Сырт алаңдағы кездесу алдында Қазақстан құрамасы сапындағы негізгі ойыншылар Юрий Логвиненко, Дмитрий Шомко, Бақтияр Зайнутдинов, Азат Нұрғалиев, Александр Меркель жарақат алып, әріптестеріне көмектесе алмады. Әрине бүкіл матч бойы олардың орны ойсырап, құрамада жоқ екені бірден байқалды. Тіпті алғашқы екі голдың екеуі де қорғаушылардың қателігінен соғылды. Бельгияға қарсы кездесу алдында Михал Билек журналистермен тілдескенде негізгі құрамның бірнеше ойыншысы көмектесе алмағанымен, қалған ойыншыларға сенетінін айтып, «ФИФА рейтингінде көш бастап келе жатқан командамен ойнаймыз. Жасыл алаңға шыққан футболшылар қолдан келгеннің бәрін көрсетеді деп ойлаймын», деген еді. Ұлттық құраманың наурыз айында өткізген екі матчымен салыстырғанда бұл кездесуде Қазақстан құрамасының ойыншылар тізімінде аса қатты өзгеріс байқала қойған жоқ. Тек ұлттық құрамаға жаңадан шақырылған «Қайсар» клубының қорғаушысы Александр Марочкин мен ел чемпионатының соңғы турында гол соғып, көзге түсіп жүрген «Ордабасының» шабуылшысы Тоқтар Жаңғылышбайдың бірінші минуттан бастап алаңға шыққаны аздап таңдандырды. Қақпаны қорғау әдеттегідей «Ордабасы» қақпашысы Дмитрий Непогодовқа сеніп тапсырылса, орталық қорғаушы болып «Ордабасының» екі ойыншысы Темірлан Ерланов пен Сергей Малый шықты. Сол қапталда Ян Вороговский («Қайрат»), оң қапталда Абзал Бейсебеков («Астана») орналасты. Ал жартылай қорғаныста Юрий Перцух («Астана»), Исламбек Қуат пен Георгий Жуков («Қайрат») және Максим Федин («Тобыл») ойнады.
Матчтың алғашқы 10 минутында екі құрама да бір-бірін алыстан байқасып жүрді. Ал 11-минутта Бельгияның алғашқы қауіпті шабуылы бірден голға айналды. Эден Азардың қапталдан әуелете асырған добына бірінші Дрис Мертенс жетіп, есепті ашты. Арада небәрі үш минут өткенде алаң иелері сапынан Тимоти Кастанье мергендігімен көзге түсіп, есепті 2:0-ге жеткізді. Кездесудің екінші бөлігінде бас бапкер Михал Билек алаңға шабуылда ойнаған Тоқтардың орнына Бауыржан Исламханды шығарды. Бапкердің басты мақсаты – Исламхан арқылы допты ортада көбірек ұстап, өз айып алаңымызға доп жібермеу еді. Бірақ 50-минутта Ромелу Лукаку қақпамызға үшінші голды салды. Дегенмен, Қазақстан құрамасының футболшылары екінші таймда белсенді ойнап, Куртуа қорғаған қақпаға қауіпті шабуыл ұйымдастырғанын да айта кетейік. Екі таймның қорытындысы бойынша кездесу 3:0 есебімен Бельгия құрамасының жеңісімен аяқталды.
«І» тобындағы Қазақстан-Бельгия матчынан бөлек тағы екі кездесу өтті. Турнир кестесінде екінші орында тұрған Ресей құрамасы өз алаңында Сан-Марино футболшыларын ойсырата (9:0) жеңді. Ал Шотландия құрамасы Кипрден 2:1 есебімен басым түсті. Үш турдан кейін Бельгия 9 ұпаймен көш бастады. 6 ұпайы бар Шотландия үшінші, Кипр мен Қазақстан құрамасы үш ұпаймен төртінші және бесінші орында тұр. Бірде-бір ұпайы жоқ Сан-Марино көш соңында қалып қойды. Айта кетейік, Қазақстан құрамасы ертең елордадағы «Астана Арена» стадионында дәл осы Сан-Марино құрамасына қарсы ойнайды. Матч Нұр-Сұлтан уақытымен кешкі сағат 20:00-де басталады.
