Қазақстан Елшісі Финляндия президентіне Сенім грамоталарын тапсырды

Қазақстан • 25 Тамыз, 2019

Қазақстан Елшісі Финляндия президентіне Сенім грамоталарын тапсырды

Қазақстанның Елшісі Жанна Сартбаева Финляндия Республикасының президенті Саули Ниинистёге Сенім грамоталарын тапсырды. Президент сарайындағы салтанатты рәсімнен кейін қазақстандық дипломатты Мемлекет басшысы қабылдады. Бұл туралы Сыртқы істер министрлігінің баспасөз қызметі хабарлады.

Egemen Qazaqstan

Сұхбат барысында Қазақстан Президенті Қасым-Жомарт Тоқаевтың Финляндия президентіне жолдаған сәлемі мен жылы ниет-лебіздері жеткізіліп, Қазақстанға сапармен келіп-кету туралы шақыруы табыс етілді.

Финляндияның мемлекет басшысын Қазақстанның саяси дамуы, экономикасын әртараптандыруы және транзиттік-көліктік әлеуетін дамыту жолындағы қолға алынған шаралар бойынша хабардар етілді.

Қазақстан-Финляндия қатынасының қазіргі жағдайы мен келешегін талқылау барысында Елші екіжақты ынтымақтастықтың барлық спектрі бойынша, әсіресе, цифрлық технологиялар саласындағы өзара әрекеттестікті тереңдетуге ел басшылығының мүдделілігін танытты.

Президент Қ.Тоқаев ұлықтау рәсімінде сөйлеген сөзінде айқындаған негізгі бағыттар туралы егжей-тегжейлі айтылды. Қазақстанның Тұңғыш Президенті - Елбасы Нұрсұлтан Назарбаев әлемдік қауымдастыққа үш диалог негізінде жаңа геосаяси ахуал қалыптастыру туралы ұсынған бастамасы мәлімденді.

Сонымен қатар Тұңғыш Президент - Елбасы Н.Назарбаев пен Президент Қ.Тоқаевтың президент С.Ниинистенің туған күніне орай құттықтаулары табысталды.

Финляндия президенті екі ел арасындағы қатынастардың достық сипатына ерекше көңіл аударып, Қазақстанның халықаралық аренадағы маңыздылығын атап өтті. Ол екіжақты сауданың өсіп келе жатқан беталысына қанағаттанушылық білдірді.

С.Ниинистё Тұңғыш Президент - Елбасы Н.Назарбаевтың қазіргі қазақ мемлекеттілігінің негізін қалаушы ретіндегі рөлін айрықша айтып, оның жаһандық архитектура мен геосаяси мәселелердің қалыптасу үдерістерін терең түсінетіндігін атап өтті. Фин мемлекетінің басшысы еліміздің Президенті Қ. Тоқаевқа жүрекжарды лебізін білдірді.

Финляндия президенті Қазақстанға жасаған сапарларын еске алып, елдің қазіргі дамуын жоғары бағалады және елдегі саяси, әлеуметтік-экономикалық реформаларды одан әрі жүзеге асыруда сәттілік тіледі.