Елімізге танымал суретші Ғани Иляевтың ұлы ғана емес, оның өнерін де жалғастырған мұрагері Сұлтан Ғаниұлы жуырда Шымкент қаласында жеке шығармашылық көрмесін өткізді. Көрменің құрметті қонағы болған белгілі қылқалам шебері, Мемлекеттік сыйлықтың лауреаты Ерболат Төлепбай: «Сұлтанның әрбір туындысы толғануды қажет етеді. Кескіндеме өнерінде композициялық шешім деген болады. Суретші туындыларының басым бөлігінде өте сәтті композициялық шешімдер бар. Өнер жолында бірден үлкен дәрежеге жете қою қиын. Оған сатылап жетеді. Ал Сұлтанның кейбір жұмысында өте сәтті шыққан дүниелері бар екен», деп пікірін білдірді.
«Мегаполис» атты көрмеге автордың соңғы жылдары салынған 100-ден астам туындысы қойылған. Атап айтқанда, «Ауыл», «Алтын ай», «Арнау», «Ағаш көлеңкесінде», «Қалыңдық», «Бесік», «Теңіздің жағасында», «Ұшу» сынды 28 полотно мен «Балалық шақ», «Бала түсі», «Идиллия», «Ұшу», «Ояну», «Күн мен түн», «Әуен», «Күн астындағы үй», «Балықтар мен құстар» сияқты графикалық кескіндемелер бар. Қылқалам шеберлерінің бағалауынша, С.Иляев өнеріне символдар мен таңбаларға толы кескіндемедегі ерекше форманы тапқан суретші. Ол өз картиналарына этномәдени сипатқа толы құрақ, шаңырақ сынды қазақтың сәндік-қолданбалы өнерінің элементтерін кіргізген. Өнертанушылар суретші шығармаларының басты тұжырымы – қасаң шеңберді бұзып, қарапайым адамдар байқай бермейтін әлемге, кез келген кескінге жаңа күй сыйлауымен даралану екенін айтуда. Көпшілік жоғары деңгейде ұйымдастырылған көрмеге жақсы баға беріп, өнер иесіне алғысын білдіруде.
Айта кетейік, суретшінің жұмыстары бүгінде Алматы, Мәскеу, Ташкент, Сочи қалаларындағы музейлерде және әлемнің түрлі қалаларындағы жеке галереяларда сақтаулы.
