Инвестициялық ахуалды жақсарту қажет
Үкімет басшысы халықтың әл-ауқатын және жалпы экономиканы жақсартуға бағытталған Президенттің тапсырмаларын еске сала отырып, Министрлер кабинетінің қазіргі міндеті – халықтың өмір сүру сапасын жақсарту және табысын арттыру, жаңа жұмыс орындарын ашу және жаңа инвестициялар тарту екенін атап өтті.
«Барлық мемлекеттік органдар, ұлттық холдингтер мен әкімдіктер инвестицияларды тарту бойынша жұмысты белсенді түрде жүргізулері тиіс. Осы жұмысты бақылау үшін әрбір мемлекеттік органға, холдингке және әкімдікке өзекті тиімділік көрсеткіштері белгіленеді. Үкімет жаңа тиімді жұмыс орындарын құрып, экономиканың басым секторларында өндірісті әртараптандыруды, озық технологияларды енгізіп, экспортты кеңейтуі қажет. Осы ретте мемлекет тарапынан қажетті қолдау шаралары қабылданып, инвестициялық ахуалды жақсарту керек», деді Премьер-Министр.
«Әлеуметтік саланы дамыту мақсатында бірқатар нақты шаралар қолға алынады. Соның ішінде, мұқтаж адамдарға әлеуметтік қолдау көрсетудің нақты және ашық рәсімдері белгіленеді, әлеуметтік қолдаудың кепілді көлемін көрсетудің бірыңғай тәсілдері жасалады. Білім беру саласында білім мен ғылымды толық қаржыландыруды қамтамасыз етудің іс-қимыл жоспары әзірленеді, мектепті және кәсіптік-техникалық білім беруді одан әрі реформалау жұмысы жалғасады», деді Үкімет басшысы.
Бюджет қаражаты үнемделеді
Премьер-Министрдің бірінші орынбасары – Қаржы министрі Ә.Смайылов бюджетті жан-жақты үнемдеу мәселесіне кеңінен тоқталды. «Тамызда жалпы сипаттағы трансферттерді есептеу әдістемесіне өзгерістер енгізіледі. 2020-2022 жылдарға арналған жалпы сипаттағы трансферттер 2020 жылдың 1 қаңтарынан бастап корпоративтік табыс салығын шағын және орта бизнестен жергілікті бюджеттерге беруді ескере отырып, айқындалатын болады. Биыл қазан айында квазимемлекеттік секторға бөлінетін қаражатты пайдалану тиімділігіне талдау жүргізіледі. Салынған қаражаттан қайтарымды бақылау тәсілдері және квазимемлекеттік сектор қызметінің тиімділігін бағалау үшін әдістеме жобасы әзірленеді», – деді Ә.Смайылов.
Үкімет басшысының бірінші орынбасары квазимемлекеттік сектордағы компаниялардың ысырап жасауына қандай тосқауыл қойылатынын айтты. «Биыл желтоқсанда Ұлттық экономика министрлігі Есеп комитетімен бірлесіп, мемлекеттік және квазимемлекеттік секторларда бюджет қаражатын тиімсіз пайдаланғаны және жоспарлағаны үшін жауапкершілікті күшейту бойынша шаралар, оның ішінде заңнамаға өзгерістер қабылданатын болады», деді Үкімет басшысының бірінші орынбасары.
Сондай-ақ Ә.Смайылов бюджет қаражатының тиімділігін арттыру мақсатында бюджеттік өтінімдерді қарау кезінде ең алдымен әлеуметтік-экономикалық әсері ескерілетінін айта келіп, көрмелер, конференциялар және дөңгелек үстелдер өткізуге арналған шығыстарға талдау жүргізіліп жатқанын мәлімдеді. Оның айтуынша, имидждік іс-шараларға кететін шығын негізінен жергілікті бюджеттен жұмсалмақ.
«Делдалдық байланыстарды қысқарту мақсатында көкөністер мен жемістерді сақтауға арналған заманауи инфрақұрылым, азық-түлік өнімдеріне арналған тарату орталықтары құрылады. Көрші елдермен көліктік-логистикалық желі дамытылады. Қолма-қолсыз төлемдерді ынталандыру және электронды коммерцияны дамыту арқылы шағын және микро-бизнесті көлеңкелі саудадан жаппай шығару жоспарлануда», деді Үкімет басшысының бірінші орынбасары.
Бос жерлерді айналымға тарту жоспары бекітілді
Үкімет отырысында Премьер-Министрдің орынбасары Жеңіс Қасымбек агроөнеркәсіп кешенін дамытудың мемлекеттік бағдарламасына 2019 жылдың қазан айында өзгертулер енгізілетінін хабарлады.
«Мемлекет басшысының тапсырмасы бойынша Агроөнеркәсіп кешенін дамытудың мемлекеттік бағдарламасына 2019 жылдың қазан айында өзгертулер енгізіледі. Оның ішінде агроөнеркәсіп кешенін мемлекеттік қолдау шараларының тұрақтылығы мен айқындылығын қамтамасыз ету, агроөнеркәсіп кешенінің өзара міндеттемелерінің жиынтығын айқындау, өңдеу зауыттарын жаңғыртуға, қайта құруға трансұлттық корпорацияларды тарту, жер ресурстарын ұтымды пайдалану шараларын қабылдау ескерілген», дей келе Ж.Қасымбек «ҚазАгро» Ұлттық басқарушы холдингі»АҚ қызметінің тиімділігін арттыру мәселесіне де тоқталды.
«Бизнес-процестердің қаржылық тұрақтылығын қамтамасыз ету және тиімділігін арттыру мақсатында «ҚазАгро» холдингінің трансформациялық бағдарламасы дайындалды. 2020-2029 жылдарға арналған холдингтің жаңа стратегиясының жобасы әзірленіп, саланың негізгі басымдықтары ескерілді. Бизнес-процестер мен құрылымды оңтайландыруды толық автоматтандыру жүзеге асырылады. Холдинг шетелдік мамандарды тартады», деді Үкімет басшысының орынбасары.
Ж.Қасымбектің айтуынша, Ауыл шаруашылығы министрлігі мен Бас прокуратура пайдаланылмаған жерлерді анықтау және оны айналымға енгізу бойынша іс-шаралар жоспарын бекітті. «Биыл жер мониторингі, жерді пайдалану, қорғау, мемлекеттік бақылау және жер телімдерін бөлу үдерістерін автоматтандыру, сондай-ақ пайдаланылмаған жерлерді айналымға енгізу және қайтару жөніндегі шараларды қамтамасыз ету бойынша заңнаманы жетілдіру жоспарлануда», деді Ж.Қасымбек.
Сонымен қатар ауыл шаруашылығы жерлерін сату және жалға беруге қойылған мораторий мәселесіне тоқталып, Ауыл шаруашылығы министрлігінің алаңында заң жобасының тұжырымдамасы таныстырылғанын айтты. «Аталған мәселені қоғамдастықпен талқылау тұрғысында өңірлерге сапарлау кестесі бекітілді. 2019 жылдың соңына қарай бұл мәселе Қазақстан Республикасы Президентінің жанындағы Ұлттық қоғамдық сенім кеңесіне ұсынылатын болады», деді Үкімет басшысының орынбасары.
Жаңа заң еңбек дауларына жол бермейді
Мемлекет басшысы Үкіметтің кеңейтілген отырысында көтерген мәселелердің бірі шетелдік компаниялардағы еңбек даулары. Осы орайда Премьер-Министрдің орынбасары Гүлшара Әбдіқалықова қазіргі таңда қызметкерлерге тең еңбек жағдайын жасау, еңбекті қорғауды басқарудың заманауи жүйесін енгізу бойынша жұмыс берушілердің міндеттері мен жауапкершілігін бекітуді көздейтін заң жобасы әзірленгенін, құжат жақын арада Парламентке жіберілетінін мәлімдеді. «Алға қойылған тапсырмаларды жүзеге асыру үшін шетелден жұмыс күшін тартатын кәсіпорындарда шиеленістің алдын алу және болдырмау іс-шаралар жоспары әзірленуде. Кейбір кәсіпорындарда тексерулер жүргізу жоспарланған. Оның қорытындысына сәйкес, заңнамалық актілерді жетілдіру бойынша кешенді ұсыныстар әзірленетін болады», деді Үкімет басшысының орынбасары.
«Президенттің тапсырмаларын орындауға арналған жоспарды сапалы іске асыру керек. Президент Үкімет жұмысына сенім білдіріп, Үкімет пен әкімдіктер алдына маңызы үлкен міндеттер қойды. Бұл – үлкен жауапкершілік. Сондықтан біз осы сенімді толығымен ақтауымыз керек. Мемлекет басшысының барлық тапсырмаларын орындау мақсатында тиісті іс-шаралар жоспары әзірленді. Жоспарды толықтай әрі сапалы орындауымыз керек», деді А.Мамин.
