Аймақтар • 14 Маусым, 2019

Онлайн режімінде орналастырылады

169 рет көрсетілді

Биыл 1 маусымнан бастап Қарағанды қаласында бірінші сыныпқа қабылдау және мектептен мектепке ауысу өтінімдерін school.kargoo.gov.kz порталы бойынша беру мүмкіндігін қарастырған жаңа жүйе іске аса бастады. Яғни, ата-аналар енді балаларын мектепке онлайн режімінде орналастыра алады.

Жоба ұйымдастырушылары мұн­дай жаңашылдық ата-аналардың уа­қы­тын үнемдеуге көмектеседі және сыбайлас жемқорлық тәуекелін жоя­ды деген пікір айтады.

Өтінішті дұрыс рәсімдеу үшін баланың электронды фотосуреті, оның туу туралы куәлігінің ска­нер­лік көшірмесі және баланың денсаулық төлқұжатының сканерлен­ген 1, 17 және 18-ші беттері қажет. Өтініш беруші құжаттардың қарауға қабыл­дан­ғаны туралы СМС-хабарлама алады.

Баласы бірінші сыныпқа баратын ата-аналарға онлайн-өтінімді қалай дұрыс рәсімдеу керектігі туралы Қарағандының барлық мек­теп­терінде өткен ата-аналар жиналы­сын­да түсіндірілді.

Жаңа жүйе тәртібіне сай, бірінші кезекте тіркелген мекенжайы бо­йынша таңдалған мектепке қатысты оқушылар қабылданады. Ал балаларын басқа ауданда орналасқан мектепке бергісі келетіндер үшін квоталық орындар қарастырылған. Бұл орындар тамыздың 1-жұлды­зы­нан кейін бөлінеді. Бұл ретте гим­назия мен лицейлерде баламен әңгі­мелесу және тестілеу өткізуге құ­қығы болады.

Жаңа жүйе бір сыныпқа 25 баладан артық қабылданбайтындай етіліп жасалған. Ал егер сынып инклюзивті болса, онда оқушылар саны азайтылуы мүмкін.

– Бұл жүйеде ата-аналар қала­да­ғы рейтингтері көрсетілген барлық мек­тептің тізімін көре алады. Сон­дай-ақ олар биыл бірінші сынып оқушыларын қабылдайтын барлық педагогтармен онлайн режімінде танысу мүмкіндігіне ие. Яғни, базада әр мұғалімнің марапат, санат және жетістіктер тізімі бар құжаттама болады. Ескеретін бір жайт, егер қабылдау кезінде қандай да бір құжат жетіспесе, мектептің ол баланы қабылдамауға құқы болады, – деп түсіндірді Қарағанды қалалық білім бөлімінің жалпы және орта білім беру секторының меңгерушісі Наталья Головина.

Бұдан бөлек, алдағы уақытта электронды жүйеде мемлекеттік-жекеменшік әріптестік жүйесі бо­йынша жұмыс істейтін жеке мектептер де пайда болады. Қазіргі таңда облыс орталығында жекеменшік бес мектеп жұмыс істейді. Мамыр айының соңына қарай мемлекеттік білім беру тапсырысын орналастыруға байқау ұйымдастырылады. Оның төменгі сынып оқушыларына арналған бағасы 15 780 теңгеге тең. Ал бұл қаржының қалған бөлігін ата-аналар өз қалтасынан төлейді.

Өтініштерді электронды түрде қабылдау 29 тамызға дейін жүр­гі­зіледі. Ал бұл мерзімде онлайн-өті­нім беріп үлгере алмаған ата-аналар оқу мекемесінің кеңсесіне хабарласуы керек. Бұған қоса, жақын арада балаларды мектепке қабылдау мәселелері бойынша «Жедел желі» жұмыс істей бастайды.

 

ҚАРАҒАНДЫ

Соңғы жаңалықтар

Доллар аздап қымбаттады

Қаржы • Бүгін, 11:30

Рыбакина Диасты ұтты

Теннис • Бүгін, 08:43

Ұқсас жаңалықтар