Орталық заманауи тұлғаға қажетті барлық жағдаймен қамтамасыз етілген. Интернет-кафе, емдік-уқалау, физикалық-емдеу бөлмесі, кинозал, кітапхана, жаттығу залы, йога, үстел теннисі, бильярд үстелімен және балаларға арнап жабдықталған ойын бөлмелерімен қамтылған. Бұл орталықтың бір ерекшелігі – мұнда тек қариялар ғана емес, сонымен бірге өмірдің тәлкегіне ұшыраған балдырғандар ата-әже мейірімі мен қамқорлығына бөленбек. Сәйкесінше, қарттар өмірдің бір қуанышы – балалармен уақыт өткізіп, немере мәпелемек.
Мегаполистегі жанға жайлылық сыйлайтын орталықта зейнеткерлер мен мүмкіндігі шектеулі жандар, балалар үйінің тәрбиеленушілері бос уақыттарын өткізіп, денсаулықтарын жақсарта алады. Сондай-ақ мұнда зейнеткерлерге тегін әлеуметтік және медициналық қызмет көрсетіледі.
«Қоғамның дамуы қарияларға көрсетілетін қамқорлықтан байқалады. Жылдың басындағы есептік кездесуде қала тұрғындарының бірі Шымкенттен қарт кісілерге өмір салтын жақсартып, дене шынықтыруға арналған орталық ашуды сұраған болатын. Міне, осы орталықты ашып отырмыз. Зейнеткерлер мен қариялар бұл орталыққа отбасымен, балаларымен және немерелерімен келе алады», деді Ғ.Әбдірахымов.
Аталған орталық Елбасы Нұрсұлтан Әбішұлы Назарбаевтың отандастарымыздың өмір сүру жасын ұзарту мен бұқаралық спортты дамыту тапсырмасы аясында ашылып отыр. Айта кетерлігі, шымкенттіктердің өмір сүру жасы ұзарып келеді. Мегаполис тұрғындарының қазіргі таңдағы орташа жасы 78 жастан асады.
Игілікті шарада қала әкімі тұрғындарды спортпен жаппай шұғылданып, саламатты өмір салтын ұстануға шақырды. Қарттарға арнап қойылған концерттік қойылымда балаша қуанған зейнеткерлер би билеп, ән салып, мереке шаттығына бөленді.
ШЫМКЕНТ
