ӘЛЕМ ТАНЫҒАН ӘСЕМ МЕЙРАМ

Мемлекет басшысы Нұрсұлтан Назарбаев “Қазақстан” орталық концерт залында Наурыз мейрамына арналып ұйымдастырылған мерекелік концертті тамашалап, концерт басталмас бұрын жиналған қауымға және барша қазақстандықтарға арнап мерекелік құттықтау сөз сөйледі. “Осыдан 19 жыл бұрын еге­мен­дік алмай тұрып, 1991 жылы 15 нау­рызда менің арнайы Жарлы­ғым­мен Наурыз мейрамы ресми ме­реке болып жарияланғаны есте­рі­ңізде болар. Сонда “Ескі жыл есірке, жаңа жыл жарылқа” деп ті­ле­дік, жаңа жылға үміт артып, бо­лашақтан жақсылық күттік. Тіле­гіміз қабыл болып, біз сол жылы ата-бабамыз ғасырлар бойы арман­даған азаттыққа, киелі тәуелсіздікке қол жеткіздік”, деп атап өтті Елба­сы өз сөзінде. Төл мерекесін зарыға күткен халқымен қайта қауышқан Наурызбен бірге тәуелсіздігіміздің тамылжыған сырлы таңы атты. Қазақ елінің еркін тыныстауы да Наурызбен бірге келгендей. Енді міне, әлемдік саясатта Қазақстан шоқ­тығы биіктеген тұста ЮНЕСКО Наурыз мейрамын адамзат баласының мәдени мұрасы санатына қосты. Биыл Біріккен Ұлттар Ұйымы тарапынан Наурыз мерекесі халықаралық мейрам ретінде қабылданды. Жаңарған, жасарған Наурыз дала мен қалаға көктем тынысын әкелді. Алғаш рет сахнасының төріне өнер майталмандарын Тәуелсіздік мерекесінде шығарған “Қазақстан” орталық концерт залындағы осы жолғы концерттің салмағы тым қомақты көрінді. “Наурыз нұры” деген атаумен нағыз жұлдыздар шоғырын жинаған концерттік бағдарламаның шымылдығын Құрманғазы атындағы академиялық халық аспаптары оркестрі күй атасының “Серперімен” серпіп тастады. Қа­зақстанның еңбек сі­ңір­ген қайрат­кері Дүйсен Үкібайдың дирижерлығымен “Серпер” сарыны аяқталысымен халқының қолпаш­тап, дүр еткен шапалағына қайта-қайта бас иген КСРО Халық әртісі, ҚР Мемлекеттік сыйлығының лау­реаты Ермек Серкебаев шықты. “Осыдан бірнеше жыл бұрын Ел­ба­сымызға шекара асып шетелге бар­ғанымда бір керемет концерт залында ән шырқадым, алдымда да, арт жағымда да, оң жағым мен сол жағымда да жағалай ән тың­даған жұрт. Сондай бір ғажайып сарай көрдім, ондай концерт залы бізде қашан болады деп едім. Міне, армандағаным өз елімнен табыл­ды”, деп қуанған маэстро екі ән шыр­қады. Оның бірі – С.Мұха­мед­жа­нов­тың “Айсұлу” операсынан “Сер­ке кавантинасы” болса, екін­шісі С.Бәй­терековтің әйгілі “Жан досым” әні. Сахнаға сыны кетпеген сырлы аяқтай, сұлу жүзіне сыңғырлаған үні келіскен КСРО Халық әртісі, ҚР Мемлекеттік сыйлығының лау­реаты Бибігүл Төлегенова апамыз шығып, “Гауһартасты” маржандай мөлдіретіп төгілдірген сәтіндегі халық әсерін сөзбен айтып жеткізу мүмкін емес. Оны тек дәл осы сәтте, дәл осы залда отырып тың­даған жан  ғана сезінетін болар. Мұнан соң Үкілі Ыбырайды көз ал­дыңа елестетіп, сахнаға ҚР Ха­лық әртісі Қайрат Байбосынов көте­рілген, ал  ҚР Халық әртісі, ҚР Мемлекеттік сыйлығының лау­реаты Қаршыға Ахмедияров “Ел­ба­сы” атты өз шығармасын орын­дады. Халық ақындығын танитын Марфуға Айтқожина “Дара тұлға” атты өлеңіне ән жазыпты, оны Қа­зақстанның еңбек сіңірген қайрат­кері Шахмардан Әбілов орындады. Ән асқақ, адам жанына қайрат жанитындай өр туынды екен. Наурыз нұры сахна төрін сал­танатқа, қуанышқа бөледі. Әлібек Дінішев, Жәния Әубәкірова, Ғафиз Есімов, Нұржамал Үсенбаева, Ес­кендір Хасанғалиев, Нұрғали Нүсіпжанов, Айман Мұсаходжаева, Нағима Есқалиева сынды қазақ өнерінің жарқыраған жақұттары бірінен соң бірі ән шырқаған концерт тамашасы тыңдаған жанды ән әлемінің айдынында тербеп сырлы әуен сазымен әлдилей берді, әлдилей берді. Көңілдері көктем­дей, әуен сазынан әсерге  бөленген халық “Наурыз нұры” концертінен тыны­ғып, рухани түлеп қайтып жатты. Анар ТӨЛЕУХАНҚЫЗЫ.