Урология бөлімінің бекетінде отырған қыздардан өзіміз өмірі көрмеген дәрігер туралы сыр суырпақтадық. «Алтын қолды дәрігер. Ол көбіне іш құрылыстарына лапароскопиялық операциялар жасайды. Осындағы былтыр ашылған роботтандырылған хирургия орталығында біздің бөлімнен Ринат қана операция жасай алады. Білімін жетілдіріп, шетелде оқып келді», деді өздерін Эльвира, Арай, Таня деп таныстырған үш медбике.
Біз палата аралап жүргенде іздеген дәрігеріміз де қызмет бөлмесіне келіп, күтіп отыр екен. 1982 жылы Өскеменде дүниеге келген, 2005 жылы Семейдің медициналық академиясын бітірген Ринат Мұратханұлы 2008 жылдан бері Шығыс Қазақстан облыстық мамандандырылған медициналық орталығының (бұрынғы №1 қалалық аурухана) урология бөлімінде еңбек етіп келеді. «Операцияларды роботтың көмегімен де, лапароскопиялық тәсілмен де жасаймыз. Облыс әкімі Даниал Ахметовтің бастамасымен ашылған роботтандырылған хирургия орталығында былтырдан бері 100-ден астам операция жасадық. Әрине, бригадамен, командамен жұмыс істейміз. Оның ішінде хирург те, уролог та, онколог та бар» дейді бірінші санатты уролог-дәрігер.
Ринат 2017 жылы өңірдегі дәрігерлердің біліктілігін арттыру бағдарламасы аясында Германия мен Италия мемлекеттеріне барып, робот көмегімен операция жасаудың қыр-сырын сол жақтағы мамандардан үйреніп қайтыпты. «Әрине, роботты ашық операциямен салыстыруға келмейді. Десек те артықшылықтары көп. Мәселен, адамның аты адам ғой, операция барысында кейде дәрігердің қолы дірілдеуі мүмкін. Ал робот нақты. Сәл баяу болуы мүмкін, бірақ дәл. Бағдарламаны қоясың, болды. Роботтың қолдары да икемді. Адамнан гөрі мүмкіндігі зор. Адам істей алмайтын дүниелерді жасайды. 360 градуста емін-еркін бұрылады. Тез емдеп, тез тігеді. Робот пен лапароскопия ашық операцияларды азайтуға септігін тигізді» дейді ол.
Сөз арасында бұған дейін қанша операция жасағанын да сұрадық. «Есімде жоқ, санамаппын. Біз мерген емеспіз ғой» деп қысқа қайырды.
Жас дәрігер былтыр Елбасының Жарлығымен «Ерен еңбегі үшін» медалімен марапатталыпты. 2018 жылы «Қазақстанның 100 жаңа есімі» жобасының облыстық кезеңіне қатысты. «Мені кім ұсынғанын өзім де білмедім» деп таңданады өзі.
Иә, Ринат Мұратханұлы қақ-соқта ісі жоқ, атақ-абырой соңынан алаөкпе болып жүгірмейтін қарапайым дәрігер.
ӨСКЕМЕН
