Бірақ жұрттың сенімін пайдаланып бәсекеге қабілетті кәсіпорын өнімдерін де сапасыз деп күстәналаушылар, тасада тұрып тас атушылар көбейіп бара жатқанын айту керек. Соның бірі – өзімізде ғана емес, халықаралық нарықтағы өз орнын тапқан, күріш өсіріп, ақтаушы «Байдала» серіктестігі.
Жақында әлеуметтік желілерде «қызылордалық «Байдала» серіктестігінің күріші сапасыз» деген сарында бейнеролик тарады. Осы хабардан кейін «Байдаланың» басшысы көмек сұрап, Кәсіпкерлер палатасына өтініш түсірген еді. Мәселені зерттеген палата қызметкерлері сала мамандарының басын қосып, баспасөз мәслихатын өткізді.
Жиында Кәсіпкерлер палатасы директорының агроөнеркәсіптік кешен мәселелері бойынша орынбасары Пірмұхаммед Сыздықов: «Нақты зерделеу жұмыстары жүргізілмей таратылған ақпараттың салдарынан кәсіпкер шығынға ұшырап отыр. Кәсіпкер палатадан көмек сұрады. Қазір заңгерлеріміз құқықтық қолдау көрсетуде», деді.
«Байдала» ЖШС директорының орынбасары Азамат Байдалиев компанияның бүгінде облысқа қарасты Шиелі, Сырдария, Жалағаш аудандарында күріш егіп, оны өз зауыттарында ақтайтындықтарын айтты. Бүгінде «Байдаланың» зауытында тұрақты 80 адам жұмыс істесе, егіндіктерде маусымдық жұмыстарға 2 мыңға жуық адам тартылған. Өнімдерін Тәжікстан, Украина, Ресей, Өзбекстан, Қырғызстан және өзге де елдерге экспортқа шығаруда.
Қызылорда облысында өндірілетін күріштің сапасына қатысты «Қазақстан аграрлық сараптамасы» АҚ Қызылорда филиалының басшысы Мейрамбек Серікбай да пікірін білдірді.
«Біздің облыста зауытта өндірілетін және экспортқа шығарылатын күріштер үш тексеруден өтеді. Олар сәйкестік сертификаты, карантиндік сертификаты және сапа сертификаты. Сапа сертификатынан өту үшін зауыттан шыққан күріш өнімдерінің сынамасы алынып, тексеруден өткізіледі. Қаптың мойнындағы түпнұсқасында шыққан мерзімі жазылып тұрады. Бейнероликті түсірген азаматтар күріштің сапасыз екенін шын мәнінде дәлелдегісі келсе, күріш қабын көрсетуі қажет еді. Тұтынушыларға айтарымыз, қалтадан келген, тарелкадағы шығу тегі белгісіз күріштерге сенбеңіздер. Облыс диқандары республикадағы күріштің 80 пайызын өндіреді. Біздің өңірде өндірілетін күріштердің бұрын 20-30 пайызы ғана шетелге шығатын болса, қазір 70 пайызы экспортқа шығарылады. Сондықтан да өңір күріші туралы жалған ақпарат тарату қисынсыз тірлік. «Байдаланың» күріші сапалы, тұтынушылардан жоғары бағасын алып жүрген, экспортта сұранысқа ие өнім», деді.
П.Сыздықов осындай келеңсіздіктермен ұдайы күрес жүргізілетіндігін айтты.
Ал сапалы өнімді сапасыз деп кәсіпорынның беделін түсірмек болғандар заң аясында жазасын алады.
Қызылорда облысы
