Оны Аграрлық мәселелер, табиғатты пайдалану және ауылдық аумақтарды дамыту комитетінің төрағасы Жеңіс Нұрғалиев ашып, жүргізіп отырды. Ол өзінің сөзін Президент Қасым-Жомарт Тоқаевтың сайлауалды бағдарламасында басты мәселелердің қатарында экология және қоршаған ортаны қорғау айтылғанын, сол бастаманың нақты нәтижесі ретінде Экология, геология және табиғи ресурстар министрлігінің құрылғанын ауызға алды. Қоршаған ортаны қорғау мен табиғи ресурстарды ұтымды пайдалануды бақылау мен қадағалаудағы мемлекеттік саясатты қалыптастыру осы министрліктің басты міндеті болып табылады, дей келіп, ол министрлік басшысы Мағзұм Мырзағалиевті тағайындалуымен құттықтап, еңбегіне жеміс тіледі.
Қаралған мәселе бойынша баяндама жасау үшін бірінші сөз Экология, геология және табиғи ресурстар вице-министрі Ерлан Нысанбаевқа берілді. Ол Парламент Сенатының 2016 жылғы жасаған 37 ұсынысының 30-ы толық орындалғанын айтты. «Қазір қалған бөлігін іске асыру бойынша жұмыстар жүргізілуде. Әлі шешімін таппағандар қатарында Қазақстан Республикасында биологиялық әртүрлілікті сақтау мен орынды пайдалану бойынша 2030 жылға дейінгі тұжырымдама және орман шаруашылығы, жануарлар дүниесі мен ерекше қорғалатын табиғи аумақтарды дамыту саласында жеке бағдарламалық құжат әзірлеу секілді мәселелер бар. «Нұр Отан» партиясының бағдарламасында да осы жайт қаралып, қазір министрлік соны іске асыру жұмыстарын үстіміздегі жылға жоспарлап отыр», – деді Е.Нысанбаев.
Сонымен бірге өсімдіктер дүниесін қорғау жөніндегі заң жобасы да әзірленіп, оны 2020 жылдың жоспарына енгізу көзделген екен. «Былтыр 52,7 мың га орман қалпына келтірілген. Дегенмен, жергілікті әкімдіктер осы бағыттағы жұмыстарын жандандыра түскені жөн. Орман өрттерін сөндіру жұмыстарында да олқылықтар көп, бұл мәселеде біз жоғары дамыған елдерден артта қалып отырмыз. Қазір авиапатрульдер ұшыру жұмыстарын 8 млн 800 мың гектардан 9 млн 500 мың гектарға дейін арттыру жоспарлануда. Авиапатрульді жүргізу орман шаруашылығын ғана емес, ондағы жануарлар мен өсімдіктер дүниесін де қорғайды, сондықтан оған қосымша жыл сайын 1,8 млрд теңге жұмсау керек. Дала өрттерінің де зияны экожүйені жоюда аз зардап шектірмейді. Жергілікті әкімдіктер бұл жұмыстарды толық игере алмауда», деді вице-министр.
Баяндама аяқталған соң сенаторлар оны сұрақтың астына алды. Соның ішінде М.Құл-Мұхаммед құландар санын арттыру мәселесіне назар аударды. Оларды «Алтын Емел» қорығынан республиканың барлық жеріне тарату бойынша атқарылып жатқан жұмыстардың мардымсыз екенін айтқан сенатор оның 9 тұяғының ғана Қостанай облысына жеткізілгені күлкілі екенін атап өтті.
Сенатор Сәрсенбай Еңсегенов балық шаруашылығының мәселелеріне көңіл аударып: «Біздің елімізде балық аулауға көктемгі мұз түскеннен бастап 24 сәуірге дейін, ал Ресейде бұл мерзім 25 мамырға дейін созылған. Сонда балықты олар бізден 44 күн ұзақ аулайды. Ал күзгі балық аулау мерзімін қосатын болсақ, олар бізден 55 күнге артық аулайды. Осының себебі неде? деп сұрады сенатор. Оған Е.Нысанбаев бұрын екі елдің де балық аулау мерзімдері бірдей болғанын, алайда 2014 жылдан бастап біздің Бас прокуратура, өкінішке қарай, көктемгі және күзгі балық өсіміне зиянын тигізеді деген себеппен бізде аулау мерзімін азайтып тастағанын жеткізді.
Сенат Төрағасының орынбасары Бектас Бекназаров «Балқаш жолбарысын» қалпына келтіреміз деген әңгіменің өзі бостан-босқа мемлекет қаражатын шашуға ұласпай ма деп сұрады. Ерлан Нысанбаев «Балқаш жолбарысы» популяциясын қалпына келтіру идеясы Халықаралық табиғат қорғау қорынан шығып, бұл іске 10 млн доллар қаражат қарастырылғанын айтты. Сондықтан біздің мемлекеттен бұл іске қаражат бөлінген емес, деді ол.
Осындай өте өткір экологиялық, биологиялық мәселелер көтерілген Үкімет сағатын Сенат Төрағасы Дариға Назарбаева қорытындылады. Ол көтерілген мәселелер Үкіметке ұсыныстар түрінде түсірілетініне сенім білдірді.
