Классикалық үлгіде садақпен ату бәсекесінде құрамында Денис Ганькин, Санжар Мұсаев және Ильфат Абдулин сынды мергендері бар Қазақстан құрамасы 1/8 финалда АҚШ спортшыларымен сайысқа түсті. Рио Олимпиадасының күміс жүлдегері, көптеген аса ірі халықаралық жарыстардың жеңімпазы деген дардай атақтары бар командаға қарсы тартыста жерлестеріміз жанкештілік танытып, 6:0 есебімен айқын жеңіске қол жеткізді.
Осы табысының арқасында біздің мергендер келесі жылы Токио төрінде бақ сынау құрметіне ие болды. Сөйтіп араға 20 жыл салып, садақшыларымыз жаһандық додада қайта өнер көрсетеді.
