Алматы көшелерінде дабылын қосып, жүйіткіп жүрген жедел жәрдем бригадасы бұл жолы ешқандай шақыртуға асыққан жоқ. Тек жүргізушілердің қаншалықты жол беретіндігін сынап көрді. Арнайы автокөліктер науқастың жағдайына байланысты 4 топқа бөлінген. Соның ішінде 1-категория бойынша ең тез уақытта жетуі тиіс. Ол қаланың кез-келген жерінде 15 минутта болуы керек.
«Бірінші, екінші категориядағы жедел жәрдем көлігі 15 минутта шақыртылған жерге жетуі керек. Алайда, біз олардың шамамен 80 пайызына дер кезінде бара алмаймыз. Кешігудің негізгі себебі, өзге қарапайым жүргізушілердің жол бермеуі, сондай-ақ, көлік қозғалысының қиындығы», дейді Алматы қаласы жедел жәрдем стансасының жолдағы қауіпсіздік инженері Владимир Фомин.
Алматы қаласы бойынша сыбайлас жемқорлыққа қарсы күрес Департаменті алғаш рет ұйымдастырған бұл шара «Алматы - адалдық алаңы» жобасы аясында өтті.
Осылайша, төрт сағатқа созылған рейд барысында дер кезінде медициналық транспорттың жүруіне кедергі келтірген тек 4 жүргізушіге айыппұл жазылды. Бұл жаман көрсеткіш емес дейді сала мамандары. Десе де, осы сынды шаралар ұдайы өткізіліп тұрмақ. Бұл көлік жүргізу мәдениетімен қатар, адам өмірінің маңыздылығын арттырады дейді ұйымдастырушылар.
АЛМАТЫ
