Жабдықтар жаңарған, жағдай жасалған, енді талап та күшейеді

Бейсенбі, 14 ақпан 2013 7:45

Мемлекет басшысы Нұрсұлтан Назарбаев «Қазақстан-2050» Стратегиясы – қалыптасқан мемлекеттің жаңа саяси бағыты» атты Жол­дауында: «Біз құқық қорғау органдары мен арнайы қызметтердің реформасын жалғастыруға тиіспіз. Онсыз біз тәртіпсіздікке мүлдем төзбеуді қалыптастыру және жемқорлықты түбірімен жою жөніндегі міндеттерді шеше алмаймыз. Соңғы үш жылда құқық қорғау органдары мен арнайы қызметтердің бірқатар маңызды реформалары жүргізілді. Бұл – мемлекеттікті нығайтудың маңызды қадамы», деп қадап айтқаны белгілі.

Бейсенбі, 14 ақпан 2013 7:45

Мемлекет басшысы Нұрсұлтан Назарбаев «Қазақстан-2050» Стратегиясы – қалыптасқан мемлекеттің жаңа саяси бағыты» атты Жол­дауында: «Біз құқық қорғау органдары мен арнайы қызметтердің реформасын жалғастыруға тиіспіз. Онсыз біз тәртіпсіздікке мүлдем төзбеуді қалыптастыру және жемқорлықты түбірімен жою жөніндегі міндеттерді шеше алмаймыз. Соңғы үш жылда құқық қорғау органдары мен арнайы қызметтердің бірқатар маңызды реформалары жүргізілді. Бұл – мемлекеттікті нығайтудың маңызды қадамы», деп қадап айтқаны белгілі. Осыған байланысты құқық қорғау органдары жұмысының құқықтық базасы жақсартылды. Олардың атқаратын өзіндік функциялары нақты айқындалды. Қызметтің де қайталануы жойылды. Қылмысқа қатысты саясат ізгілендірілді. Сөйтіп, тәртіп одан әрі жақсара түссін деген ниетпен барлық құқықтық құрылымдардың қызметкерлері түгелдей аттестаттаудан өткізілді. 100 мыңнан астам адамнан 12,5 мың адам аттестаттаудан өтпей қалды және органдардан босатылды. Алайда, осыншама оңалту жұмыстары бірінен соң бірі жүргізілгенмен құқық қорғау органдарының жұмысында оң нәтиже аз.

Сондықтан да, Мемлекет басшысы Нұр­сұлтан Назарбаев құқық қорғау органдарының өткен жылғы жұмысын қорытындылаған және «Қазақстан-2050» Стратегиясын жүзеге асыру міндеттеріне арналған кеңесте еліміздің құқық қорғау органдарының қызметін қатты сынға алды. Бас Прокурордың баяндамасына сай сол кезде талай былықтың көзі ашылып, кейбір сақшылардың халықтың құқын қорғаудағы шынайы бет-пердесі сыпырылды. Сол кеңесте олардың тәртібін тезге салу, жаңаша жұмыс істеу керектігі баса айтылды. Мемлекет бас­шы­сы құқық қорғау жүйесін жетілдіру, құ­қық тәртібі мен заңдылықтарды бекіту бойынша бірқатар тапсырмалар берген болатын. Осыған орай Елбасының құқық қорғау органдарының басшылық құрамымен өткізген кеңесте айтылған нақты тапсырмасына сәйкес кеше Премьер-Министр Серік Ахметов Ішкі істер министрлігіне келіп, полицияның осы орайда атқарып жатқан жұмысымен танысты.

Саптық алаңға ІІМ көрсетуге тұрарлық түрлі техникалары шығарылып, тізіліп қойы­лыпты. Олар осылайша полиция қылмыс атаулыға қарсы күресте нақты тойтарыс бере алуы үшін барлық амалды қарастырып жатқандығын, соған орай қылмыскерлермен күресудегі жаңа техникалардың мүмкіндіктері зор екенін паш етсе керек. Үкімет басшысы Серік Ахметов аталған ведомствоның криминалистикалық қызметінің ғылыми-техникалық жарақталуымен, оны дамытуға арналған жаңа ғылыми-техникалық құрал-жабдықтармен қамтамасыз етілуімен танысып, инженерлік-саперлік және байланыс кешендерінің, жедел жоспарлау орталығының, шағын жылдамдық өлшеуіштер мен борттық компьютерлері бар автопатрульдердің жұмыс және техникалық жағдайын білді. Соны­мен қатар, Үкімет басшысы жылжымалы кри­миналистикалық зертхана ішін аралап көрді. Бұл жерде Үкімет басшысының назарына қыл­мыс жасалған орынды тексеруге арналған жорықтық шатырлар түрлері де ұсынылды.

Бұдан кейін Серік Ах­ме­тов жедел-крими­налис­ти­ка­лық қызметтің геномдық және физикалық-химиялық зерт­ха­надағы заманауи құрал­дар мүм­кіндігімен танысып, бал­лис­тикалық және трас­со­ло­гия­лық зертханалар мен крими­налистикалық полигонда болды. Жалпы, өткен 2012 жылы полицияның криминалистикалық қызметті жүзеге асыру бойынша бірқатар құзыреті кеңейтілгені мәлім. Соған орай ішкі істер органдарының криминалистері салыстырмалы түрде зерттеулер өндірісі құқығына ие болғандықтан, олар енді заттай дәлелдемелер тізбесіне енгізілген қорытындылар бере алады. Бұл ІІМ алдына алдын ала тергеу және жедел іздестіру іс-шараларын техникалық-крими­налистикалық қамтамасыз ету деңгейі мен тиімділігін арттыру бойынша жаңа міндеттер қояды.

Одан әрі Премьер-Ми­­нис­тр С.Ахметов же­дел-кри­мина­лис­ти­калық қызмет құра­мындағы геномдық және физикалық-хи­­миялық зертханада болды. Био­логиялық, генетикалық зерт­­теу­лер жүргізетін зертхана био­ло­гиялық тізбе және ДНК-ның генетикалық талдауларын жасау бойынша кешенді аппаратты қоса есептегенде, соңғы үлгідегі жаңа құралдармен жабдықталған. Физикалық-химиялық зертхана химиялық құрамды сәйкестендіру және үлгілерді салыстырмалы зерттеу үшін материалдарға кешенді талдау жасауға мүмкіндік береді.

Полицияның крими­на­лис­тикалық бөлімшелерін жарақ­тан­дыру үшін былтыр оқиға орнында жұмыс істейтін үш өлшемдік үлгісіндегі кешендер және іздестіру баллистикалық кешендері алынды. Одан басқа, ІІМ-де аумақтық бөлімшелердегі крими­на­листерді оқыту мен біліктілігін арттыру үшін арнайы база, қазіргі заманғы крими­на­листикалық полигон, қажетті криминалистикалық техникалар және әдістемелік құралдармен қам­тылған оқу сыныптары құрылды.

Бұл орайда, ІІМ Ішкі әскерлерінің Бас қолбасшысы Руслан Жақ­сы­лықов бүгінде ішкі істер орган­дарының қызметі айтарлықтай жақсарып, Үкімет қолдауының арқасында жыл сайын ішкі әскердің материалдық-техникалық базасы нығайып келе жатқандығын айтты. Еліміздің қауіпсіздігі үшін қызмет ететін тиісті барлық құрылымдар қажетінше жарақтандырылған. Соның арқасында кейінгі арнайы жүргізілген операциялардың бар­лы­ғы шығынсыз өтуде. Себебі, Үкімет басшысының назарына ұсынылғандай, әскери қызметшілер өз міндетін сапалы орындауға мүмкіндік беретін бүкіл қажетті жабдықтармен қамтамасыз етілген. Ендеше, Ішкі істер министрлігінің жоғарыдағы кеңесте айтылған бар­лық кемшіліктерді жойып, халыққа талапқа сай қызмет көрсете алуына толық жағдай жасалған деу­ге негіз бар.

Александр ТАСБОЛАТОВ,

«Егемен Қазақстан».