Біздің жігіттер арасынан алғашқы болып рингке 81 кило салмақ дәрежесіндегі Бекзат Нұрдәулетов көтерілді. Ол Оңтүстік Кореяның өкілі Хонг Ингпен күш сынасты. Бәсеке басталған бетте қарсыласы екіпнідеп шабуылдағанымен, көп ұзамай қандасымыз оны сабасына түсірді. Екінші раунд Бекзаттың айқын басымдығымен өтсе, үшінші раунда кореялықты нокдаунға түсті. Осылайша, төрешілердің барлығы да қазақ боксшысының мықтылығын мойындады.
Бүгін 63 килодағы Закир Сафиуллин әзербайжандық Бахтияр Газибековпен күш сынасады. 14 қыркүйекте Сәкен Бибосынов (52 кг) пен Тұрсынбай Құлахмет (75 кг) шаршы алаңға көтеріледі. Бибосынов моңғолиялық Харху Энхимандахпен, Құлахмет Милос Бартл (Чехия) немесе Михаил Остроумовпен (Израиль) кездеседі. 15 қыркүйекте Қайрат Ералиев (57 кг) алғашқы жекпе-жегін өткізеді. Ол Шарафа Раман (Германия) немесе Йоэль Сегундо Финоль Риваспен (Венесуэла) қолғап түйістіреді. Сондай-ақ дәл сол күні Василий Левит (91 кг) словакиялық Дэвид Мишалекпен сайысқа түсерлееді. 16 қыркүйекте Абылайхан Жүсіпов (69 кг) Вуттичай Масук (Таиланд) \ Долголевец Евгений (Беларусь), ал Қамшыбек Қоңқабаев (+91 кг) Гадфа Дрисси (Испания) \ Белберов Петар Руменов (Болгария) жұптарының жеңімпаздарымен жұдырықтасады.
