Айыптау актісіне сәйкес, айыпталушылардың үшеуі – Берік Ахметов, Қайрат Ақшанов және Нұрлан Шүкілдіков «Охотзоопром» инспекторы Ерлан Нұрғалиевті өлтірді және оның әріптесі Петр Ницыкқа қастандық жасады, ақбөкендерді заңсыз аулады деп айыпталуда. Ал олардың серіктестері – Берден Базаров, Батырбек Қайырбеков, Жарасхан Мырзабаев және Айдос Әкімовке тек заңсыз аң аулағаны үшін айып тағылып отыр.
Алдын ала тыңдалым барысында жәбірленушілер мен сотталушылардың өкілдері сотқа дейінгі тергеу үстірт жүргізілді деп санайтындарын айтып, қылмыстық істі прокурорға қайтаруды сұрады.
Сотта марқұм қорықшының ұлы Медет Нұрғалиевтің және инспектор Петр Ницыктың сөзін сөйлеген адвокат Алмат Қасқырбай қастандық жасағандардың қатарына кірмеген төрт айыпталушының ісін қайта қарауды сұрады. Адвокаттың айтуынша, бұл төртеу Қылмыстық кодекстің 432, 434-баптары бойынша аса ауыр қылмысты жасырғаны үшін және дер кезінде қылмысты жария етпегені үшін айыпталуы керек. Олардың бұл кінәлары бұлтартпас фактілермен айғақталған. Біріншіден, олар қылмыс орнында оқиғаға куә. Одан кейін бәрі бірге бір үйде түнеген және полицияға жағдай туралы хабарлауға мүмкіндіктері болды.
Қорғаушының сөзін марқұмның досы және оның ұлының заңды өкілі Ғалымжан Тәуекелов те құптады. Ол егер әлгі төртеу дер кезінде полицияға жүгінгенде, қорықшы Ерлан Нұрғалиевтің өмірін сақтап қалуға болатын еді деген өкінішін білдірді. Жәбірленуші тарап бұл адамдардың әрекеттеріне де ауыр жаза қарастырылу керек екендігін мәлімдеді.
Сонымен қатар сотталушы тараптың авдокаттары да қылмыстық істі прокурорға қайтарып, тергеуді қайта жүргізуді сұрады. Адам өлімімен айыпталушылардың бірі Қ.Ақшановтың қорғаушысы тергеу органының айыптау актісінде қылмыс орнының толық мәліметтерін көрсетпегенін және заңсыз аң аулау салдарынан келтірілген залалдың мөлшерімен келіспейтінін айтты.
«Бір топ адам қасақана адам өлтірді» деп айыпталған сотталушылардың қорғаушылары қылмыстық бапты қайта квалификациялауды талап етті. Олардың айтуынша, күдіктілер абайсызда өлімге әкеп соқтырған дене жарақатын келтірген. Себебі қорықшы Ерлан Нұрғалиев оқиға орнында қаза таппаған, ауруханаға жеткізгенде тірі болған.
Бұған қоса адвокаттар полицейлердің аңшылардың киікті атқандарын дәлелдей алмағанын айтты. «Охотзоопром» инспекторлары даладан атылған 17 жануарды тауып, олардың залалын 45 млн теңге деп есептеді. Бірақ қорғаушылар бұл сома асыра сілтелген, залалдың шын мәніндегі сомасы 17 млн теңгеден сәл асады деген пікірлерін жеткізді. Сотталушы Қ.Ақшановтың қорғаушысының өтінішін Б.Ахметов пен Н.Шүкілдіковтің адвокаттары қолдап отыр.
Алдын ала тыңдалымнан соң Қарағанды облысының қылмыстық істер жөніндегі мамандандырылған ауданаралық сотының судьясы Бекзат Шалғымбаев істі прокурорға қайтару туралы үкім шығарды. Оның пайымдауынша, іс егжей-тегжейлі зерттелмеген, қылмыстық іс баптары дұрыс қолданылмаған, тергеушілер қылмыстың қай жерде, қалай жасалғанын дәлелдейтін материалдарды айыптау актісіне енгізбеген. Айыптаулар тек екі тараптың ауызша түсініктемелеріне негізделіп жасалған. Сондықтан айыптау актісінде кереғар жауаптар жиі кездеседі. Күдіктілердің әрекеттерін саралау туралы шешімде қылмыстардың объективті жағы сипатталмаған. Сондай-ақ аталған қылмыстық іс бойынша сот өндірісінің тілі қазақ тілі деп таңдалған, алайда құжаттардың бір бөлігі зардап шегуші Петр Ницык үшін орыс тіліне аударылмаған.
Бұл оқиға жыл басында тіркеліп, Қарағанды облысы Нұра ауданында киік атқан браконьерлер екі инспекторды жарақаттаған еді. Ауыр жарақаттан ес жимаған Ерлан Нұрғалиев 15 қаңтарда Нұр-Сұлтан қаласының №1 ауруханасында көз жұмды. Қазір қылмыстық іс бойынша жеті адам айыпталып отыр. Олардың үшеуі – қамауда.
