«Ютария» тігін фабрикасының базасында тігін шеберлігін үйреніп, оқу аяғында кәсіп үйренушілерге шебер сертификатымен қоса жұмыс бастау үшін тігін машинасы салтанатты түрде табыс етілді. Жиында сөз алған Nur Otan партиясының хатшысы Әлібек Әлденей қазақ қоғамында аналардың алар орны ерекше екенін атап өтті. «Тарихты парақтасақ, небір сындарлы жылдарда бойы нәзік болғанымен, жаны қайсар қауымның арқасында өз болмысымызды сақтап қалдық. Бұл сөзімді белгілі демограф-ғалым Мақаш Тәтімов ағамыздың Екінші дүниежүзілік соғыстан кейінгі халықтың қайта еңсесін көтеруіне әйелдердің қосқан үлесі туралы айтқан тұшымды деректері дәлел бола алады. Сол ерік-жігері мықты аналарымыздың жалғасы – сіздерсіздер», дей келе, осы сәтті пайдаланып бір белесті бағындырып отырған нәзік жандарға алғыс айтты.
«Ютария» тігін фабрикасы бас директорының орынбасары Динара Закиева қосымша білім алғандардың әрқайсысы енді үйде отырып-ақ табыс табуға дайын, өзінің жеке тігін құралы бар маман болып шыққанын жеткізді. Олардың басым бөлігіне аталған фабрикада жұмыс істеуге ұсыныс та түскен көрінеді.
«Жәрдем» бағдарламасы жалпы республикалық деңгейде жүзеге асуда. Аталған жобада 1500-3000 адамға қосымша білім беру көзделген. «Ал біз оқыту курсымызды Қазақстан әйелдер қауымдастығымен бірлесіп қолға алдық. Бұл жолы бізде елордалық 20 адам оқыды. Жыл аяғына дейін олардың санын 600-ге жеткізуді жоспарлап отырмыз. Олар аз ғана уақыттың ішінде өнімді өздері өндіре алатындай дәрежеде меңгерді. Бірі белдемше, енді бірі көйлек немесе шалбар тіге алады. Бұдан кейінгі өзін-өзі дамытуы үйренушілердің мақсаты мен табандылығына байланысты», дейді Д.Закиева. Фабрика өкілінің мәлімдеуінше, оқу курсынан өткендерге соңғы күні «Атамекен» кәсіпкерлер палатасының өкілдерін шақырып, қалай кәсіп бастауға болатыны туралы базалық білім берілген.
Тігін курсын бітірген көп балалы ана Индира Абайқызы өз кәсібін дөңгелетуге дайын екенін айтады. «Бұл жоба жөнінде партиядан естіп келдім. Негізі тігін тігуді білмейтінмін, енді үйрендім. Әрине, екі апталық оқу жеткіліксіз, сондықтан Жұмыспен қамту орталығының қосымша мамандық беретін тігін курсынан өтуді бастап кеттім. Онда енді осы фабрикадан алған білімімді жетілдіріп, киімді толығымен, қалай сәнді етіп тігуге болатынын үйренемін», дейді болашағына сенімді ана. Оның айтуынша, «Жәрдем» берген тігін машинасы – бизнеске бастау болары анық.
Айта кетейік, аталған бағдарлама ниеттілердің өтінішіне сәйкес барлық облыстарда жүзеге асырылып жатыр.
