Чавесті көрсетуді талап етті

Сейсенбі, 5 наурыз 2013 7:16

Оппозиция жағындағылар бұрнағы күні Венесуэла астанасы Каракас қаласында президент Уго Чавестің денсаулығынан толық ақпарат берілуін талап етіп, шеру өткізді. Жүздеген демонстрант қолдарына «Бізге шындық керек!», «Өтірікті доғарыңдар!» деген плакаттар ұстап шықты.

Сейсенбі, 5 наурыз 2013 7:16

Оппозиция жағындағылар бұрнағы күні Венесуэла астанасы Каракас қаласында президент Уго Чавестің денсаулығынан толық ақпарат берілуін талап етіп, шеру өткізді. Жүздеген демонстрант қолдарына «Бізге шындық керек!», «Өтірікті доғарыңдар!» деген плакаттар ұстап шықты.

Ресми ақпаратқа сәйкес, Чавес соңғы екі аптадан бері Каракас­тағы әскери госпитальде жатыр. Ол онда қатерлі ісікті алып тастау бойынша ота жасалғаннан кейін оңалту курсынан өтуде. Үкімет өкілдерінің сөздеріне қарағанда, қалпына келу күрделі­лік­термен өтіп жатыр, бірақ президенттің жағдайы біртіндеп жақса­ра түсу үстінде. Ауруханада Чавестің мемлекеттік іспен шұғылда­нып жатқаны да атап көрсетілген.

Әр қызметкер үшін – 2 млн.
Ресейдің федералды қауіпсіздік қызметі шетелде бір қызметкерін ұстау үшін әрқайсысына жылына кем дегенде 2 млн. рубль шығын­дай­тын болады. Бұл жөнінде жаңа заң жобасында айтылады. Бұл – дос­тас елдерге тұрақты жұмысқа бара­­тын қызметкерлер үшін бюджеттен төленетін қаржы.
Құжатқа сәйкес, қазіргі кезде барлығы 15 адам қарастыры­лып­ты. Олар Абхазияға, Оңтүстік Осетияға және Қырғызстанға тұ­рақ­­ты түрде жұмыс істеуге баратындар болып табылады. Заң жо­ба­сының авторлары оны қабылдау халықаралық қылмыспен тиім­дірек күресуге мүмкіндік береді дейді. Жақын арада жоға­рыда­ғы тізімді кеңейту жоспарланып отырса керек.

Бөлек автобуспен жүретін болды
Израильде Батыс жағалаудан елдің орталық бөлігіне жұмыс істеу үшін баратын палестиналықтар үшін арнайы автобус маршруттары ашылды. Бұған дейін палестиналықтар израильдік қоғамдық көлікті пайдаланатын. Үкіметтегілер жаңа маршруттардың ашылуын қауіпсіздік үшін жасалған шаралар деп түсіндіреді.
Бұған дейін автобуста палестиналықтар мен израильдіктер бір-бірімен оқтын-оқтын шекісіп қалады екен. 3 наурыздан бері жаңа автобустар Палестинаның Калькилия қаласындағы бақылау-тексеру бекетінен жүре бастаған. Ресми мәлімет бойынша, Израильде жұмыс істейтін 29 мың палестиналық бар көрінеді. Олар кей жағдайда екі аралықты жаяу жүріп өтсе, кей жағдайда такси жалдауға мәжбүр болып келіпті.

Көше сыпырушыларға – 150 $
Душанбе мэриясы қаланы дамытуға үлес қосқан әйелдерді ынталандырған жөн деп шешті. Осы мақсатта қала мэрі Махмадсаид Убайдуллоев резервтік қордан 1,8 млн. сомони (380 мың доллар шамасында) бөлуді бұйырды. Бұл соманың басым бөлігі – 1,7 млн. сомониі көше сыпырушыларға берілмек. Олардың әрқайсысы 700 сомониден (шамамен 150 доллар) алатын болады.
Әйел ардагерлерге 600 сомониден тисе, қала құрылымда­ры­ның қызметкер әйелдері 100 доллардан алады екен. Ақшалай сый­лықтар Тәжікстанда 8 наурызда атап өтілетін Ана күні мере­ке­сіне орай берілгелі отыр. Бұл аздаған ақша Наурыз мейрамына берілетін сыйақы есебіне де енеді екен. Ал бұл сыйақылар қала мэрінің тапсырмасына сәйкес наурыздан бастап салтанатты жағ­дайда тапсырылып жатыр.

Жұмсарту үшін шарт қойды
Украина президенті Виктор Янукович бұрынғы үкімет басшысы Юлия Тимошенконың жазасын жұмсарту үшін оған шарт қойды. 1 наурыз күні болған баспасөз мәслихатында президент жаңа қылмыстық-процессуалдық кодекс эконо­мика­лық баптарға байланысты жазаларды «гуманиза­ция­лауға» мүмкіндік беретінін атап өтті.
Бұл қандай гуманизация болмақ? В.Януковичтің мәлімдеуін­ше, егер сотталған адам мемлекетке келтірген шығынының орнын толтыратын болса, онда жазасын жеңілдетуге мүмкіндік бар. «Міне, ол (Тимошенко) осыны ойлауы тиіс», деп атап көрсеткен президент. Экс-премьер Ресеймен газ келісім-шарттарын жасасуда қызмет бабын асыра пайдаланды деген айыппен 7 жылға бас бостандығынан айырылғаны белгілі.

Әйелдерге 40 манаттан сыйлайды
Түркіменстан әйелдері 8 наурыз мейрамына орай мемлекет басшысы Гурбангулы Бердымұхамедовтен сыйлық ретінде 40 манаттан (14 АҚШ доллары шамасында) алатын болады. Мұндай жарлыққа президент өткен жұма күні үкімет мәжілісінде қол қойды. Мемлекет басшысының атынан ақшалай сыйлық жасы мен жұмыс орнына қарамастан, елдің барлық әйелдеріне беріледі.
Әйелдер мейрамына орай мемлекет басшысының атынан ақша беру бірінші президент Сапармұрат Ниязовтың кезінде пайда бол­ған-тын. Бірақ ол Халықаралық әйелдер күнін 2001 жылы алып тастаған еді. Содан кейін әйелдер күні мен Наурыз мейрамын бірік­тірген мереке 20, 21 және 22 наурыз күндері атап өтілетін. Мем­лекет басына Г.Бердымұхамедов келгелі, яғни 2008 жылдан бері 8 наурыз – әйелдер күні қайтадан атап өтіліп келеді.

Қысқа қайырып айтқанда:

*Иранда 200 мың және 500 мың купюралық риалдар айналымға шығарылады деген жоспар бар. Өйткені, Еуроодақ пен АҚШ Иран­ның мұнайына эмбарго жариялағалы бері риалдың құны тым түсіп кеткен еді. Бүгінде «қара» базарда 1 доллар 40 мың риалға тең.

*Мысырда дінаралық негіздегі қақтығыстар жалғасып жатыр. Шерулер Әл-Мансұр қаласында қайтадан бұрқ етті. Бейбіт бас­тал­ған акция кейін тәртіпсіздерге ұласты. Зардап шеккендер бар. Полиция шерушілерге қарсы көзден жас ағызатын газ қолдануда.

*Ресейдің «Ростехнология» корпорациясының құрамына кіретін «Ф.Коротков атындағы «Темп» ААҚ-тың бас директоры 21 млн. рубльден астам ақшаны ұрлады деп айыпталып отыр. Кәсіпорынға тінту жүргізіліп, бухгалтерлік және басқа да құжаттамалар тексе­рі­ліп жатыр.

Интернет материалдары негізінде әзірленді.