Лагерьдің Халықаралық балаларды қорғау күнімен тұспа-тұс өткен ашылу салтанатында оқушылардың қатысуымен «Жайдары жаз бізбен бірге!» атты концерт қойылған еді. Мектептің мақтаныштары «Гәкку» бишілер тобының мүшелері арнайы «Шашу» биімен ашып, хип-хоп жанрындағы заманауи би билеп, балалар ән айтып, өз өнерлерін ортаға салды. Лагерь үш ауысымда білікті педагогтар А.Сатыпалды, Г.Ұзақбаева, Ш.Садуова жетекшілік ететін «Шапағат», «Балдәурен» және «Еркем-ай» атты топтар күн сайын үш ауысыммен жұмыс істеді. Әр ауысымда 20 баладан – барлығы 60 бала қамтылды.
Қажымұқан ауылының балалары елордамыз Нұр-Сұлтанға да саяхат жасады. «Хан Шатырдың» ішінде орналасқан кинотеатрында «Болашақ» қауымдастығы мемлекеттік тілге дубляж жасаған «Аладдин» фильмін тамашалады. Қаланың көрнекті жерлерін аралады.
Балдырғандардың қызығушылықтары бойынша құрылған Д.Иманбаеваның «Happy summer» ағылшын үйірмесі мен З.Китебаева, Ш.Садуова жетекшілік жасайтын «Сәлем» тіл үйірмелері үшін арнайы «Ойнайық та, ойлайық!» деген атаумен оқу бөлмесі жабдықталды. Оған қоса «Спорт KZ» үйірмесі құрылды. Топ жетекшілері әр күнге «Балмұздақ күні», «Қалпақтар күні», «Қолшатыр күні», «Достық күні», «Көбелектер күні», «Гүлдер күні», тағы басқа да атау қойып, балаларды қызықтырумен қатар, сол күннің тарихымен де таныстырды.
Мемлекеттік қызметшілер күніне орай ұйымдастырылған аудандық деңгейде ұйымдастырылған «Полиция – балалар көзімен!» сурет байқауында Хамит Бекарыс 2-орынды иеленіп, Ақмолда мерекеге орай ұйымдастырылған салтанатты іс-шарада марапатталды.
«Ойын ойнап, ән салмай, өсер бала болар ма?» дегендей, қызық-думанға толы жазғы лагерь өз жұмысын қорытындылап, «Қимай қоштасамыз!» деген атаумен жабылу рәсімін өткізді. Бұл күні де балалар бір айда үйренген өнерлерін ортаға салды. Ағылшын, орыс тілдерінде тақпақ айтып, ән шырқады, би биледі. Осы орайда лагеріміздің жабылуында демеушілік еткен ауыл тұрғындарын ерекше атап өткен жөн. «Қажымұқан», «Мұрат», «Ләйлә» дүкендері балаларға түрлі тәтті, дәмділерін ұсынса, ауылшаруашылық фермасы да өз өнімдерін ұсынды. «Қуантсаң, баланы қуант», «Жақсылықты балаға жаса» деген қағиданы ұстанған кәсіпкерлерге мектеп ұжымы да, ата-аналар да дән риза!
Лағыл САМАРҚАНҚЫЗЫ,
№4 мектеп лагерінің жетекшісі
