– Бағаның қалай өзгеретіні алдымыздағы маусым айының 26-сында Венада өтетін OПЕК мүшелерінің кездесуіне байланысты болып тұр. Ірі инвесторлар осы басқосудың нәтижесіне қарап әрекет етеді. Меніңше, ОПЕК Таяу Шығыстағы ахуалдың бейбіт шешілуін, АҚШ пен Иран арасында ешқандай қарулы іс-қимылдардың болмауын талап ете отырып, мұнай өндіру көлемін азайтуды жалғастыра беру туралы шешім шығарады, – дейді сарапшы.
Оның айтуынша, Ресейдің ұстанымы басқа мемлекеттерге қайшы келуі әбден мүмкін. Себебі дәл қазір Ресей үшін мұнайды көп өндіру, сөйтіп АҚШ-қа шикізат таситын Венесуэланың орнын басу тиімді.
Қазір баррель бағасы 68,7 долларға сатылуда. Қазіргі халықаралық нарықта қалыптасқан ахуалды ескере отырып, баға жуық арада қарқынды түрде көтеріледі деп күтудің қажеті жоқ. Мұнай қазір қаржы құралынан гөрі, саяси құралдың қызметін көбірек атқарады, сол себепті көп нәрсе АҚШ президенті Д.Трамптың әрекеті мен әлемдегі экономикалық ахуалға байланысты болмақ.
Қазіргі таңда 1 баррельдің бағасы 70-75 доллардың төңірегінде тұрақтаса, мұнай экспорттаушы елдер үшін де, импорттайтын елдер үшін де тиімді меже сол деуге болады.
