Клубтың жылдық бюджеті 32-35 миллион АҚШ долларын құрайды. Сол қыруар қаржы-қаражаттың басым бөлігі шетелдіктердің есепшотына түсіп отырғаны да белгілі. Өкінішке қарай, «Астананың» аты өзіміздікі болғанымен, заты басқа болып тұр. Бұлай дейтініміз, осы команданың президенті Пол Эшуорт (Ұлыбритания) пен бас бапкері Роман Григорчук (Украина) мырзалардан бастап, оған мүше 18 ойыншының тең жартысы – легионерлер.
Санамалап көретін болсақ, қорғаушылар Антонио Рукавина (№2) – Сербия, Жарко Томашевич (№6) – Босния және Черногория, жартылай қорғаушылар Дорин Ротариу (№9) – Румыния, Рунар Мар Сигурьонссон (№10) – Исландия, Марин Томасов (№14) пен Лука Шимунович (№24) – Хорватия, Иван Маевский (№18) – Беларусь, шабуылшылар Фирмин Мубеле (№19) – Конго Демократиялық Республикасы, Рангело Янга (№32) – Нидерланд елдерінің азаматы. Тағы екеуіне, дәлірегі сербиялық қақпашы Ненад Эрич (№1) пен ресейлік қорғаушы Евгений Постниковқа (№44) Қазақстан азаматтығы берілген. Бұған Түркияның Конья қаласындағы «Коньяспор» клубына таяуда ғана ауысқан Босния және Герцеговинаның өкілі Марин Аничичті қосыңыздар.
Қалған жетеуі ғана таза қазақстандық, соның ішінде екеуі ғана нағыз қазақ. Олар – қақпашы Александр Мокин (№35), қорғаушылар – Абзал Бейсебеков (№15), Юрий Логвиненко (№27), Дмитрий Шомко (№77), жартылай қорғаушылар – Серікжан Мұжықов (№7), Юрий Перцук (№28), шабуылшы – Роман Муртазаев (№45). Кейде сол қос қандасымызды да жасыл алаңға шығармай қояды. Бірауық бізге елордалық клубтың ойыншылары: «Барлық елдердің легионерлері, бірігіңдер!» деп ұрандайтындай сыңайлы көрінеді. Айналайын, ағайын, әділдігін айтыңыздаршы, сонда «Астана» қай елдің командасы болғаны?!
Кезінде Қазақстан футбол федерациясы Шымкенттің «Ордабасы» кәсіби футбол клубына көрсетілген лимиттен артық легионерлер алып қойғаны үшін қомақты көлемде қаржылай айыппұл салумен бірге Еурокубок бәсекелерінен шеттеткені естеріңізде шығар. Дәл сондай тәртіптік жазалау шаралары «Астанаға» келгенде неліктен жүзеге аспай қалатыны түсініксіз. Сіздер бұған не дейсіздер, жанкүйер қауым?!
Әбдісаттар ӘЛІП,
спорт журналистері арасындағы Республикалық шығармашылық конкурстың лауреаты
ШЫМКЕНТ
