Белсенділік – іске қуат

Жұма, 15 ақпан 2013 7:57

13-14 ақпанда «Нұр Отан» халықтық-демократиялық партиясы  Төрағасының бірінші орынбасары Бауыржан Байбек жұмыс сапарымен Қарағанды облысында болып,  бірқатар әлеуметтік-тұрмыстық нысандарды аралап көрді. Жұртшылық өкілдерімен әңгімелесті.

Жұма, 15 ақпан 2013 7:57

13-14 ақпанда «Нұр Отан» халықтық-демократиялық партиясы  Төрағасының бірінші орынбасары Бауыржан Байбек жұмыс сапарымен Қарағанды облысында болып,  бірқатар әлеуметтік-тұрмыстық нысандарды аралап көрді. Жұртшылық өкілдерімен әңгімелесті.

Жауапты қызметке тағайын­далғаннан кейінгі облыс тынысымен танысуға арналған екінші сапардың алғашқы жұмыс күнінде Б.Байбек Теміртаудағы күрделі жөндеуден өтудегі балалар ауруханасына барды. Осынау емдеу мекемесін жаңартып, қалпына келтіру жұмыстары жүргізіліп жат­қанына біршама уақыт болғанымен, әлі аяқталмай келеді. Бұл іске жау­апты мердігердің жүктелген міндетін тиісінше орындамауы сал­дарынан аурухана бүгінде шек­теу­лі жағдайда жұмыс істеуге мәжбүр болып отыр. Орын алған кемшіліктер «Нұр Отан» ХДП қалалық филиалының партиялық бақылау бойынша комиссиясы тарапынан анықталды. Осы жөнінде оның төрайымы Гүлназ Мусина жан-жақты баяндады.

Б.Байбек партияның қалалық мәслихаттағы «Нұр Отанның» депутаттық фракциясына атал­ған мәселеге ерекше назар ауда­рып, нысандағы жөндеу жұмыс­тарының жыл соңына дейін қар­жы­ландырылуын қарастыруды тап­сырды.

Бұдан кейін Б. Байбек Тұңғыш Президенттің тарихи-мәдени орталығында облыстық жастар ұйымдары белсенділерімен, мектеп оқушыларымен кездесті. Жас буынмен емен-жарқын әңгіме қозғалып, мемлекет тарапынан жарқын болашақтарына барлық жағдай жасалып отырғаны, осы қамқорлық қадірін түсініп, баға­лай білу жайы сөз етілді. Темір­таудың Елбасы еңбек жолын бас­тап, шыңдалу мектебінен өткен орта екені атала келіп, жаңа буын­ның білімі мен тәжірбиесіне үлкен үлгі боларлық үдерістерді дамыту керектігі айтылды.

Теміртаудан соң сапар Абай қаласында жалғасты. Мұнда «Нұр Отан» ХДП Төрағасы бірінші орынбасарының келетінін күні бұрын естіген жұрт соңғы уақытта жөнделген үйлер алдында күтіп тұрған еді. Олармен «Тұрғын үй-коммуналдық шаруашылығын жаңғырту» бағдарламасы туралы ой-пікірлер алмасылды. Сол арқылы тұрғындардың өз­де­рі тұратын мекен-жайларды, аулаларды көркейтіп, абаттан­дыруына мүмкіндік кеңдігі еске салынды.

Жиналғандар шаһар­дың мо­но­қала­ларды дамыту бағ­дар­ла­масына енгізілуіне риза­лық біл­діріп, бұл ретте атқарылуға тиісті іс-шаралар жөнінде бірқатар сауал­дар қойды. Сұрақтарға толымды жауап беріліп, бұл шараның мән-маңы­зы түсіндірілді. Сөз кезегінде облыс әкімі Бауыржан Әбдішев аталған бағдарлама аясында қаланың келешегі кемелдене түсетіндігін, қазір бос тұрған ескі үйлер орнына жаңа тұрғын жайлар салынатындығын, өндіріс орындары ашылып, жастардың еңбекке қамтылуына одан сайын жол ашылатындығын баяндап берді.

Бұл кездесуден кейін Б. Байбек Абай ауданы әкімінің халық ал­дын­дағы есеп беру жиналысына қатысты.

Жұмыс сапарының екінші күнін­де Б.Байбек «Нұр Отан» халық­тық-демо­кра­тия­лық партия­сы облыстық филиалы­ның кезек­тен тыс 17 конференциясына қаты­сып, филиал төрағалығына аймақ басшылығына жаңадан тағайын­далған Бауыржан Әб­ді­шев­тің кандидатурасы ұйға­рылғанын жеткізді. Делегаттар ұсы­нысты қолдап, бірауыздан дауыс берді.

Конференцияға қатысушылар алдында сөйлеген сөзінде Б.Бай­бек партия жұмысының таяу ара­дағы негізгі басымдықтарын, өңірлердегі іс-қызметін күшейту, қоғамның билікке сенімін арттыру, мемлекеттік бағдарламалардың жүзеге асырылуын бақылау және жастармен жұмыс жасауды нығайту қажеттігін атап көрсетті. Сонымен бірге, жергілікті мәсли­хат­тардағы «Нұр Отан» партия­сының депутаттық фракциялары сайлауалды бағдарламаның орындалуын бақылауға алып, бұл жайтты ұдайы басты назарда ұстауы керектігін қаперге салды. Алдағы уақытта барлық өңірлерде өткізілетін ауыл әкімдерінің сайлауында партияның депутаттары маңызды рөл атқаратындығы аталды.

Бауыржан Қадырғалиұлы сон­дай-ақ жемқорлыққа қарсы күресті күшейту, партия мүшелері жауапкершілігін көтеру, пар­тия­лық тәртіптілікке таза болуды қа­лып­тастыру, партиялық ба­қы­лаудың пәр­менділігін арттыру мәселелеріне ерекше мән берілуі керектігін сөз етті. Даму мен жаң­ғырудың жаңа жолындағы елі­міздің алдына қойылған міндет­терді, Елбасының тапсырмаларын тындырымды, мүлтіксіз орындауда нұротандықтардың бастамашыл, талапшыл, еңбекшіл болуы, қоғамдық өмірдің алдыңғы шебінен табылуы тиіс екендігі қадап айтылды.

Айқын НЕСІПБАЙ,

«Егемен Қазақстан».

ҚАРАҒАНДЫ.