Бүгінгі кеште біз домбыра тартпадық. Көрермендермен бірге Мемлекет басшысының қасында отырып, орындаушылардың өнерін сырттай тамашаладық. Былтыр Домбыра күнін алғаш тойлағанда еліміздің түкпір-түкпірінен барлық кәсіби домбырашылар келіп, жаппай атсалысқан болатынбыз. Тек елорда төрінің өзінде 2000 домбырашы бір мезетте «Көңілашармен» күйден шашу шашқанда шаттанбаған қазақ қалмаған шығар. Ұлтымыздың рухы көтерілгендей бір жасап, серпіліп қалып едік сонда. Биылғы домбыра думанының ерекшелігі де сол – осы жолы тек кәсіби домбырашылар ғана емес, әуесқой орындаушылар да өнер көрсетті. Сондықтан да мен үшін бүгінгі мереке тіпті қызық болды. Елбасымыздың сарабдал шешімінің арқасында бекітілген жалпыұлттық Домбыра думаны – күллі қазақтың рухын көтеріп, бірлігін нығайтатын ұлық мейрам десем, артық айтқандық емес. Ендеше, рухымыз асқақтап, ынтымағымыз жараса берсін!
Айгүл ҮЛКЕНБАЕВА,
Қазақстанның еңбек сіңірген әртісі, күйші
