Транзиттік тасымал өңірді өркендетеді
Сәрсенбі, 9 қаңтар 2013 7:36
Маңғыстауда Елбасы Н.Назарбаевтың «Қазақстан-2050» Стратегиясы – қалыптасқан мемлекеттің жаңа саяси бағыты» атты Жолдауын талқылау облыс әкімдігінен бастау алды.
«Елімізді дамытудың 2030 жылға дейінгі бағдарламасын дер кезінде қабылдау біздің еліміз үшін маңызды оқиға болды. Елбасы мемлекеттің, қоғамның және экономиканың қазақстандық үлгісін анықтап берді. Біз бүгін аталмыш стратегиялық бағдарламаның көп межелер бойынша мезгілінен бұрын іске асырылғандығына куә болып отырмыз», деген облыс әкімі Б.Мұхаметжанов облыстың экономикалық-әлеуметтік даму ахуалына тоқталып, мемлекетіміздің 2050 жылға дейінгі даму бағытын бағамдап, экономикасы мен жалпыға ортақ еңбек мүмкіндіктері дамыған зайырлы қоғам құруды мақсат еткен жаңа бағдарлама жайлы баяндады.
Сәрсенбі, 9 қаңтар 2013 7:36
Маңғыстауда Елбасы Н.Назарбаевтың «Қазақстан-2050» Стратегиясы – қалыптасқан мемлекеттің жаңа саяси бағыты» атты Жолдауын талқылау облыс әкімдігінен бастау алды.
«Елімізді дамытудың 2030 жылға дейінгі бағдарламасын дер кезінде қабылдау біздің еліміз үшін маңызды оқиға болды. Елбасы мемлекеттің, қоғамның және экономиканың қазақстандық үлгісін анықтап берді. Біз бүгін аталмыш стратегиялық бағдарламаның көп межелер бойынша мезгілінен бұрын іске асырылғандығына куә болып отырмыз», деген облыс әкімі Б.Мұхаметжанов облыстың экономикалық-әлеуметтік даму ахуалына тоқталып, мемлекетіміздің 2050 жылға дейінгі даму бағытын бағамдап, экономикасы мен жалпыға ортақ еңбек мүмкіндіктері дамыған зайырлы қоғам құруды мақсат еткен жаңа бағдарлама жайлы баяндады.
Қазақстан – бір ағза секілді біртұтас ел болғандықтан, оның әр бұрышындағы ахуалдың күллі ел үшін маңызы зор. Сондықтан, Жолдауда айтылған әрбір тапсырма, міндет, тіпті сын-қатерге дейін жұрт болып жұмыла жұмыстанатын жайттер. Әйтсе де, 10 сын-қатердің бірі – су тапшылығы Маңғыстау облысындағы ең өзекті мәселенің бірі. Аймақта бұл бағытта жүргізіліп жатқан жұмыстар Жолдау аясында арнасын кеңейтіп, өз жалғасын таба бермек. Шетелдерден қоныс аударған ағайындар есебінен тұрғындар саны күрт өсіп келе жатқан облыста, әсіресе, көлік инфрақұрылымы дамуда. Бағзыдан тоғыз жолдың торабы ретінде танымал өңірде, бүгінгі заман талабына сай, тәуелсіз Қазақстанның экономикасына қызмет ететін құрлық және теңіз жолдары қатынастары жолға қойылуда. «Өзен-Түркіменстанмен мемлекеттік шекара» темір жолы құрылысы аяқталып, «Жезқазған-Бейнеу» темір жол құрылысының басталуы, «Атырау-Ақтау» автомобиль жолы қайта жаңғыртыла бастауы, сондай-ақ Құрық теңіз портын балама дамыту және «Кендірлі» туристік курортты аймағын құру, Ақтау халықаралық теңіз-сауда порты, Баутин және Сартас теңіз операцияларын қолдау базасы, Құрық паромдық кешені жобаларының қолға алынуы мұнайлы Маңғыстау даласының инфрақұрылымдық жұмыстар алаңына айналғандығының айғағы.
Облыс әкімі аймақта Жолдаудан туындайтын және таяу болашақта жүзеге асырылатын 2013 жылғы жұмыс жоспарларының өзектілігін арттыру, бюджеттің басымдылығын қайта қарау, инфрақұрылымдық жобаларды жүзеге асыруды жеделдету, геологиялық барлау жұмыстарын жандандыру, балама энергия түрлері өндірісін дамыту, аймаққа инвестиция тарту, агроөнеркәсіпті кешенді дамыту, мемлекеттік және салалық бағдарламалардың тиімді жүзеге асырылуы секілді бірқатар міндеттерді атап көрсетті.
Жолдауда «Жаһандық инфрақұрылымдық интеграция» және транзиттік әлеуетті дамыту қажеттігі айтылды. Бұл – қарт Каспий жағасындағы аймақтағы атқарылатын жұмыстар маңыздылығын арттыра түсті. Елімізде Алматы, Ақтөбе, Шымкент, Тасқала-Озинки, Қорғас сынды көлік-логистикалық орталықтар құру жобасы жүзеге асырылып жатқаны белгілі. Қорғас халықаралық шекара ынтымақтастығы орталығы, Достық шекара темір жол стансасы және Ақтау халықаралық теңіз-сауда порты кіретін көлік хабын құру – Ақтау арқылы Оңтүстік-Шығыс Азия мен Қытайдан транзиттік тасымалдарды дамытуға жол ашады.
Жиында сөз алған облыс әкімі жанындағы ардагерлер кеңесінің төрағасы Ө.Озғанбаев, Ақтау халықаралық теңіз-сауда порты РМК директоры Б.Уандықов Жолдаудың Маңғыстауда жасалып жатқан жұмыстарға тың серпін беретіндігін айтты.
Жолдауды талқылау жиындары аудан, қалалар мен оқу орындарында жалғасуда.
Гүлайым ШЫНТЕМІРҚЫЗЫ,
«Егемен Қазақстан».
Маңғыстау.
