Арақ ішіп алжасқандар
Бейсенбі, 7 наурыз 2013 7:14
Судьялық қызметте жүргеніме 17 жылдай уақыт болды. Осы жылдарда ішімдік ішіп алып немесе нашақорлықтың әсерінен қылмыс жасаған адамдардың ісін көп қарадым. Сол қылмыстық істерді саралап отырсам, арақ ішетін азаматтар үшін оның қаупі есірткінің кесапатынан алыс емес екен. «Арақ тек құмыраның ішіне ғана сияды» – деген сөздің өмірден алынғанына көз жетті. Жайшылықта қойдан жуас азаматтардың ішімдік ішіп алғаннан кейін мүлдем өзгеріп шыға келетінін қайтерсің. Қылмыс жасап бүлдірген соң, ертеңіне сотта «Неге ғана іштім осы пәлені?» деп бармағын тістегендер қаншама.
Бейсенбі, 7 наурыз 2013 7:14
Судьялық қызметте жүргеніме 17 жылдай уақыт болды. Осы жылдарда ішімдік ішіп алып немесе нашақорлықтың әсерінен қылмыс жасаған адамдардың ісін көп қарадым. Сол қылмыстық істерді саралап отырсам, арақ ішетін азаматтар үшін оның қаупі есірткінің кесапатынан алыс емес екен. «Арақ тек құмыраның ішіне ғана сияды» – деген сөздің өмірден алынғанына көз жетті. Жайшылықта қойдан жуас азаматтардың ішімдік ішіп алғаннан кейін мүлдем өзгеріп шыға келетінін қайтерсің. Қылмыс жасап бүлдірген соң, ертеңіне сотта «Неге ғана іштім осы пәлені?» деп бармағын тістегендер қаншама. Өкінішке орай, ішімдіктен кейін өзін-өзі дұрыс ұстай алмағандар, тек өздерінің ғана тағдырын балталамай өзге жандарды да жылататыны тағы анық.
Алматы облысы, Алакөл № 2 аудандық соты былтырғы жылы А.Мұрзабаевқа қатысты ҚК-нің 103-бабы, 3-тармағымен тағайындалған қылмыстық істі қарады. Сот тергеуінде анықталғандай, А.Мұрзабаев 2011 жылдың қазан айының 29-нан 30-на қараған түні сағат 23:30 шамасында арақ ішіп мас күйінде Алакөл ауданына қарасты Тоқжайлау ауылының тұрғыны Д.Омаровпен, П.Шакаримовпен бірге, осы ауылдың Куйбышев көшесі №18 үй тұрғыны Н.Айтқұловтың үйіне барып, өздерімен алып келген бір шөлмек арақты ішіп отырған кезде П.Шакаримов үйден шығып кетіп қалған. Одан кейін Д.Омаров та далаға шығып кеткен. Сол кезде Н.Айтқұловтың «үйден кет» деген сөзіне шыдамай А.Мұрзабаев оның басынан жұдырықпен ұрған. Соққыға шыдамай жерге құлаған Н.Айтқұловты оны басынан, кеудесінен тепкілеп жатқан кезде сырттан Д.Омаров келіп қалып арашалап алып, үйлеріне қайтып кеткен. Н.Айтқұлов сол дене жарақаттарынан 2011 жылы 2 қарашада қайтыс болған.
2012 жылғы 10 қаңтардағы сот-дәрігерлік сараптаманың қорытындысы бойынша жәбірленуші Н.Айтқұловтың өлімі жабық түрде ми сүйегі жарылуынан миына қан құйылып, миының ісінуінен болған.
Осы қылмысы үшін А.Мұрзабаев 8 жылға бас бостандығынан айырылды. Қайтыс болған Н.Айтқұловтың туысқандары бір жақтан жыласа, екінші жақтан А.Мұрзабаевтың туысқандары да жылап қалды. Егер А.Мұрзабаев арақ ішкеннен кейін өзін-өзі дұрыс ұстап, іс әрекетіне жауап бере алған болса немесе мүлдем арақ ішпесе осындай қанды оқиғаның болмасы анық еді. Ол өзінің әкесімен жасты адамды өлтірмес еді.
Өз үйінде, мас күйінде бөтен біреуді емес, өзінің туған әкесін таяққа жығып, ауыр дене жарақатын салып, соның салдарынан оны өлтіріп алған В.Гладилов деген азаматтың ісі де осы сотпен қаралып, тиісті шешімін тапты. Туған әкесімен бірге арақ ішіп отырып сөзге келіп қалып, соның салдарынан әкесін ұрған. Ертесі күні есін жиғаннан кейін, екі көзі қан аралас жасқа толды. Осы ісі үшін сотталып кеткен В.Гладилов аман-есен болса жазасын өтеп шығар, бірақ өзекті өртеген өкініштің ұмытылмасы анық.
Осы мақаланы жазып отырғанда, Әкімшілік құқық бұзушылық туралы кодекстің 79-5-бабының 1-тармағымен іс қарадым. Істің мән-жайы бойынша Қ. есімді қыз бала өзінің әкесіне қарсы арызданған. Себебі, ол күнде араққа тойып келіп, үйдегі адамдардың бәрін балағаттап, есік-терезелерді сындырып маза бермеген. Сот отырысында өзінің қолын өзі кесе алмаған Қ. амалдың жоғынан әкесін кешіріп, оған ешқандай шара қолданбауды сұрады. Ал жасы егде тартқан құқық бұзушы болса, айтар уәжі жоқ аппақ басын төмен қаратып тұрды.
Бақытжан НИЯЗОВ,
Алакөл аудандық
№2 сотының төрағасы.
Алматы облысы.
