп, жоғын жоқтап, қоғамдық жұмыстардың бел ортасынан табылатын іскер ұстаз бізді жылы қарсы алып, мектептің екінші қабатына бастады.
– Мектебіміз ескі болғанымен, сонау 90-жылғы зілзала кезінде сыр бермеді. Аздап жөндеп алғанбыз. Аудан әкімі Серік Зайнулдин үнемі қамқорлық жасап тұрады. Қазір білім ордасында 388 оқушы бар, мектеп алдындағы даярлықты қосқанда балалар саны 454. 50 орындық балабақша да біздің мектептің ішінде, жалпы саны 202 оқушыға тегін тамақ беріледі, – деп мектеп директоры біраз жайдан хабардар етті.
Екінші қабаттағы Абай мұражайы құнды кітаптар мен Хакім ақын жайлы шығармалармен толықтырылған, сарғайған мақалалар мен ескі журналдардан да қажетті мағлұматтар ала аласыз. Мұның алдында ғана Абайдың шөбересі, Зайсанда тұратын, жасы 90-ға жақындап қалған Гүлзипа Исрайлова мектеп оқушыларымен кездесіп, атасы жайлы естеліктер айтыпты. Абай мұражайында ауыл тарихы туралы сыр шертетін мәліметтер де аз емес екен.
– Абай мектебінен түлеп ұшқандар қатарында талант иелері көптеп саналады. Осы ұядан бірнеше ғылым докторы, алты ғылым кандидаты түлеп ұшқан, – деп әңгімеге араласты Зайсан аудандық мәслихатының хатшысы Дәулет Ыдырышев. – Белгілі ақын Есет Әукебаев, Қазақстанның еңбек сіңірген қайраткері, күміскөмей әнші әрі сазгер Дәлел Уәш, жүзден астам халықаралық дәрежедегі спорт шеберлерін дайындаған білікті бапкер Жанәділ Атаев, ғылым кандидаты, спорт маманы Еркін Уанбаев, танымал журналистер Сұңғат Әліпбаев, Ермұрат Бапи, Болат Нәсіпбаев та осы мектептен білім алған.
Өңір басшысы Б.Сапарбаевтың бастамасымен Шығыстың барлық аудандары мен ауылдарында қанат жайған «Туған елге – тағзым!» акциясы бойынша кезінде осы білім ордасынан түлеп ұшқан шәкірттер кіндік қаны тамған ауылдарына қайырымдылық қолын созыпты. Үш сыныпқа кіреберісте ілулі тұрған «Мектеп түлектерінің тартуы» деген жазуға көзіміз түсті. 2010, 2011, 2012 жылдары түлектер сыныпты қажетті оқу құралдарымен, теледидар, компьютер , тоңазытқышпен жабдықтап қойыпты.
Мектеп оқушылары түрлі олимпиадалар мен байқаулардан да табысты оралуда. Атап айтқанда, 10-шы сынып оқушысы Толғанай Қалиолданова биология пәні бойынша облыстық сайыста екінші, ал, Әйгерім Қасымова химия пәнінен үшінші орынға ие болыпты.
Білім мен еңбек егіз. Абай мектебінің ұстаздары осы қағидаға берік. Жаз кезінде екі гектарға картоп, жарты гектарға көкөніс өсіріп, пайдасын көріп отыр. Өткен жылы 2800 кило картоп, 1150 кило сәбіз, 913 кило орамжапырақты мектептің қосалқы шаруашылығынан жинап алған. Ол ол ма, мектеп ұжымы осындағы шаруа қожалықтарымен келісімге отырып, көкөністі арзан бағамен алуда. Дәулет Тантыбаев деген азамат бір тонна картоп түсіріп беріпті.
Мектеп жанындағы жылыжайға келдік. Мұндағы қиярды жақында жинап алыпты. Жаңасын отырғызу басталыпты. Ол үш айда піседі, ар жағында бақша маусымы басталады, – дейді директор Гүлнар қарындасымыз.
– Жазда мектеп маңы ағаштың жаңа түрлерімен толығады, гүлдер бүршік жарған кезде хош иістен бас айналады, рахат, неше түрлі жануарлардың сұлбасын жасап, балалардың табиғатқа деген жанашырлығын оятудағы ұстаздардың белсенділігіне еріксіз риза боласыз, – деп аудандық білім беру бөлімінің бастығы Сәния Әбдіғалиева әңгімені толықтырды. Оның айтуынша, жаз шыға аудан әкімі Серік Зинабекұлының бастамасымен барлық мектептер апта сайын сенбілікке шығып аулалар мен көшелерді көркейтуге атсалысады, ағаш көшеттерін отырғызып, тұрмысы нашар жандарға көмектеседі. Ал, бұл үлгілі істің басы-қасында мектеп ұстаздары да жүретіні шындық.
Оңдасын ЕЛУБАЙ,
«Егемен Қазақстан».
Шығыс Қазақстан облысы.
Зайсан ауданы.
Суретте: мектеп жанындағы бала бақша сәбилері «Қара жорғаны» билеп тұр.
