Қоғам • 11 Маусым, 2019

ТМД елдері жас архившілерінің III Жазғы мектебі ашылды

164 реткөрсетілді

Қазақстан Республикасы Президент Архивінде ТМД елдері жас архившілерінің ІІІ Жазғы мектебі ресми түрде ашылды.

Дәстүрге айнала бастаған архив қызметкерлерінің заманауи үлгідегі басқосуына Ресей, Өзбекстан, Қырғызстан елдерінен 100-ден аса жас маман қатысып, олар бес күн бойы архив және архив құжаттарымен жаңа тәсілде жұмыс істеу ісіне байланысты қызықты дәрістер тыңдайды. Биылғы Жазғы мектептің лекторлары ретінде Польша, Ресей және Қазақстанның архив ісі бойынша жетекші мамандары шақырылып отыр. Президент Архивінің директоры Жәмилә Әбдіқадырованың құттықтау сөзімен ашылған жиынға Ресей мемлекеттік гуманитарлық университеті Тарих-архив институтының кафедра меңгерушісі, профессор Михаил Ларин, Алматы қаласындағы Польша Республикасының Бас консулы Михаил Богданович, Ресей Федерациясының Алматы қаласындағы вице-консулы Багир Мамиев, Польшадағы Мария Складовская-Кюри университетінің архивтану және қосымша тарих пәндері кафедрасының доценті Артур Горак, Ақпарат және әкімшілік технологиялар институтының директоры, профессор Борис Жапаров посткеңестік елдерден жиылған жас архившілердің жұмысына сәттілік тілеп, өзара ынтымақтастықты арттырып, тәжірибе алмасуды әлі де тереңдете түсудің негізінде тиімді ортақ нәтижеге қол жеткізуге болатынына тоқталды.

Жас архившілердің Жазғы мектебі ТМД елдері архив мекемелерінің мамандары үшін жаңа заманауи форматтағы кәсіби білім алатын алаң болып табылады.       Президент Архивінің бастамасымен, әл-Фараби атындағы Қазақ ұлттық университетінің бірлесе қолдауымен ұйымдастырылып отырған Жазғы мектеп қатысушыларының сандық ақпарат пен электронды құжаттарды архивтегі іс жүргізу жұмысына пайдаланудың төңірегінде бір-біріне үйретері аз емес. Осыдан он-он бес жыл бұрынғы сағаттап, тіпті тәуліктеп күтуге мәжбүр болатын тапсырыс берушілердің сұраған кітаптары мен құжаттарын арбаға тиеп әкеп, тарататын тәсіл келмеске кетіп барады. Архив құжаттарын электронды нұсқаға көшіріп, қажетті құжатты қиналмай тауып алуға мүмкіндік беретін бүгінгі цифрлы әдісті игеру ең алдымен архившілер үшін қажет екені әр тарихшының дәрісінде түрлі мысалдармен тарқатылып жатты. Бір сөзбен айтқанда, биылғы мектеп дәрістерінде архивтерді сандық жүйемен қамтамасыз ету, электрондық құжаттардың сақталуы, күнделікті архив қызметінде заманауи ақпараттық технологиялардың енгізілуі мен пайдаланылуы мәселелеріне көп көңіл аударылған.

Іс-шара бағдарламасы аса бай, онда пікірсайыс-талқылаулар, шеберлік сағаттары, іскерлік ойындар, тұсаукесерлер, сонымен қатар, Қазақстанның мемлекеттік архивтерімен таныстыру жағы қамтылған.

Қатысушылардың назарына заманауи архив жабдықтары мен компьютерлік техникалар ұсынылды. Іс-шара қатысушыларына арнайы FeebMe мобильді қолданбасында жеке кеңістік ашылды. Оның көмегімен қатысушылар электронды тіркеуден өтіп, қажетті ақпаратқа қол жеткізіп қана қоймай, спикерлерге онлайн сұрақтар қойып, пікірлер мен жазбалар қалдыра алады.

Соңғы жаңалықтар

UFC турнирі өтпейтін болды

Спорт • Бүгін, 19:18

Жазығы жоқ көктемнің

Әдебиет • Бүгін, 15:36

Шымкентте 40 586 азамат әлеуметтік төлем алды

Оңтүстік Қазақстан • Бүгін, 14:37

Еріктілердің елеулі ісі

Аймақтар • Бүгін, 14:33

Ұқсас жаңалықтар