Бұл деректі елордада екінші мәрте өткізілген жасыл өсім форумында АХҚО-ның басқарушысы Қайрат Келімбетов келтірді. Ол келер жылы бірқатар жаңа компаниялармен еселенетінін жеткізді. Былтыр қаржы орталығының биржасында «Жасыл» инвестиция қағидаты бекітілді. Жүйелі жұмыстың жолға қойылуымен АХҚО-ның беделі арта түскенін айтты.
– Беделді қаржы орталықтарының жаһандық рейтингінде «Астана» халықаралық қаржы орталығы 51-орынға көтерілді. Ал Шығыс Еуропа және Орталық Азияда біздің орталық көштің басында. Осылайша Нұр-Сұлтан шаһарында орналасқан АХҚО әлемдік қаржы жүйесінің картасында танымалдылыққа ие болды. 2017 жылы Еуропа қайта құру және даму банкімен бірлесіп Қазақстанға арналған «жасыл» қаржы жүйесінің тұжырымдамасын қабылдадық. 2018 жылы «жасыл» қаржы бойынша АХҚО кеңесі құрылды. Оның мүшелері тұрақты қаржыландыру ісінің мамандары, үлкен жиырмалықтың деңгейінде мойындалған сарапшылар бүгінде халықаралық сарапшылармен бірге орталықтың заңнамасы аясында «жасыл» қаржыландыруға байланысты реттеуші базаны құруға бағытталған жұмыс қолға алынды. Сонымен қатар «жасыл» қаржыландыруға байланысты заңды жетілдіру үшін Экология, геология және табиғи ресурстар министрлігімен де белсенді жұмыс жүргізіліп жатыр. Жаңа экологиялық кодекстің жобасы Парламентте оң қабылданып, оның көмегімен елімізде «жасыл» қаржыландырумен байланысты көптеген инновациялық жаңалықтар енгізіледі деген үміттемін, – деді Қ.Келімбетов.
Уақыт өткен сайын жаһандық климат мәселесі ушығып бара жатқаны мәлім. Осы ретте «жасыл» экономикаға көшу бұл заманның бұйрығы деп есептейді Бутан корольдігінің экс-премьер-министрі Церинг Тобгай.
– Уақыт создырмай барлық мемлекеттер «жасыл» экономикаға көшкені абзал. Дүние жүзіндегі климаттың күрт өзгеруі туралы дәлел келтірудің өзі артық. Оны баршамыз сезіп келеміз. Бүгінде сынап бағанасы әлем бойынша 1 градусқа жоғарылады. Даусыз, бұл алаңдатарлық жағдай. Теңізге шығуға мүмкіндігі жоқ елдерде ауа райы 1,5 градусқа дейін көтеріліп жатыр. Бұл мамандардың айтқаны. Мұздықтардың еруі теңіз деңгейінің көтерілуіне алып келеді. Бұған Гренландиядағы мұздықтардың еруі нақты дәлел. Осыған байланысты болашақ ұрпақтың мәселесін қазірден бастап ойланғанымыз дұрыс, – деді Ц.Тобгай.
Әлемдегі жылыну мәселесіне Қазақстан да бейжай қарап отырған жоқ. Бұл орайда еліміздегі жағдайды реформалық деңгейде реттеудің қарекетін Экология, геология және табиғи ресурстар министрлігі қолға алмақ. Ведомство басшысы Мағзұм Мырзағалиев «жасыл» қаржыландыру, жасыл технологияны жаппай дамыту құқықтық шешімсіз қиынға соғатынын айтады. Сол себепті жыл соңында Парламент мінберінде талқыланатын Экологиялық кодекс саладағы түйткілді проблемалардың шешілуіне сеп болады деп сендірді.
– Биылғы жылдың аяғында заң жобасы Парламентте талқыланады. Бұл реформада «жасыл» қаржыландыру, «жасыл» жобалар ұғымдары енгізілді. Қазақстан «жасыл» инвестиция тарту бойынша Еуропа қайта құру және даму банкі, Азия даму банкі, Дүниежүзілік банк сынды ұйымдармен әріптестікті жалғастыруға ниетті. Әлемдік тәжірибені ескерсек, экологиялық мәселелерді шешуде қаржы тарту қалыпты үрдіс. Қазақстан балама шешімдерді қарастырып, бұл бағытта инвестиция тарту ісін жандандырмақ, – деді М.Мырзағалиев.
АХҚО «жасыл» қаржыландыру индустриясын арттыру мақсатында мемлекеттік және квазимемлекеттік органдармен әріптестік байланысты орнатқан. Бұл әріптестік аталған нарықта алғашқы құнды қағаздарды шығаруға негізделіпті.
– Исламдық қаржыландыру нарығын дамыту үшін құнды «жасыл» қағаздарды, сондай-ақ «жасыл» сукукты шығару ісі қолға алынды. Бұған қоса Нұр-Сұлтан және Алматы қалаларының әкімдіктерімен «жасыл» жобалар пулын қалыптастыру бойынша белсенді жұмыс жүргізілуде, – деді Қ.Келімбетов.
Айта кетейік, Жасыл өсім форумына 300-ден астам отандық және әлемдік қаржыгерлер, экономистер, саясаткерлер және бизнес өкілдері жиналды. Биылғы форумның жұмысы «жасыл» таксономия, зиянды шығарындылар және жасыл қаржыландыру аясында өрбіді.
Сөз орайы келгенде айта кеткен жөн, ТМД елдері арасында Қазақстан «жасыл» экономикаға алғашқылардың бірі болып көшті. Climate Bonds Initiative компаниясының дерегінше, 2019 жылдың алғашқы жартысында «жасыл» құнды қағаздардың көлемі 118 млрд АҚШ долларын құраған. Бұл әлемдік нарық капиталының 1%-на жуықтайды. Соған қарамастан, парник газының жыл сайынғы мөлшері азаймай тұр.
