КӘСІБИ БІЛІМНІҢ ТИІМДІЛІГІ

Қазақстан Республикасының Президенті Нұрсұлтан Назар­баев­тың “Жаңа онжылдық – жаңа эко­но­микалық өрлеу – Қазақстанның жаңа мүмкіндіктері” атты халыққа Жолдауы еліміздің даму бағытын ай­қындап, болашақты нақты бол­жауы­мен құнды. Жас ұрпақтың тәр­биесі мен болашағына бейжай қарамайтын ұстаз ретінде мені  он­дағы білім, ғылым саласында орын алатын жаңа бағыттар қуантты. Қандай мемлекет болса да білімі, ғы­лымы дамымайынша алға жыл­жымайды. Елбасының білім сапасы ең жо­ға­ры халықаралық талаптарға жауап беруі тиіс деген міндеті оның әлем­дік деңгейге шығуына мүмкіндік  туғызып отыр. Егемен еліміздің топ жарып, бәсекеге қабілетті білімі мен ғылымын танытқаны, әрине, қуанышты. Демек, әлемдік озық білім үлгілерін енгізіп, сараптап, тиімдісін алып жатсақ, оның саланы дамытудағы үлесі зор деуге болады. Айтылған міндеттерді іс жүзіне асыруда өзім басшылық жасайтын Жамбыл ауданындағы Ш.Уәлиха­нов атындағы орта мектептің ұжы­мы құнды құжатты оқып, талқы­лап, осы бойынша шәкірттердің білім деңгейін көтеру үшін жұмыла еңбек етуде. Өткен оқу жылын табысты қорытындыласақ, биыл одан да жоғары көрсеткіштерге жетуге ұмтылып отырмыз. Жолдауда кәсіптік және тех­ни­калық білім беру кәсіби стан­дарт­тарға негізделіп, қатаң түрде эко­но­миканың қажеттіліктерімен өзара байланыстырылуы керек делінгені де көңілге қонымды, бүгінгі на­рық­тық қатынастың шырқау шыңына шығудағы алғышарт. Өйткені, елі­мізде кәсіби білім кенжелеп, өн­діріске қажетті маман тапшылығы туындағанын сезінудеміз. Демек, кәсіптік-техникалық білімді жан­дан­дыру басты мақсат.  Ол құнды құ­жаттағы он екі жылдық оқыту­мен шешімін табатыны да белгілі. Оқушылар мектепте білім алумен қатар, белгілі бір кәсіпті меңгеріп шықса, олардың жұмыспен қамты­луына жол ашылады. Алдағы онжылдықта бүлдіршін­дер­ді мектепалды даярлықпен, яғни балабақшамен қамту үшін “Бала­пан” бағдарламасының жүзеге аса­тындығы да қуанышты. Өйткені, білім негізі балабақшада қаланады. Даярлықтан өткен бала дер кезінде өзіне қажетті білім нәрімен сусын­дап, мектеп партасына дайын бола­ды. Бұл алдағы білім алуына зор мүм­кіндік ашады. Бастауыш табал­дырығын аттаған бүлдіршіндердің арасында осы айырмашылық ай­қын сезілетінін көріп жүрміз. Бұл – бастапқыда айтылған халықара­лық стандарттар негізінде білім алып, болашаққа нық қадам  жа­сай­тын рухы биік, білімді, сапалы тұлға тәрбиелеу деген сөз. Жолдау жолдарын оқыған сайын өркениет төріне озуға жасалған нық қадам, берік байламға көз жеткізе түскендейміз. Зоя  ҚЫРҒЫЗБАЕВА, Ш.Уәлиханов атындағы орта мектеп директоры, білім беру ісінің үздігі. Алматы облысы.