![Ғылымға бетбұрыс](/media/2019/05/27/2d2dddf93499b523c77776235e70256f.jpeg)
Университет ректоры Азамат Тіріжанұлы Едрисов білім ордасының бүгінгі беталысына кеңінен тоқталды: «Біз халықаралық стандарттарға сай білім беру жүйесін жаңғыртып, сапалық деңгейді арттыру арқылы әлемдік білім кеңістігіне ене аламыз. Осы орайда оқу орнында санға емес, сапаға жұмыс істеу мәселесі қолға алынды. Басты меже – білім, ғылым, өндіріс, инновацияны ұштастыра отырып, инвестиция құю, осы арқылы мемлекетіміздің халықаралық қоғамдастықтағы беделін бекемдей түсу.
Жоғары оқу орны майталман маман, нағыз ғылым адамдарын даярлайтын орта. Осы тұрғыда ғылыми кадрлар сабақтастығын қамтамасыз ете отырып, профессорлық-оқытушылар құрамының ғылыми әлеуетін арттырып, талантты жастарды ғылымға тартып, магистратураға, докторантураға түсуіне ықпал етіп, жағдай жасау қажет. «PhD дәрежесі атақ, абырой, күнкөріс көзі үшін керек» деген жалаң түсінікті жоққа шығаратын кез жетті. Докторантура – жоғары білікті ғылыми-педагогикалық, ғылыми кадрларды дайындау нысаны, ал оған түсудегі басты бағдар – ғылымды дамыту екендігін ескере отырып, үміткерлер бұл қадамға саналы түрде барса, түйткілді біраз мәселе оң шешім табар еді. Білім алушыларымыз ғылымға ден қойып, докторантурамыз әлемдік деңгейде тыныстағанда ғана Қазақстан ғылымы алға басады. Ағымдағы жылы елімізде магистратура мен докторантураға түсу ережесіне біршама өзгерістер енгізілді. Биылдан бастап IELTS, TOEFL сынды сынақтарды сәтті тапсырып, сертификат иеленгендер ғана докторантураға жолдама алатын болады. Ал біздің оқытушыларымыз мұндай өзгеріске дайын ба? Қандай оңтайлы шешім жасау арқылы ғылымға ұмтылған оқытушыларымызға қолдау таныта аламыз? Қазір осы орайда шешімін таппаған мәселелерді шешу жолдары қарастырылуда. Жақында ағылшын тілін білу деңгейін анықтау мақсатында оқытушыларымыз тест тапсырды. Әлемнің, ғылым мен ақпараттың тілін білмей докторант атану мүмкін емес. Осы олқылықты жою мақсатында докторантураға түсуді ниет еткен талапкерлерге қолдау көрсетіліп, университет тарапынан үш айлық ағылшынша курсты тегін оқыту қолға алынды. Бұл ізгі бастама үміткерлерді қанаттандырды. Ғылым докторы дәрежесін иеленген докторанттарымыздың ғылыми-зерттеу жұмыстары ел кәдесіне жарап, отандық ғылымның дамуына оң ықпал етсе, біз күткен үміт ақталады. Мемлекеттік білім беру тапсырысы бойынша, университет тарапынан бөлінетін қомақты қаржы құмға сіңген судай жұтылып кетпесе екен. Әлемдік ғылым нарығында үміткерлеріміз бәсекеге түсе ала ма деген сұрақ бізді қай кезде де толғандыруы тиіс. Ғалымдардың жас буынын даярлау, университет кадрлық құрамын сапалы түрде жаңартып отыру – басты мақсатымыз. Білім мен ғылым үстемдік құрған заманда ҚарМУ қолдау танытып, қанаттандырған жас докторлар академиялық қоғамдастықтың дәстүрлерін, құндылықтарын, ұмтылыстары мен мақсат-міндеттерін толыққанды бөлісетін академиялық ұжымымыздың табысты, белсенді мүшелеріне айналады деп үміттенеміз».
Аталған курсқа қатысты ҚарМУ оқытушылары да өз пікірлерін білдірді.
Светлана Мусина, экономика факультетінің аға оқытушысы:
– Айтулы курс білім ордасы тарапынан мамандарымызға көрсетілген үлкен қолдау деп білемін. Оқу орны ағылшын тілін қаншалықты меңгергенімізді сынап көру мүмкіндігін туғызып отыр. Ақылы түрде осындай курстарға барып жүрген талапкерлеріміз енді ақшасын үнемдеп, оқу орны ұсынған интенсивті курсқа тегін бара алады. Курсқа қатысу арқылы өзіме деген сенімім артты, арманыма бір қадам жақындағандаймын. Моральдық тұрғыдан қолдау танытып, кәсіби тұрғыдан шыңдалуыма ықпал еткен университет басшылығына айтар алғысым шексіз.
Самат Жакин, философия және психология факультетінің оқытушысы:
– Мен бакалавриат, магистратурада оқып жүрген кезден ағылшын тілін үйреніп, IELTS тапсыруға дайындалдым. Аталған сынақ бүгінгі күннің талабы, табысты ғылыми-педагогикалық мансапқа бастайтын алғышарттардың бірі. Оқу орны ішінен тегін үш айлық курстың ұйымдастырылуы мақтанарлық, құптарлық іс. Университеттің кадрлық әлеуетін дамытатын интенсивті курстар ұзақ мерзімді тереңдетіп оқытуға арналған IELTS емтиханына дайындалуға бағытталған. Жоғары деңгейдегі оқыту үрдісіне қатысып, тәжірибелі мамандардың кеңесін тыңдау – бұл бізге берілген бірегей тамаша мүмкіндік.
P.S.: Қазақ ғылымының көшбасшысы Қаныш Сәтбаев бір сөзінде: «Өз білімін өмірдің, өндірістің тәжірибелерімен нығайтып, байытып отыратын, тапқан ілімін, үлкенді-кішілі ашқан жаңалығын халықтың қажетіне беріп отыратын ғылым ғана өз дәрежесінде заман талабының өресінде болады», депті. Үміт еткен үміткерлеріміз сол үдеден шығып, отандық ғылымның дамуына өзіндік үлес қосса, нұр үстіне нұр болар еді.
Гүлнәр ШӨМЕНОВА