Катардың жұлдызы Нассер Салех әл-Аттия (Nasser Al Attiya Team) осы кезеңде бірден ағарып алға шықты да, жарыс аяқталғанға дейін ешкімге дес бермеді. Есесіне екінші орын үшін талас өте шиеленісті өтіп, нәтижесінде Бернхард Тен Бринкенің (Overdrive Racing) бағы жанды. Ал Қазақстанның мықтылары – Андрей Чередников пен Игнат Фальков мәре сызығын сегізінші болып қиып өтті. Екі күннің қорытындысы бойынша жерлестеріміз әзірге тоғызыншы орынға тұрақтады.
Жол талғамайтын көліктердің T2 бәсекесінде қазақстандық «Aktau Motorsport» командасының мүшесі, «Жібек Жолы 2017» жарысының жеңімпазы Кирилл Черненков екінші кезеңде алдына жан салмады. Оның уақыты – 5 сағат 29 минут 7 секунд. Алғашқы күні жеңімпаз атанған Катардың тағы бір өкілі Мұххамед әл-Миир (Mohhamed Nasser Almeer) осы жолы жерлесімізден бақандай 16 минут қалып қойып, екінші орынды қанағат тұтты.
Т3 көліктері додасында Бразилиядан келген Рейналдо Вареленің (MONSTER Energy Сan-Am) бағы жанды. Жүк көліктері сайысында «КамАЗ-мастер» командасының беткеұстары Дмитрий Сотниковқа тағы да тең келер ешкім табылмады. Оның экипажы белгіленген қашықтықты 4 сағат 17 минут 52 секундта жүріп өтті.
«Ралли Қазақстан 2019» додасының келесі кезеңіндегі қашықтығы 450 шақырымды құрайды. Оның 327-сі түрлі кедергілерге толы арнайы участкілер.
