Қазақстан • 17 Қыркүйек, 2019

Қуаныш Сұлтанов: Тату көршілік көкжиектері

268 рет
көрсетілді
3 мин
оқу үшін

Қазақстан Республикасының Президенті Қасым-Жомарт Кемелұлы Тоқаевтың Қытай Халық Республикасына жасаған мемлекеттік сапары Қазақстан-Қытай қарым-қатынасының жаңа кезеңін бастады.

Қуаныш Сұлтанов: Тату көршілік көкжиектері

Біз мемлекеттік тәуел­сіз­дігімізді жариялаған 1991 жылдың 16 желтоқсанынан кейінгі қысқа мерзімде Қытай мемлекеті біздің мемлекеттік тәуелсіздігімізді мойындап, дипломатиялық қатынас орнатуға бастамашы болып, екі ел арасында тұңғыш ресми келісімге қол қойылып еді. Содан бері өткен 30 жылға жуық мерзімде Тұңғыш Пре­зи­дент – Елбасы Нұрсұлтан Әбішұлы Назарбаевтың бас­тамасымен көршілес екі ел арасында бұрын-соңғы тарихымызда болмаған бейбіт әрі жасампаздық жетістіктеріне қол жеткізіліп, дипломатиялық қарым-қатынасымызды хал­қымыздың өркениет өрісіне тиімді пайдаланумен келеміз.

Жемісті жылдар жобасын Нұрсұлтан Назарбаев және оның қытайлық әріптестері Цзян Цземинь, Ху Цзиньтао, Си Цзиньпин өзара түсіністік жағ­дайында жүзеге асырып, тату көршіліктің мызғымас ірге­тасын қаласты.

Өзара түсіністік, ынты­мақтастық, сыйластық ауанын қалыптастырдық.

Ендігі жерде біздің өркен­деуіміз тұсында ғаламдық жаңа құбылыстар үдере көтерілді.

Көршілес елдер дамуын­дағы өзара айнымас сеніммен қатар жаңа, көп жағдайда бол­жанбаған қайшылықтар қоғам назарына ықпал ете бастады.

Қазақстанда ең жоғары биліктің өзгеруіне байланыс­ты бұрынғы құндылықтар мен стратегиялық даму сабақ­тастығын қамтамасыз етумен қатар, жаңа көзқарастар мен мақсат-міндеттер тіз­бе­гі көтерілді. Мемлекет әлеуеті ел ішіндегі жағдай мен ха­лық­аралық дәрежедегі орнын да «екі шылбыр, бір тізгіндей» тең ұстаудың маңыздылығында.

Қ.Тоқаевтың Президент лауа­зымындағы Қытайға тұңғыш сапары осы талаптар­дың айғағындай болды.

Біріншіден, тәуелсіз мемле­кеттік құнды­лық­тарымызға, аумақтық тұтастығымыз қағи­даттарын қатаң сақтауға, дер­бес ұстаным­дарымызға құрметпен қарау; екіншіден, көршілес елмен жан-жақты қатынасты адал әріптестік, өзара түсіністік, ортақ мүддеге ын­ты­­мақ­тастықты сақтау; үшін­шіден, Қазақ­стан-Қытай екіжақты қарым-қатынас­ты бар­лық бағыттар бойынша жаңа кезеңге көтеру.

Біздің Президентіміз Қытай Төрағасы Си Цзиньпинмен, Бүкілқытайлық халық өкілдері жиналысының Төрағасы Ли Чжаньшумен, Мемлекеттік Кеңес Төрағасы Ли Кэцянмен осы жә­не тағы басқа маңыз­ды мә­селелерді кеңінен талқы­лады.

Қытай тарапы Қазақстан басшысының мемлекеттік сапарына айрықша мән берді. Барлық көтерілген мәселелер бойынша ашық әңгіме болды. Қазақстан басшысына шын ықыласты өте жоғары дәрежеде құрмет көрсетілді. Президент тұрақтаған орындарда салтанатты қарсы алу рәсімінде, Тяньаньмэн алаңында Қазақ­стан Туы желбіреп, Мемле­кеттік Әнұранымыз орындалып, зеңбіректерден салют бері­ліп, Президент арқылы қазақ халқына жоғары мәрте­белі құрмет көрсетілді.

Келіссөздер қорытындысы бойынша екіжақты қаты­на­сымызға жаңа серпін беретін өте маңызды құжаттарға қол қойылды. Екі Мемлекет басшылары қол қойған Мәңгілік әріптестік әрі ынтымақтастық туралы Бірлескен мәлімдемені бөліп айту орынды. «Нұрлы жол», Ұлы Жібек жолының экономикалық белдеуі, ІТ орталығы туралы, тағы бас­қа келісімдер де біздің дамуы­мыз­ға оң ықпалын тигізері анық.

Сапар аясында Прези­дент­­тің қатынасып, сөз сөй­леуімен бизнес-форум өтсе, Қоғамдық ғылымдар акаде­миясында көптеген адамдар мен ком­пания­лар өкілдерінің қаты­су­ымен өткен жиынға да қытай қо­ғамы зор қызығушылық біл­діріп, екі ел арасындағы әріп­тестік байланыстың нығая түсуіне екпін берілді.

Сондай-ақ барлық кезде­сулер мен келіссөздерде ағыл­шын, қытай тілдерін жете мең­геруіне қарамастан, Қасым-Жомарт Кемелұлы өз сөздерін мемлекеттік тілімізде сөйлеп, жүргізгенін қытай тарапы сый­ластықпен қабылдады.

 

Қуаныш СҰЛТАНОВ,

Парламент Мәжілісінің депутаты