Сатылап іске асырылғанда ұтымды болмақ

Қасым-Жомарт Тоқаевтың Жолдауы­ның мазмұнына ақпараттық кеңістікті тал­дау негіз болғандай. Яғни, бұқаралық ақпарат құралдарында көтерілген проб­лемалардың бірқатары көрініс тапты деп ойлаймын. Президент сол проблемаларға Жолдау аясында жауап берді.

Зейнетақы жүйесіне, экономикалық өсімге, саяси жаңғыруға және басқа­ларына қатысты маңызды мәселелердің барлығы қамтылды. Мәселен, 5 пайыз көлеміндегі қосымша зейнетақы төлемі тақырыбы қоғамда қызу талқыланғаны белгілі. Қ.Тоқаевтың Жолдауында оны төлейтін кәсіпкерлер тарапының да, халықтың да мүддесі ескерілді. Екі тарап та өз­деріне қажетті жауап ал­ды. Әлеуметтік төлем­дерге қатысты тұр­ғындарды алаңдатқан жайттар, агро­өнеркәсіп кешеніндегі проблемалар, мемқызметтің тиімділігі сынды мәселелердің барлығы жауапсыз қалған жоқ.

Мен саяси жүйені дамытуды атап өткім келеді. Президент экономиканы дамытуды саяси жүйені жаңғыртудан бөлек жүргізу мүмкін еместігіне ерекше тоқталды. Парламент міндетті түрде көппартиялы болу керек деген пікірді қолдайтынын білдірді. Митинг туралы заңнаманы жетілдіру, азаматтардың өз ойын еркін білдіруіне мүмкіндік беру, балама сындарлы саяси көзқарастардың болуы сынды мәселелердің айтылғаны өте дұрыс болды деп есептеймін.

Қазіргі таңда билік тым ауқымды дүниелерден бұрын, тұрғындардың қажеттілігіне жедел назар аударуға басымдық беретіні байқалды. Басым­дықтар айқындалды, ендігі мәселе – Пре­зидент көтерген бастамаларды, жүктеген міндеттерді жүзеге асыру. Меніңше, билік органдарындағы біраз шенеуніктің жұмыс стилін өзгертуіне, жағдайға бейім­делуіне тура келеді. Әрине бұл еліміздегі ахуалдың жақсы жағына өзгеруіне әсер етеді.

Президент Жолдауы өте ауқымды, көптеген мәселені қамтыған ауқымды құжат. Мемлекет басшысы айтқан тапсыр­малардың, қолға алынатын жұмыстардың әрқайсысын жүзеге асыруға уақыт керек. Айталық, митингке рұқсат беруге қатысты жұмыстар бірнеше аптада шешілуі мүмкін. Ал зейнетақы жүйесін оңтай­лан­дыруға одан көбірек, бәлкім жарты жылдай уақыт керек болар. Мем­лекеттік қызмет саласы, әкімдердің рейтинг­терін анықтау, жұмыстарын бағалау сынды жұмыстарды жүзеге асыруға бір­неше жыл кетуі мүмкін. Әрине мен бар­лығын шартты түрде айтып отыр­мын. Қалай болғанда да, Жолдау маз­мұнын­дағы мәселелер сатылап іске асы­рылатын болады.

Ғазиз ӘБІШЕВ,
саясаттанушы