Қызылорда облысының әкімі, облыстық Nur Otan партиясы филиалының төрағасы Қырымбек Көшербаевтың төрағалығымен өткен жиында Мемлекет басшысының сайлауалды бағдарламасынан туындайтын міндеттерді жүзеге асыруда партия алдындағы негізгі жұмыстар талқыға салынды.
Жиынға төрағалық еткен облыс әкімі алдымен Президент сайлауында қызылордалықтардың 81,6 пайызы сайлауға қатысып, 75,3 пайызы Президент Қасым-Жомарт Кемелұлы Тоқаевты қолдап дауыс бергендігін айтты. «Бұл – ауызбіршілігі мен ынтымағынан айнымаған Сыр халқының елдің болашағы үшін Тұңғыш Президент – Елбасының сарабдал саясатын жалғастырушы Қасым-Жомарт Кемелұлына артқан зор сенімі», деді Қ. Көшербаев.
Жиын барысында партияның облыстық филиалы төрағасының бірінші орынбасары Ақмарал Әлназарова атқарылған жұмыстармен қатар сайлау науқаны барысындағы ерекшеліктерге де тоқталып өтті.
Сондай-ақ ол Вirge акциясы аясында өңірде 32 мыңнан астам анкета жинақталғандығын айтты. Олардың 27591-і кандидатты қолдау хаттары болса, 4500-і ұсыныстар мен проблемалық мәселелер екен.
– Талдау нәтижесі көрсеткендей ұсыныстардың 15,7%-ы әлеуметтік кепілдіктерді қамтамасыз ету, 9,4%-ы білім, 7,0%-ы тұрғын үй және тұрғын үй-коммуналдық шаруашылығы және 5,1%-ы денсаулық сақтау жүйесіне қатысты. Өңірлік деңгейде жедел әрекет етуді талап еткендері сайлау науқаны барысында тиісті мекемелермен шешілді. Ал стратегиялық аймақтық және республикалық пакет мәселелері сарапталып тиісті органдарға жолданады, – деді А.Әлназарова.
Сыр өңірі Елбасының «Рухани жаңғыру» бағдарламасына алғашқы болып үн қосып, өз алдына орталық құрып, іргелі іс бастаған облыстардың қатарында. Бұл бағытта облыстық партия филиалы саяси кеңесінің мүшесі, «Сыр медиа» ЖШС директоры Аманжол Оңғарбаев өз ұсыныстарын ортаға салды.Оның айтуынша ұлттық рухты ояту, жаңғырту үшін алдымен атақоныс – ауылдың рухын көтеру керек.
Елдің әлеуметтік-экономикалық даму жолында 10 бағыттан тұратын Мемлекет басшысының тапсырмасын саяси кеңес мүшелері де бір ауыздан қолдады. Ондағы әрбір бағытқа жеке-жеке тоқталып, оны жүзеге асыру бағытындағы ұсыныстарымен бөлісті.
Мәселен, облыстық партия филиалы саяси кеңесінің мүшесі, облыстық партия филиалы жанындағы сыбайлас жемқорлыққа қарсы іс-қимыл жөніндегі қоғамдық кеңестің төрағасы Наурызбай Байқадамов Президенттің саяси тұғырнамасының негізгі бағыттарының басында қарастырылған сыбайлас жемқорлықты жою мәселесіне тоқталды.
– Сыбайластықпен күрес баршамызға міндет. Осы орайда Президент қыркүйек айына дейін жемқорлықты барынша төмендететін реформалар топтамасын дайындауды тапсырды. Өзіне тікелей бағынатын Сыбайлас жемқорлыққа қарсы іс-қимыл агенттігін құрып, нақты шаралар қолға алынып жатыр. Олардың қатарында бағыныштылары сыбайлас жемқорлыққа барған жағдайда бірінші басшылардың орнынан түсу институтын іске асыру тетігі қосылатынын айтты. Бұл біздің барлығымыздың әуелі өзіміз үшін жауапкершіліктерімізді арттыруды талап етеді, – деді Наурызбай Байқадамов.
– Бірден айта кетейін, Президент тапсырған бұл міндеттерді жүзеге асыруға біздің әлеуетіміз бен мүмкіндігіміз жетеді және оған қажетті алғышарттарымыз да бар.
Өздеріңізге белгілі, 2019 жылғы 7 ақпанда Тұңғыш Президент – Елбасы Нұрсұлтан Әбішұлы Назарбаевтың төрағалығымен өткен Қауіпсіздік кеңесінің қарауына өңірдің бірқатар өзекті проблемалық мәселелерін ұсынған болатынбыз. Кеңес отырысының нәтижесімен Қызылорда облысының әлеуметтік-экономикалық дамуының кешенді жоспары әзірленіп, Үкімет бұл қаулыны бекітіп, аймақтың дамуына келесі 3 жылға қосымша 219 млрд теңге қаржы бөлінді.
Қашанда Сыр еліне көңілі ерекше Елбасы бұл жолы да халықтың талап-тілегіне, біздің ұсынысымызға өз қолдауын білдірді, – деген облыс басшысы Қазақстанның Тұңғыш Президенті – Елбасы Нұрсұлтан Назарбаевқа аймаққа жасаған айрықша қамқорлығы үшін облыс жұртшылығы атынан шынайы алғыс білдірді және нәтижелі еңбекпен лайықты жауап беретіндіктеріне сендірді. Мемлекет басшысының 10 нақты бағытының облыста орындалуына мүмкіндік бар екендігін айтты.
Мысалы, 2018-2020 жылдар облыс әкімдігі мен мәслихат, Nur Otan партиясы филиалымен, қоғамдық кеңес және кәсіпкерлер палатасымен бірлесіп «Кәсіпкерлікті қолдаудың 3 жылдығы» деп жариялаған болатын.
Жаппай кәсіпкерлікті дамытуға биылғы жылы барлық қаржыландыру көздерінен 34 млрд теңге қаржы бөлініп отыр. Соның арқасында жаңа жұмыс орындары ашылады. Салықтық база дамып, жергілікті бюджет нығаяды, қоғамдық-саяси тұрақтылық орнығады.
Саяси Кеңес отырысында партияның облыстық филиалының төрағасы әрбір ұсынысқа ерекше мән беріп, тиісті орган басшыларына жұмысты жетілдіру бағытында нақты тапсырмалар берді.
Мемлекет басшысының тапсырмалары аймақта осылайша кезең-кезеңімен орындалып жатыр.
Қызылорда облысы
