Бұл өңір энергияға тапшы. Алматы ЖЭО-лары, Қапшағай және Алматы СЭС каскадтары, Есік СЭС-і, Мойнақ СЭС-і, Қаратал СЭС-і өңірдегі электр энергиясының негізгі көздері саналады.
Бүгінгі таңда өзінің қуат өндіру көздері болмағандықтан, Алматы облысының электр энергиясына деген қажеттілігін жергілікті қуат көздері 50%-ға ғана қанағаттандырады.
«Шелек дәлізінде жел электр стансасын салу арқылы парник газдарын (СО2) шығару жылына 206 мың тоннаға азаяды, сондай-ақ жылына 89 мың тонна шартты отын ауыстырылады. Оның үстіне, жел электр стансасы қоршаған ортаға әсер етпей отырып, электр энергиясының қорын толықтыруға мүмкіндік береді», деді «Самұрық-Энерго» АҚ жобалау кеңсесінің басшысы Ернұр Жиенбаев.
Нысанның құрылысы кезеңінде 300 жұмыс орны ашылып, станса іске қосылғаннан кейін тұрақты негіздегі 14 жұмыс орны пайда болады. ЖЭС жылына 225 750 мың кВт электр энергиясын өндіреді деп күтілуде. Жобаның аяқталу мерзімі – 2020 жыл.
Атап өтейік, станса жиынтық қуаты 60 МВт болатын 24 жел энергетикалық қондырғыдан, қосалқы стансадан және электр желілерінен тұрады. Нысанның агрегаттары жел стансасын автоматты басқару жүйесіне негізделген аппараттық-бағдарламалық кешен арқылы реттеледі. Бұл моделдің артықшылығы сол, оны суық континенталды климат (–30…+43 С), 10 балдық сейсмикалық белсенділік және желдің екпіні II класс жағдайында пайдалануға болады.
Естеріңізге сала кетейік, «Самұрық-Энерго» АҚ бұған дейін ЖЭК саласындағы 2 жобаны: Қапшағай қаласындағы 2 МВт күн электр стансасын және Ерейментау қаласындағы 45 МВт Жел электр стансасын іске асырған болатын.
