Газетіміздің өткен сандарында елорданың «Астана» клубы мен Андорраның «Санта-Колома» кездесуінің нәтижесін жазған болатынбыз. Сондықтан бұл ойынға тоқталмай, «Қайрат» пен «Ордабасының» матчтарына кеңірек шолу жасасақ.
«Қайраттың» тағдыры қыл үстінде
«Қайрат» командасы Израильге жоғары көңіл күймен аттанған-ды. Себебі өткен аптада өз алаңында Еуропа лигасының алғашқы іріктеуінде «Широки-Бриег» (Босния және Герцеговина) клубын 2:1 есебімен жеңсе, араға екі-үш күн салып ел чемпионатының кезекті турында Қостанайға сапар шегіп, жергілікті «Тобыл» командасын 3:5 есебімен тас-талқанын шығарды.
Израильде өткен ойында да алматылық ұжымның жеңіске жететініне үмітті болғанбыз. Алайда матчтың алғашқы 10 минутында пенальтиден соғылған гол «Қайраттың» ойынын мүлде басқа арнаға бұрып жіберді. Десе де гол соғылғанға дейін біздің футболшылар тәп-тәуір өнер көрсетіп жатқан-ды. Бірақ ойын шырқын 11 метрлік айып добы бұзды. Осылайша кездесудің бірінші таймы жергілікті «Хапоэль» клубының басымдығымен өтті.
Үзілістен кейін Алексей Шпилевский шәкірттері ұжым болып алға қарай ұмтылды. Қарсылас команданың қақпасына бірнеше қауіпті шабуыл ұйымдастырып, қорғанысты ұмыт қалдырғандай болды. Кезекті қарымта шабуылдың бірінде «Хапоэль» ойыншысы Эден Шамир командасының екінші голын соғып кетті. Екінші таймға қосылған қосымша уақытта Елдос Ахметов мергендігімен көзге түскен еді, алайда төреші бұл сәтте ойын ережесінің бұзылғанын анықтап, Ахметовтің голын есептемей қойды. Осылайша «Қайрат» сырт алаңдағы алғашқы ойында 0:2 есебімен жеңіліске ұшырады. Қос команда арасындағы қарымта кездесуі 1 тамызда, Алматыда өтеді. «Қайрат» келесі кезеңге шығу үшін қарсылас команданың қақпасына жауапсыз үш гол соғуға тура келеді.
«Ордабасы» үшінші кезеңге жақындай түсті
Қазақстандық үш команданың ішінде қазір «Ордабасының» жағдайы тәуір. Өйткені Чехияда өткен ойында жергілікті «Млада-Болеслав» командасының қақпасына гол соғып, қарымта матч алдында аздаған басымдыққа ие болды. Ал жалпы кездесу 1:1 есебімен тең аяқталды.
Ойындағы есепті бірінші болып шымкенттік ұжым ашты. Матчтың 21-минутында «Ордабасының» босниялық жартылай қорғаушысы Мирзад Механович гол соғып, командасын есепте алға шығарды. Дегенмен алаң иелері бірінші тайм аяқталғанға дейін есепті теңестіріп үлгерді. 45-минутта «Млада-Болеслав» футболшысы Николай Комличенко мергендігімен танылып, есепті 1:1-ге жеткізді. Екінші таймда екі команда да гол соғуға ұмтылғанымен, доп қақпаға дарымай қойды.
Енді екі команда арасындағы қарымта кездесу 1 тамызда Шымкенттегі Қажымұқан атындағы орталық стадионда өтеді. Бұл ойында «Ордабасы» командасын 0:0 есебі де келесі кезеңге алып шығады. Бірақ жеңісті қолдан шығарып алмас үшін шымкенттіктерге гол соққаны тиімді болады.
Болашақ қарсыластардың нәтижесі қандай?
«Астана» елордада өтетін жауапты кездесуде «Санта-Колома» клубын жеңетін болса, Чемпиондар лигасында ойнап жатқан «Ференцварош» (Венгрия) – «Валлетта» (Мальта) жұбының жеңілген командасымен кездеседі. Екі клуб арасындағы алғашқы матч Венгрияда өтіп, «Ференцварош» 3:1 есебімен басым түскен.
«Қайрат» – «Хапоэль» жұбының жеңімпазы «Норрчепинг» (Швеция) немесе «Лиепая» (Латвия) клубымен кездеседі. Алғашқы кездесуде Швеция командасы 2:0 есебімен жеңіске жеткен болатын.
Шымкенттік команда үшінші іріктеу кезеңінде Румынияның ФКСБ (бұрынғы «Стяуа») клубымен кездесуі бек мүмкін. Өйткені ФКСБ сырт алаңда Арменияның «Алашкерт» командасынан 3:0 есебімен басым түсті. Егер қазақстандық командалар үшінші кезеңге шығатын болса, алғашқы ойынын 8 тамызда өз алаңдарында, ал қарымта кездесулерді 15 тамызда сырт алаңда өткізеді.
