Қазір облыс әкімінің орынбасары Сергей Карплюк бастаған топ Арыс қаласында жүр. Құрамында құрылыс, техникалық зерттеу ұйымдарының мамандары бар топ жөнделетін үйлерді көріп, тізімге алып, олардың қаншалықты зақымданғанын, қандай жұмыстар жүргізілетінін, қажетті құрылыс материалдарының көлемін анықтайды. Соған сәйкес керекті қаржы көлемі анықталып, көп ұзатпай жұмысты бастап кету мақсаты қойылды.
– Жөндеу, қалпына келтіру жұмыстары Қостанай облысына бекітілген 450 үйдің жартысы көп қабатты, жартысы жеке сектордағы тұрғын үйлер. Олардың зақымдануы да әртүрлі дәрежеде екені белгілі. Үйлердің қаншалықты бүлінгенін, оларға жұмсалатын құрылыс материалдарының, атқарылар жұмыстың көлемін Арыста жүрген біздің 8 адамнан тұратын мамандар тобы жете зерттеп, анықтап келеді. Олардың жұмысының қорытындысы мен тұжырымына сәйкес қаржы көлемі есептеледі. Біз оған негізінен жиналған қаржыдан жұмсайтын боламыз. Ал жетпей жатқанда ғана бюджеттік резервтен қарастырамыз. Сондай-ақ мен бір-екі күн бұрын Қазақстан халқы Ассамблеясының облыстық сессиясында этномәдени бірлестіктердің төрағаларына осы жағдайды жеткіздім. Ірі, орта, шағын бизнес өкілдерімен кездесу өткіздім. Барлығы зардап шеккен отбасыларға гуманитарлық көмек көрсетуге, олардың тұрғын үйлерін қалпына келтіруге көмектесуге дайын екендерін білдірді, – деді А.Мұхамбетов.
Мамандар зерттеуінен кейін үйлерді қалпына келтіру жұмыстарының қалай тиімді жүргізілетіні де шешімін табады. Өңір басшысы айтқандай, мердігер компаниялар, құрылысшылар, жұмыс күші жергілікті жерден қарастырылатын болса, Қостанай облысы 450 үйдің қалпына келтіру шығынын төлеп, құрылысшылар мен мамандар жібермеу нұсқасы да қарастырылады.
Күнгейдегі бауырларымыз айтып келмеген апаттан зардап шегіп, бала-шаға шулап жатқанда Тобыл өңіріндегі ағайынның арқасын аяз қарығандай болды. Апат болған күні-ақ Арыс тұрғындарына көмек жұмыстарын орталықтандыру үшін жетекші партия облыстық филиалының төрағасы ретінде облыс әкімінің басшылығымен штаб құрылды. Оның құрамында Василий Розинов, Игорь Ким, Қайрат Маишев сияқты облысқа белгілі кәсіпкерлер мен қоғамдық пікір көшбасшылары бар. Апаттың алғашқы күні-ақ бір күндік жалақысын аудару бастамасын облыстағы көптеген мекеме мен мемлекеттік емес құрылымдар қызметкерлері, кәсіподақ ұйымдары қолдады. Тек мемлекеттік органдардың қызметкерлері зардап шеккендерге 20 млн теңгеден астам қаржы аударды.
– «Қарасу-Астық» ЖШС директоры, Қазақстанның Еңбек Ері Алмат Тұрсынов және оның ұжымы 3,5 млн теңге, «БК-Строй» ЖШС директоры Игорь Кимнің ұжымы 2 млн теңге, «Милх» ЖШС бас директоры Сергей Блоктың өзі 1 млн теңге аударды, – деді өңір басшысы Архимед Мұхамбетов.
Түркістан облысына 20 тонна бірінші сұрыпты ұн, 7 тонна макарон, 3 тонна кондитер өнімдері жеткізілді. Облыстың кәсіподақ орталығы «Сәби» гуманитарлық акциясының аясында 1 жасқа дейінгі балаларға қостанайлықтардан жөргектер, балалар тағамы, гигиеналық сулықтар секілді бірінші қажетті заттарды жинауды ұйымдастырды. Алғашқы жүк апаттан кейін бір тәулікке жетпейтін уақытта жиналып, керуен жөнелтілген еді. Екінші жүк керуені де жолға шығады.
Облыс әкімі Архимед Мұхамбетов журналистер үшін өткізген брифингте Тобыл-Торғай өңірінің жұртшылығын, кәсіпкерлерін отандастардың басына түскен қиындықты бірге көтеруге, оған салғырт қарамауға, қолдан келгенше қайырымдылық көмегін беруге шақырды.
ҚОСТАНАЙ
