Денсаулығы нашар екенін растады

Сәрсенбі, 6 наурыз 2013 6:25

Венесуэланың байланыс және ақпарат министрі Эрнесто Вильегас ел президенті Уго Чавестің денсаулық жағдайы нашарлағанын растады. Ақпарат агенттіктерінің хабарлауынша, президенттің тыныс алуында проблема бар, бұл жаңа жұқпалы аурудың салдары болып табылады.

Сәрсенбі, 6 наурыз 2013 6:25

Венесуэланың байланыс және ақпарат министрі Эрнесто Вильегас ел президенті Уго Чавестің денсаулық жағдайы нашарлағанын растады. Ақпарат агенттіктерінің хабарлауынша, президенттің тыныс алуында проблема бар, бұл жаңа жұқпалы аурудың салдары болып табылады.

Министрдің мәлімдеуінше, президент өзінің денсаулығы нашар екенін біледі. Ол сондай-ақ Венесуэлаға қарсы «психологиялық соғыс» өршіп тұрғанын, оған жол беруге болмайтынын атап өткен. Уго Чавес өткен жылдың желтоқсанында төртінші рет операция үстеліне жатқан еді. Содан бері президент не теледидар экранынан, не халық арасынан көрінген емес. Бұл түрлі ақпараттардың таралуына себеп болуда. 58 жастағы Уго Чавес 1999 жылдан бері Венесуэланы басқарып келеді.

Бүкілқытайлық сессия басталды

Кеше Бейжіңде Бүкілқытайлық халық өкілдері жиналысының сессиясы жұмысын бастады. Жиналыс екі аптаға созылады. Бұл жөнінде «Синхьуа» агенттігі хабарлады.
Жиында делегаттар ҚХР-дың жаңа төрағасының және оның орынбасарларының, сондай-ақ премьер-министрдің, вице-премьердің кандидатураларын және министрлер кабинетінің құрамын бекітеді. Бұлардан бөлек делегаттар әкімшілік рефор­масының жос­парын талқылайды. Сессия соңында ҚХР төрағасы Си Цзиньпин қызметіне ресми түрде кіріседі деп күтілуде. Ал елдің премьер-министрі Ли Кэцян болатын сияқты. Сессияның ашылуында қазіргі премьер-министр Вэн Цзябао сөз сөйлеп, үкіметтің өткен жылғы жұмысы жөнінде есеп берді.

Әлемдегі ең қарт әйел кім?

Әлемдегі ең қарт әйел Мисао Окава есімді кейуана 115 жасқа толды. Жапондық кейуана өзінің туған күнін қарттар үйінде атап өткен. «Франс-пресс» агенттігінің жазуынша, ол осыншама ұзақ жасаймын деп мүлде ойламаған.
Осы жылдың ақпанында М.Окава әлемдегі ең қарт әйел ретінде Гиннестің рекордтар кітабына тіркелген еді. Мұндай құрмет оған 116 жыл 100 күн өмір сүрген америкалық Бесси Купер қайтыс болғаннан кейін көрсетіліп отыр. Осы уақытқа дейін әлемде 114 жасқа келген 100 адам өмір сүріпті. Ал 29 адам 115 жыл, 8 адам 116 жасқа дейін өмір сүрген екен.

Егемендікке шабуыл деп айыптады

Ирактың Анбар провинциясында Сирияның – 48, Ирактың 9 әскериі қаза тапты. Ирак қорғаныс министрлігінің хабарлауынша, шекараға жақын маңда сириялық «терроршы топ» күтпеген жерден шабуыл жасаған. Олар сириялық әскерлер мен айдауылдарға қарсы автоматтан оқ жаудырған.
Министрліктің мәліметтеріне қарағанда, қаза тапқан сириялық әскерилер бұдан біраз уақыт бұрын медициналық көмек алу үшін Ирак шекарасына қашып өткен сияқты. «Әл-Арабия» телеарнасының хабарлауынша, сириялық әскерилердің саны 65 адам екен. Оқиға оларды Сирияның ресми тұлғаларына табыс етуі үшін алып бара жатқанда болған. Ал Ирак тарапы орын алған бұл оқиғаны «елдің егемендігіне жасалған шабуыл» деп айыптауда.

36 жолаушы қаза тапты

Конго Демократиялық Республикасында «САА» авиакомпаниясына қарасты «Fokker 50» жолаушылар ұшағы апатқа ұшырады. «Ассошейтед пресс» агенттігінің хабарлауынша, апат салдарынан 36 адам опат болды.
Ұшақ елдің орталық бөлігіндегі Гома қаласының үстінде орталық сайлау комиссиясы орналасқан ғимаратқа жақын жерде құлаған. Абырой болғанда, қала тұрғындарының ешқайсысы зардап шекпеген. Ұшқыш ұшақты ғимаратқа соқтығысудан алып өтіпті. Ал ұшақ бортында 40 жолаушы және экипаж мүшелері болған екен. Апатқа нөсер жауын себеп болған деген болжам жасалып отыр. Бұл елде авиаапат жиі орын алады. Өткен жылдың желтоқсанындағы апат салдарынан 32 жолаушы қаза тапқан еді.

Күдікті қамауға алынды

Мәскеу қаласының полициясы Үлкен театрдың көркемдік жетекшісі Сергей Филинге қастандық жасаған күдіктіні ұстады. Ішкі істер органдарының таратқан мәліметтері бойынша күдіктіден жауап алынып жатыр.
Аты-жөні аталмаған күдікті кеше ертең­гісін Мәскеу қаласының жанындағы Ступино елді мекенінде қамауға алынған. Екіншісінің кім екені әлі анықталған жоқ. Кеше сондай-ақ, ұсталған күдікті болған бірнеше мекен-жайға тінту жүргізілді. Үлкен театрдың баспасөз хатшысы Е.Новикованың айтуынша, театрға тінту жүргізілмеді. Сергей Филинге осы жылдың 17 қаңтарында кешкісін қастандық жасалған еді. Соның кесірінен оған бірнеше рет операция жасалған болатын.

Қысқа қайырып айтқанда:

*Грузия президенті Михаил Саакашвили Аджарияда орналасқан резиденциясынан бас тартты. Жергілікті БАҚ-тардың жазуынша, ол резиденцияны үкіметке қайтаруға дайын.

* Қырғызстанның «Манас» халықаралық әуежайының маңындағы АҚШ-тың авиабазасынан өткен үш ай ішінде 40 мың доллар болатын азық-түлік қолды болған.

*Антонио Страдиваридің 2010 жылы Лондонда ұрланған скрипкасы Болгариядан табылды. Ол 1,8 миллион АҚШ долларына бағаланады екен.

*Ресей президенті жанындағы казактар істері жөніндегі кеңес жалпыресейлік казактар қоғамы қауымдастығын құру туралы шешім қабылдады. Бұл жөнінде ресейлік БАҚ-тар хабарлады.

Интернет материалдары негізінде әзірленді.