Міндет мінсіз атқарылса елдік іс еселене береді
Сәрсенбі, 16 қаңтар 2013 7:31
Қазақ – болмысынан еркіндікті сүйген, сыйласқанға басын иген, өз қадір-қасиетін білген халық. Оны тәуелсіздік жылдарында сабақтастық үлгісін көрсетіп қана қоймай, өрістеткеніміз төрткүл дүниеге мәлім. Өскеніміздің, өркен жайғанымыздың нақты дәлелі өткенімізді саралап, болашағымызды айқындаған, Елбасының «Қазақстан 2050» Стратегиясы дер едім. Бұл құнды құжат қазақстандықтардың келер күнге деген сенімін арттырып, ұрпақтың кемел келешегіне жол ашып отыр. Оған «Білім және кәсіби машық – заманауи білім беру жүйесінің, кадр даярлау мен қайта даярлаудың негізгі бағдары» деген тараудағы тарата айтқан міндеттер біз үшін үлкен бағдар. Бұған мына бір үзінді де дәйек болады. «Бүкіл әлемдегі сияқты Қазақстан мектепке дейінгі білім берудің жаңа әдістеріне көшу керек. Сіздер білесіздер, мен басты міндеті балаларымыздың бастапқы мүмкіндіктерін тексеру болған «Балапан» бағдарламасы бастамасын көтердім» дейді Елбасы. Бұл ұрпақ үшін айдай ақиқат еді.
Сәрсенбі, 16 қаңтар 2013 7:31
Қазақ – болмысынан еркіндікті сүйген, сыйласқанға басын иген, өз қадір-қасиетін білген халық. Оны тәуелсіздік жылдарында сабақтастық үлгісін көрсетіп қана қоймай, өрістеткеніміз төрткүл дүниеге мәлім. Өскеніміздің, өркен жайғанымыздың нақты дәлелі өткенімізді саралап, болашағымызды айқындаған, Елбасының «Қазақстан 2050» Стратегиясы дер едім. Бұл құнды құжат қазақстандықтардың келер күнге деген сенімін арттырып, ұрпақтың кемел келешегіне жол ашып отыр. Оған «Білім және кәсіби машық – заманауи білім беру жүйесінің, кадр даярлау мен қайта даярлаудың негізгі бағдары» деген тараудағы тарата айтқан міндеттер біз үшін үлкен бағдар. Бұған мына бір үзінді де дәйек болады. «Бүкіл әлемдегі сияқты Қазақстан мектепке дейінгі білім берудің жаңа әдістеріне көшу керек. Сіздер білесіздер, мен басты міндеті балаларымыздың бастапқы мүмкіндіктерін тексеру болған «Балапан» бағдарламасы бастамасын көтердім» дейді Елбасы. Бұл ұрпақ үшін айдай ақиқат еді.
Иә, Президенттің жаңа Жолдауындағы міндеттердің ең үлкені деп, мен білім беру және тәрбиелеу жұмысы бойынша ұл мен қызды 100 қамтуға қол жеткізу жөніндегі тапсырмасы дер едім. Шынында, сауатты да, тәрбиелі ұрпақ Отанымыздың күні ертеңгі алтын тірегі болары сөзсіз. Білім білігі мықты жас қашан да қоғам дамуына ойлы көзбен қарайды. Жұдырықтың күшіне емес, ақылдың айбынына сенім артады. Мұнымен қатар, жолдауда оқу әдістемелерін жаңғырту, өңірлік мектеп орталықтарын құру қажеттілігін де атап өткен. Бұл бізге тікелей қатысты деп білемін.
Мемлекет басшысы жоғарыда айтқанымыздай, егемен елдің жас ұрпағына қажет нәрсенің бәрін өзінің жыл сайынғы Жолдауында нақтылап беруде. Осыдан он жылдан аса уақыт бұрын Арқаның ең көрікті де көркем, сулы да нұрлы жерінен «Балдәурен» Республикалық оқу-сауықтыру орталығын (РОСО) құруды тапсырған еді. Бұл сол кезде мүлтіксіз орындалып, қазір жүйелі жұмыс істеліп жатыр. Елбасының осындай қамқорлығын сезінген оқушылар мен жасөспірімдер орталықта осы күндері білім мен тәрбиені қатар ұштастырып келеді. Отанымыздың барлық өңірлерінен келген демалушылар бір атаның баласындай, бес қолдың саласындай болып, достықтың туын көтеріп, бір біріне деген мейірімін тереңдете түсуде.
Білім және ғылым министрлігінің кестесіне сәйкес осы уақытқа дейін «Балдәурен» Қазақ артегінде 70 мыңнан аса оқушы демалды. Сол секілді жүзден жүйріктер қатысып, жүлделі бесінші орынға табан тіреп тәуелсіз жұртымыздың мерейін өсірген, 98 елдің үздік жастары қатысқан 51-ші Халықаралық математика олимпиадасы Астанадан кейін біздің орталықта жалғасын тапты. Сол секілді әлемдік байқаулар мен оқушылар фестивалі өтіп тұрады. Әсіресе, әлеуметтік жағынан аз қамтылған отбасылар мен мүгедек балаларға алғашқы кезекте қамқорлық жасап отыру басты мақсат болып саналады.
Осы деректерді алға тарта отырып Елбасының болашаққа нық қадаммен баруды мақсат еткен жаңа Стратегиясы бойынша атқарылатын жұмыстарды жүйелей бастадық. Ең бастысы мемлекетіміздің барлық өңірлерінен «Балдәурен» оқу-сауықтыру кешеніне келген оқушыларға білім беру мен тәрбиелеудің озық үлгілерін, әсіресе, оқыту әдістемелерін дәуір талабына сай жаңғыртудың жоба-жоспарын ғылыми тұрғыдан жақсартуды қолға алдық. Ол үшін білікті мамандардың қажет екені анық. Бұл жұмысқа да зейін аударып, әр мұғалім бәсекеге қабілетті, сауаттылығы жоғары болу керек деген міндетті алға оздырдық. Жолдауда айтылған тұрмысы төмен, яғни әлеуметтік жағынан аз қамтылған отбасы балаларына бұрын да жасалып келе жатқан жеңілдіктерді қайта қарап, ынталы ұл-қызға қолжетімді көмек көрсетуді арттыра бермекпіз.
«Бейбіт өмірдің өзінде бізде мыңдаған жетімдер бар – балалар үйлері толы. Бұл, өкінішке қарай, жалпыәлемдік үрдіс және жаҺанданудың сынағы. Бірақ біз бұл үрдіспен күресуіміз керек. Балалар – қоғамымыздың ең әлсіз және қорғансыз бөлігі және олар құқықсыз болуға тиісті емес» деген Елбасы сөзі, кім-кімге болса да ой салмай қоймайды. Осы тапсырманы жан-жақты сараптан өткізе отырып, ата салтымызға сай, жетімдерді алақан жылуына алуымыз керек. «Балдәурен» оқу-сауықтыру кешені жыл бойы жұмыс істесе, біз кейбір ауысымдарда жетім, денсаулығы кеміс балаларға арнап, олардың Көкшетау өңірінің әсем табиғатында демалуына мүмкіндік жасауды дәстүрге айналдырудамыз. Осы арада мына бір ұсынысымды да айта кетсем деймін. Қазір еліміз бойынша ең үлкен оқу-сауықтыру кешені «Балдәурен» ғана. Ұзақ мерзімге бағытталған Мемлекет басшысының «Қазақстан 2050» Стратегиясы аясында «Балдәурен» секілді оқушыларға арналған өңірлік кешендер салынып, ол жыл бойы жұмыс істесе нұр үстіне нұр болар еді. Ондай демалыс орындары бар. Бірақ көбісі қадамын жаза алмай отыр. Егер өңірлердегі сондай оқу-сауықтыру кешендері келешекте бір орталықтан қаржыландыру арқылы «Балдәуреннің» филиалы етіп, жергілікті жерлерден балаларды басты кешенде демалуға жіберіп отыру үрдісін қалыптастырсақ артық болмас еді. Мұндай жүйе өзге елдерде бұрыннан бар.
Бір сөзбен айтқанда, Елбасының бұл Жолдауы бүгінімізді саралай отырып, келешегімізге жасалған үлкен жоба екені белгілі. Ендігі жерде осы Стратегияның әр тармағы бойынша өзіне тиесілі жұмысты атқару бәрімізге мүлтіксіз міндеттеліп отыр. Оны абыроймен орындасақ Отанымыздың бүгінгі көтерілген биігі, одан да асқақтап, шырқау шыңдай алыстан көз тарта бермек.
Мұхитдин ТӨЛЕПБАЙ,
«Балдәурен» РОСО бас директоры
