Әулиеата топырағында дүниеге келіп, Алматы көркемсурет училищесін, одан В.Суриков атындағы Мәскеудің бұрынғы мемлекеттік академиялық көркемсурет институтын тәмамдаған талант иесі өзінің өзгеше әлемі арқылы көркемдік кеңістікті байытты. Қылқалам шеберінің «Қорқыттың үш бұлағы», «Бабалар рухы», «Үш грация», «Томирис», «Түнгі жолаушы», «Аралды аңсау» атты туындылары қазақ көркемсурет өнерінің озық үлгілерінің бірі деуге болады. Талант иесінің өнер туындылары Қазақстан Республикасының Тұңғыш Президенті Нұрсұлтан Назарбаев, Мәскеу мэрі Юрий Лужков сынды саяси қайраткерлердің де жеке коллекциясында сақтаулы тұр. Ал Аманат Назарқұлдың «Заратуштра», «Таудағы қыз», «Тәңірі», «Құс» сияқты туындыларының өзін талант табиғилығын, қиял құдіретін көрсететін дүниелер деуге болады.
Жалпы, шынайы таланттың бойындағы батылдықтың өзі әуелі ұлтының барын бағалап, тарихын, жоғын түгендеуден басталады. Әйтпесе құрғақ қиялдың, арзымас арманның болашағы бұлыңғыр, тағдыры солқылдақ болмақ. Аманат Назарқұлдың шығармашылығы орындалу стилі жағынан бөлек, айтар ойы жағынан батыл. Өзінің қаламын ішкі және сыртқы дүниемен тең байланыстыратын, табиғи талантына қоса тәуекелі арқылы дүниенің төрт құбыласын бірдей көретін қуатқа ие. Сондықтан да оның шығармашылығының негізгі өзегі түпсіз қиял емес, бабалар рухын қайта жаңғыртуға бет алған батыл көзқарастың иесі ретінде көрінеді.
Аманат Назарқұлдың шығармашылығы әрдайым халықтың назарында деуге болады. Ол әр жылдары республикалық және халықаралық көрмелерге қатысып, жүлделі орындарға ие болған суретші ретінде белгілі. Ал 2001 жылы Астана қаласында жаңадан ашылған Қазіргі заман музейінде, 2002 жылы Қазақстан Республикасының Президенті Мәдениет орталығында жеке көрмелер өткізіп, шығармалары халықтың шынайы ықыласына ие болды. Биыл асқаралы алпыстың белесіне көтеріліп отырған Аманат Назарқұл өзі дүниеге келген Тараз топырағына арнайы келіп, шығармашылық есеп берді. Жуырда Жамбыл облыстық мәдениет, архивтер және құжаттама басқармасының ұйымдастыруымен облыстық көрме залында Елбасы Нұрсұлтан Назарбаевтың «Болашаққа бағдар: рухани жаңғыру», «Ұлы даланың жеті қыры» атты мақалалары және «Туған жерге туыңды тік!» акциясы аясында белгілі суретші-монументалист, Қазақстан Суретшілер одағының мүшесі Аманат Назарқұлдың «Күн Шығыстан» атты жеке шығармашылық көрме кеші өтті. Жиынға Әулиеата өңіріне белгілі суретшілермен қатар, өнерсүйер қауым да көптеп қатысып, талант туындыларына ризашылықтарын білдірді.
Көрмеге суретшінің қырыққа тарта графикалық жұмыстары және майлы бояумен жасалған «Күн Шығыстан», «Кентавр сұлуымен», «Катарсис» сияқты, сонымен қатар басқа да монументальды туындылары қойылып, көптің қызығушылығын тудырды. Көрме атауының өзінің сөреге қойылған туындылар секілді ерекшеленіп тұрғанын айта кету керек. Бұл ретте Аманат Назарқұлдың да өз айтары бар. Жалпы, ғаламдық деңгейдегі алыптардың тіршілік туралы философиясы Күннің Шығыстан шығатынын дәлелдеуге құрылған. Яғни, дүниеге таралатын нұр атаулы шығыстан басталады.
Талант иесінің тағдыры, жалпы шығармашылық жолы кімді де болсын қызықтырмай қоймайды. Мәселен, сурет салу ала қағазды шимайлау емес, керісінше бекзат өнер екенін ұғындыруда Аманат Назарқұлдың ұстанған ұстанымы бөлек. Ол бізбен сұхбатында барлық өнердің балалықпен байланысты екенін айтты. «Менің суретшілік қасиетім ерте оянды. Ес білген сәтімнен бастап мені сурет өнері өзіне баурап алды. Суретті бес жасымнан бастап сала бастадым. Әйтпесе маған суретші болу үшін ешкім де бағыт берген емес. Әлі есімде, үшінші класта оқып жүргенімде ағам Талғат өскенде кім болатынымды сұрағанда, суретші болатынымды айтып жауап бергенмін. Алғаш рет көпфигуралы «Амангелді Имановтың қазақ халқын көтеріліске шақыруы», «Майданға» деген композиция салдым. Сонымен қатар, бала күнімнен жылқының суретін салуға құштар болдым. Сөйтіп арада жылдар өтіп, арман алға жетеледі. Алматы, Мәскеу сияқты ірі қалаларда білім алуға мүмкіндік туды. Түрлі тақырыпта сурет салдық. Ал бүгінгі көрмеге кейінгі үш жылда салған туындыларым қойылды. Мұнда көне түркі тарихына қатысты көптеген дүниелер бар. Тарих тұлғалар арқылы жасалады. Мәселен, әл-Фараби, Еділ батыр, Қорқыт, Сұлтан Бейбарыс сияқты ұлы тұлғалар біздің тарихымыз. Тарихымызды, сонымен қатар тарихи тұлғаларымызды кейінгі ұрпаққа таныту мақсатында бірқатар жұмыстар жасадым. Енді осындай циклдар бойынша тағы да көптеген жұмыстар атқару жоспарда бар», дейді Аманат Назарқұл.
Қашанда туған жеріне ту тіккен, дүниеге келген жерін жұмақ санайтын азаматтың абыройы да асқақ болмақ. Ал, туған топыраққа еткен еңбек, ол үшін төккен тер заманалар мен дәуірлердің алдында да ерлік болып қала бермек. Суретші Аманат Назарқұлды көпшілік мүсінші ретінде де жақсы біледі. Бұл тұрғыда оның қолтаңбасы Тараз қаласында да қалыптасқан. Көне шаһарда Аманат Назарқұлдың авторлығымен 2013 жылы қоладан Төле би ескерткіші тұрғызылды. Еңселі ескерткіштің ашылу рәсіміне тараздық жұртшылықпен бірге Елбасы Нұрсұлтан Назарбаев та қатысқан болатын. Сонымен қатар 2016 жылы Тараз қаласында Қазақстан Республикасы Тәуелсіздігінің 25 жылдығына орай «Гүлденген Қазақстан» атты архитектуралық мемориал ашылды. Бүгінде бұл нысандардың бәрі де Тараз қаласының сәулеттік келбетін арттырып тұрған туындылар қатарында.
Аманат Назарқұл әрбір туындысында қазақ халқының тарихын, мәдениетін, салты мен дәстүрін дәріптеп жүрген суретші. Ұлттың ұлы көшін заманауи өнер түрінде халыққа ұсынған қайраткер. Мәселен, ол студент кезінде әйгілі жазушы Шыңғыс Айтматовтың шығармаларын ерекше жақсы көріп оқығанын, кейін қаламгердің өзімен дидарласып, араласқанын айтады. Жылдар өткен сайын жазушының тұлғалық болмысы суретшінің көңіл түкпірінде ірілене түскен. Өзі де «Ақ шаршы» картинасында дүниені Айтматов дүниетанымы тұрғысынан бағамдап, бүгінгі заманауи ғылым мен кешегі өткен тарихтың аражігін өзінше көркем бейнелегісі келгенін әңгімелейді. Сонымен қатар «Дала мұңы» графикалық композициясында ұлы даламыздың көркі мен киесі болып саналған киік жануарының тағдырын бейнелейді. Сол арқылы өмір мен өнердің түрлі құбылыстарын өзара қабыстыруға әрекет жасайды.
Сурет өнері шексіз мүмкіндіктерді көрсететін көркем әлем. Мұнда ең әуелі тағдыр бар. Ал тағдырдың қай кезде де тура жолды таңдайтыны белгілі. Өнердің бекзат рухы өмірдің өзіндей шынайылықты талап етеді. Қылқалам иесінің қайталанбас қолтаңбасы ұлттың ұлы тарихына қосылған еңбек болып қала бермек. Шебердің қолынан шыққан шығарманың да шындығы мол, ақиқаты айқын, мақсаты биік болмақ. Ғалам мен адамның тағдыры жайлы парасат биігінен көз салған суретшінің сыйы оның туындыларында тұнып тұр.
Жамбыл облысхамихы
