Халықаралық ұйымның мәліметінше, ел тұрғындары тәуліктік мөлшерді 3 еседен арттырып, күніне 17 грамм ас тұзын пайдаланады екен. Бұл ретте тиісті норма 5 грамды құрайтынын атап өткен орынды. Мамандар мөлшерден артық тұзды тұтыну жүрек-қан тамыр аурулары, артериялық гипертония, инсульт, инфаркт, семіздік, ІІ типтегі қант диабетінің дамуы сияқты созылмалы жұқпалы емес ауруларға, сондай-ақ кейбір онкологиялық сырқат түрлерін қоздыруы мүмкін екенін жасырған жоқ. Осыны ескере келе Қоғамдық денсаулық сақтау ұлттық орталығы және С.Сейфуллин атындағы Қазақ агротехникалық университеті ынтымақтастық меморандумына қол қойды. Мұндағы көзделген меже – ұн өнімдерінен жасалатын тағамдағы тұздың мөлшерін 1 грамға біртіндеп азайтып, рецептураны өзгерту. Сол секілді қазақстандықтар арасында дұрыс тамақтану мәдениетін қалыптастыру қажет.
– Адам денсаулығының дұрыс болуы 70%-ға дұрыс тамақтануына байланысты. Бұл бағыттағы жұмыстарды өткен жылдан бастап қолға алдық. «Атамекен» ҰКП-мен бірлесіп нан-тоқаш өнімдерін өндірушілермен түсіндіру жұмыстарын жүргізудеміз. Осы іске Қазақ агротехникалық университеті жұмылдырылғаны қуантып отыр. Өйткені оқу орнының ғылыми-техникалық базасы дұрыс тамақтану ісін жандандыруға септеседі деп үміттенеміз. Бұған қоса елордадағы және Қарағандыдағы нан-тоқаш өнімдерін өндірушілермен ортақ келісімге қол жеткізу жоспарда бар. Әзірге пайдалы тағам университет қабырғасында өндірілмек. Үш жыл көлемінде нан өнімдеріндегі тұзды 1 грамнан азайту көзделген, – дейді Руслан Сатывалдеев.
Аталған білім ордасының тәжірибелік-өндірістік цехында студенттер мен оқытушылар үшін құрамында тұзы аз нан өнімдері әзірленетін болады. Екіжақты ынтымақтастық шеңберінде халықаралық сарапшыларды тарта отырып түрлі өнімдердегі тұзды азайту мәселелері бойынша консультациялар, семинарлар, сондай-ақ пайдалы тамақтану мәдениетін қалыптастыру бойынша акциялар ұйымдастыру жоспарланған.
Жақсылық МҰРАТҚАЛИ,
«Egemen Qazaqstan»
