Олардың жекпе-жегі Ресейдің Челябі қаласындағы "Трактор" аренасында бокс кешінің басты кездесуінде өтті. Ковалев өзінің туған қаласында алғаш рет жекпе-жек ұйымдастырды, жалпы ол Ресейде небәрі үш кездесу өткізген. Ярд болса спорттық мансабында алғаш рет өз елінің шекарасынан шықты.
Жекпе-жек 11-ші раундта аяқталды. Ковалев күші сарпылған қарсыласын нокаутқа түсірді. Сегізінші раундта ұлыбританиялық боксшы сәл болмағанда ресейлікті есінен тандыруға аз қалған еді. Бірақ ол гонгқа дейін шыдап бақты, сосын басымдықты өз қолына алды.
36 жастағы Ковалев үшін бұл 34-ші (29 нокаут) жеңіс, ол үш рет жеңілген және бір рет тең түскен. Ал 27 жастағы Ярд спорттық мансабында алғаш рет жеңілді. Осыған дейін ол 18 кездесуде жеңімпаз болып, оның 17-ін мерзімінен бұрын аяқтаған. Осы кездесу үшін Ковалев бес миллион доллар, ал ұлыбританиялық үш миллион доллар алады. Ковалев WBO белбеуін 2 ақпанда қайтарған еді. Ол колумбиялық Элейдер Альваресті реванш кезінде жеңді.
2013-2016 және 2017-2018 жылдары аралығында осы белбеу ресейліктің иелігінде болған.
Бұдан да бұрын хабарлағанымыздай, осы бокс кешінің андеркартында кәсіпқой бокста орта салмақта өнер көрсетіп жүрген қазақстандық боксшы Мейірім Нұрсұлтанов ресейлік Артур Осиповты жеңді. 26 жастағы Нұрсұлтанов спорттық мансабында 11 кездесу өткізіп, барлығында да жеңіске жетті. Сегіз кездесуді мерзімінен бұрын аяқтады.
Ал 30 жастағы Осипов осымен екінші рет жеңілді, ол 15 рет (10 нокаут) жеңіске жеткен.
