Көз ұшында етегін мәңгі жасыл қарағайлар мен қолдың саласындай ақ қайыңдар көмкерген Бурабайдың бейнесі. Ұйыса өскен қалың орманның қыратқа өрлеген тұсында Сарыарқаның самал желімен тербелген биші қайыңдар билеп тұр. Он сан түрлі бояу. Әлде одан да көп пе екен? Тылсым табиғаттың тұнығын сол қалпында қотарып алып, кенепке көшіргендей.
Сурет өнері шын мәнінде құдірет-ау! Қазақ даласының көркем пұшпағын келісті суреттен көргенде жүрек шымырлап кетеді екен. Халықаралық форумға бірінен бірі өткен, кілең сайдың тасындай суретшілер жиналыпты. Корея, АҚШ, Голландия, Қырғызстан, Германия, Түркия, Вьетнам, Ресей, Өзбекстан елдерінің суретшілері. Мұндағы негізгі мақсат – ата-бабамыз ақ найзаның ұшымен, ақ білектің күшімен қорғап қалған киелі жерлерді бейнелеу өнері арқылы барша әлемге таныту.
Қазақ топырағына табаны тұңғыш рет тиген америкалық суретші Alan Skalaski көрікті өңірдің көркем бейнесі Американың солтүстік өңірлерін еске салады дейді. Бәлкім сондықтан да етене жақын тәрізді. Нью-Джерси штатында дүниеге келген 26 жастағы суретшінің Қытай елінде оқып жүргеніне үш жыл болыпты. Ал сурет өнері ес білгелі жан жүрегін баураған дүниесі.
– Нұр-Сұлтан қаласынан Бурабайға сапар шектік. Жолдың қос қапталы жанарың жетпес кеңістік. Не деген мол дүние?! Американың солтүстік-батыс, солтүстік-орталық бөлігінде дәл осындай көріністі көруге болар еді. Тіпті мынандай көркем көріністі сурет тіліне көшіру суретшіге де оңай шығар. Назар салып қарасаңыз, қаншама қанық бояу, анық кескін менмұндалап тұрған жоқ па? Форум аясында төрткүл дүниенің төрт бұрышынан келген суретшілермен танысып, пікір алмасып, тың ақпарат алуға мүмкіндік туды. Осының өзі өте пайдалы дүние, – дейді Alan Skalaski.
Ал Германиядан келген танымал суретші Хеттик Роберт Тәжікстанда дүниеге келген екен. Қазақстанның жайымен етене таныс.
– 2005 жылы Берлинде өткен көрмеге қазақстандық суретшілермен бірге өз туындыларымды қойған болатынмын. Кейін де сан мәрте көрмелерде кездесіп жүрдік. Германияда қазақ елшілігінің ғимаратындағы екі үлкен қабырғадағы қазақ даласынан сыр шертетін тарихи суреттерді салуға атсалыстым, – дейді суретші.
Аймақаралық мәдени байланысты нығайтып, туризмді дамыту үшін аса қолайлы өңір саналатын Бурабай курортының мәртебесін арттыруды көздейтін форумның басты мақсаты көрікті жерлерді сурет тілімен айшықтау ғана емес, өнегеге толы бай тарихымызды бар әлемге таныту.
Форум нәтижесінде әр суретші өзінің екі туындысын облыс жұртшылығына тарту етпек. Соңғы түйін «Көкшетау» мәдениет сарайында өтетін қорытынды көрмеде түйілмек. Енді әлем жұртшылығы еліміздің өткені мен бүгінін, ажарлы бейнесін, базарлы болашағын баршаға ұғынықты сурет тілі арқылы түйсініп, танитын болады.
Ақмола облысы
